ಲಾಹೋರ್: ಪಾಕಿಸ್ತಾನದ ಮಾಜಿ ಅಧ್ಯಕ್ಷ, ಮಾಜಿ ಸೇನಾ ಮುಖ್ಯಸ್ಥ ಫರ್ವೇಜ್ ಮುಷರಫ್ ಅವರಿಗೆ ವಿಧಿಸಲಾಗಿದ್ದ ಮರಣ ದಂಡನೆಯನ್ನು ಪಾಕಿಸ್ತಾನಿ ಹೈಕೋರ್ಟ್ ರದ್ದುಗೊಳಿಸಿದೆ.
2007ರ ನವೆಂಬರ್ನಲ್ಲಿ ಮುಷರಫ್ ಅವರು ಸಂವಿಧಾನಕ್ಕೆ ವಿರುದ್ಧವಾಗಿ ತುರ್ತುಪರಿಸ್ಥಿತಿ ಘೋಷಣೆ ಮಾಡಿದ್ದನ್ನು ದೇಶದ್ರೋಹ ಎಂದು ಪರಿಗಣಿಸಿದ್ದ ಪೇಷಾವರ ಹೈಕೋರ್ಟ್ನ ವಿಶೇಷ ಪೀಠ ಅವರಿಗೆ ಮರಣದಂಡನೆ ವಿಧಿಸಿ ಡಿಸೆಂಬರ್ 17ರಂದು ತೀರ್ಪು ನೀಡಿತ್ತು.
ಈಗ ಮುಷರಫ್ ಅವರಿಗೆ ಮರಣದಂಡನೆ ವಿಧಿಸುವುದೇ ಸಂವಿಧಾನಕ್ಕೆ ವಿರುದ್ಧ ಎಂದು ಹೇಳಿದ ಕೋರ್ಟ್ ಶಿಕ್ಷೆಯನ್ನು ಹಿಂಪಡೆದಿದೆ ಎಂದು ಸರ್ಕಾರಿ ವಕೀಲರೋರ್ವರು ತಿಳಿಸಿದ್ದಾರೆ.
ಮರಣದಂಡನೆ ವಿಧಿಸಿದ್ದ ಮೂರು ನ್ಯಾಯಮೂರ್ತಿಗಳನ್ನೊಂಡ ಪೀಠ, ಒಂದೊಮ್ಮೆ ಮುಷರಫ್ ಅವರು ನೇಣುಶಿಕ್ಷೆಗೂ ಮೊದಲೇ ಮೃತಪಟ್ಟರೆ ಅವರ ಮೃತದೇಹವನ್ನೇ ಮೂರು ದಿನಗಳ ಕಾಲ ನೇಣಿಗೇರಿಸಿ ಇಡಬೇಕು ಎಂದು ಸೂಚನೆ ನೀಡಿತ್ತು.
ತಮ್ಮನ್ನು ದೇಶದ್ರೋಹಿ ಎಂದು ಪರಿಗಣಿಸಿದ ನ್ಯಾಯಾಲಯದ ಕ್ರಮವನ್ನು ಪ್ರಶ್ನಿಸಿದ ಮುಷರಫ್ ಅರ್ಜಿ ಸಲ್ಲಿಸಿದ್ದರು.
ವಿಚಾರಣೆ ನಡೆಸಿದ ಲಾಹೋರ್ ಹೈಕೋರ್ಟ್, ಮುಷರಫ್ ವಿರುದ್ಧ ದಾಖಲಾದ ದೂರು ಮತ್ತು ಅದರ ಉದ್ದೇಶಗಳೆಲ್ಲ ಅಸಾಂವಿಧಾನಿಕ ಎಂದು ಘೋಷಿಸಿ ಶಿಕ್ಷೆಯನ್ನು ಹಿಂಪಡೆದಿದೆ.
ಮುಷರಫ್ಗೆ ನೀಡಲಾಗಿದ್ದ ಮರಣದಂಡನೆ ಶಿಕ್ಷೆಯನ್ನು ಲಾಹೋರ್ ಹೈಕೋರ್ಟ್ ರದ್ದುಪಡಿಸಿದ್ದಾಗಿ ಅವರ ಪರ ವಕೀಲರಾದ ಅಝರ್ ಸಿದ್ಧಕಿ ಸ್ಪಷ್ಟಪಡಿಸಿದ್ದಾರೆ.
ಏನಿದು ಪ್ರಕರಣ? ಮುಷರಫ್ ಪಾಕಿಸ್ತಾನ ಸೇನಾ ಮುಖ್ಯಸ್ಥರೂ ಆಗಿದ್ದವರು. 1999ರಿಂದ 2008ರವರೆಗೆ ಅಧ್ಯಕ್ಷರಾಗಿದ್ದ ಮುಷರಫ್, ರಾಜಕೀಯ ಬಿಕ್ಕಟ್ಟಿನ ಕಾರಣಕ್ಕೆ 2007ರ ನವೆಂಬರ್ನಲ್ಲಿ ತುರ್ತುಪರಿಸ್ಥಿತಿ ಘೋಷಣೆ ಮಾಡಿದ್ದರು. ಅದು ಡಿಸೆಂಬರ್ 15ರವರೆಗೆ ಮುಂದುವರಿದಿತ್ತು. ಹೀಗೆ ತುರ್ತುಪರಿಸ್ಥಿತಿ ಹೇರಿದ 25 ದಿನಕ್ಕೆ ತಮ್ಮ ಸೇನಾ ಮುಖ್ಯಸ್ಥನ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಹೀಗೆ ಸಂಸತ್ತನ್ನು ಅಮಾನತು ಮಾಡಿದ್ದು ಸಂವಿಧಾನ ವಿರೋಧಿ ಎಂದು 2013ರಲ್ಲಿ ಪಾಕ್ ಸರ್ಕಾರ ಮುಷರಫ್ ವಿರುದ್ಧ ದೇಶದ್ರೋಹ ಪ್ರಕರಣ ದಾಖಲಿಸಿತ್ತು.
ನಂತರ 2014ರ ಮಾರ್ಚ್ 31ರಂದು ಮುಷರಫ್ ವಿರುದ್ಧ ದೋಷಾರೋಪಣೆ ಸಲ್ಲಿಸಲಾಗಿತ್ತು. ಅದೇ ವರ್ಷ ಸೆಪ್ಟೆಂಬರ್ನಲ್ಲಿ ಪೇಷಾವರ ವಿಶೇಷ ನ್ಯಾಯಾಲಯದ ಎದುರು ಸರ್ಕಾರ ಮುಷರಫ್ ವಿರುದ್ಧ ಸಕಲ ದಾಖಲೆಗಳನ್ನೂ ಒದಗಿಸಿತ್ತು.(ಏಜೆನ್ಸೀಸ್)