ಮನಿಲಾ: ಚೀನಾದಲ್ಲಿ ಮೃತ್ಯುಕೂಪ ನಿರ್ಮಿಸಿರುವ ಮಾರಕ ಕೊರೊನಾ ವೈರಸ್(COVID-19) ವಿಶ್ವದಾದ್ಯಂತ ಇನ್ನಿಲ್ಲದ ಭೀತಿಯನ್ನು ಸೃಷ್ಟಿ ಮಾಡಿದೆ. ಇದೀಗ ಕೊರೊನಾ ಕರಿನೆರಳು ಏಷ್ಯಾ ಖಂಡದ ಅನೇಕ ಧಾರ್ಮಿಕ ಕ್ಷೇತ್ರಗಳ ಮೇಲೆ ಬಿದ್ದಿದ್ದು, ಶೇಕ್ಹ್ಯಾಂಡ್ ಸೇರಿದಂತೆ ಅನೇಕ ನಿರ್ಬಂಧಗಳೊಂದಿಗೆ ಕೆಲವು ಭಾಗಗಳಲ್ಲಿ ಮಂದಿರ, ಮಸೀದಿ ಹಾಗೂ ಚರ್ಚ್ಗಳನ್ನು ಮುಚ್ಚಲಾಗಿದೆ.
ಸದಾ ಜನರಿಂದ ತುಂಬಿ ತುಳುಕುತ್ತಿದ್ದ ಫಿಲಿಪೈನ್ಸ್ನ ಪ್ರಖ್ಯಾತ ಕ್ಯಾಥೋಲಿಕ್ ಚರ್ಚ್ ಅಕ್ಷರಶಃ ಸ್ತಬ್ಧವಾಗಿದೆ. ಕೊರೊನಾ ಹರಡದಂತೆ ತಡೆಯಲು ಪಾರ್ಥನೆಗಾಗಿ ಚರ್ಚ್ಗೆ ಆಗಮಿಸುವರು ಒಬ್ಬರಿಗೊಬ್ಬರು ಶೇಕ್ಹ್ಯಾಂಡ್ ಮಾಡುವುದಾಗಲಿ ಅಥವಾ ಸ್ಪರ್ಶಿಸದಂತೆ ಅಲ್ಲಿನ ಬಿಷಪ್ ಮನವಿ ಮಾಡಿದ್ದಾರೆ.
ಇನ್ನು ಚೀನಾದ ಹಾಂಗ್ಕಾಂಗ್ನಲ್ಲೂ ಇದನ್ನೇ ಅನುಸರಿಸಲಾಗಿದೆ. ಅಲ್ಲದೆ, ಸುಮಾರು ಎರಡು ವಾರಗಳು ಕಾಲ ಸಾರ್ವಜನಿಕವಾಗಿ ಒಟ್ಟಾಗಿ ಸೇರುವುದನ್ನು ನಿಷೇಧಿಸಲಾಗಿದ್ದು, ಚರ್ಚ್ಗೆ ಆಗಮಿಸುವ ಬದಲು ಆನ್ಲೈನ್ ಮೂಲಕವೇ ವೀಕ್ಷಿಸಿ ಎಂದು ಇಲ್ಲಿನ ಕ್ಯಾಥೋಲಿಕ್ ಚರ್ಚ್ನ ಬಿಷಪ್ ಕಾರ್ಡಿನಲ್ ಜಾನ್ ಹಾನ್ ಟಾಂಗ್ ತಿಳಿಸಿದ್ದಾರೆ.
ಚೀನಾದ ಮುಖ್ಯ ಪ್ರದೇಶಗಳಲ್ಲಿ ಬೌದ್ಧ ಮಂದಿರ, ಕ್ರಿಶ್ಚಿಯನ್ ಚರ್ಚ್ ಮತ್ತು ಮುಸ್ಲಿಂ ಮಸೀದಿಗಳನ್ನು ಜನವರಿ 29ರಿಂದಲೂ ಮುಚ್ಚಲಾಗಿದೆ. ಧಾರ್ಮಿಕ ಆಚರಣೆ ವೇಳೆ ಜನರು ಒಟ್ಟಾಗಿ ಒಂದೆಡೆ ಸೇರುವುದರಿಂದ ವೈರಸ್ ಹೆಚ್ಚಾಗಿ ಹರಡಲಿದೆ ಎಂಬ ಮುಂಜಾಗ್ರತ ಕ್ರಮವಾಗಿ ಈ ರೀತಿ ಮಾಡಲಾಗಿದೆ.
ಈ ರೀತಿಯ ನಿರ್ಬಂಧದಿಂದಾಗಿ ಏಷ್ಯಾ ಖಂಡದ ಅನೇಕ ಧಾರ್ಮಿಕ ಕ್ಷೇತ್ರಗಳಿಗೆ ಭೇಟಿ ನೀಡುವವರ ಸಂಖ್ಯೆಯಲ್ಲಿ ಭಾರಿ ಕ್ಷೀಣಿಸಿದೆ. ಅದಕ್ಕೆ ಉದಾಹರಣೆಯಾಗಿ ಪ್ರವಾಸಿಗರ ನೆಚ್ಚಿನ ತಾಣವಾಗಿರುವ ಜಪಾನ್ನ ಬೌದ್ಧ ಮಂದಿರ ಮತ್ತು ಶಿಂಟೋ ದೇವಾಲಯಗಳಿಗೆ ಭೇಟಿ ನೀಡುವ ವಿದೇಶಿ ಪ್ರವಾಸಿಗರ ಸಂಖ್ಯೆಯಲ್ಲಿ ಭಾರಿ ಇಳಿಮುಖವಾಗಿದೆ. ಅಲ್ಲದೆ, ಫಿಲಿಪೈನ್ಸ್, ಥಾಯ್ಲೆಂಡ್, ದಕ್ಷಿಣ ಕೊರಿಯಾ, ಸಿಂಗಪೊರ್ ಸೇರಿದಂತೆ ಅನೇಕ ಪ್ರದೇಶಗಳಲ್ಲಿ ಧಾರ್ಮಿಕ ಕ್ಷೇತ್ರಗಳ ಚಟುವಟಿಕೆಗೆ ಕೊರೊನಾ ಬ್ರೇಕ್ ಹಾಕಿದೆ.
ಧಾರ್ಮಿಕ ಕ್ಷೇತ್ರಗಳು ಮಾತ್ರವಲ್ಲದೆ, ಶಾಪಿಂಗ್ ಮಾಲ್ಗಳು, ಸಿನಿಮಾ ಥಿಯೇಟರ್ಗಳು ಮತ್ತು ಪಾರ್ಕ್ಗಳಲ್ಲಿಯೂ ಜನರು ಒಟ್ಟಾಗಿ ಸೇರದಂತೆ ನಿರ್ಬಂಧ ಹೇರಲಾಗಿದೆ. ಒಟ್ಟಾರೆ, ಕೊರೊನಾ ಚೀನಾ ಸೇರಿದಂತೆ ಏಷ್ಯಾ ಖಂಡದ ಬಹುತೇಕ ಕಡೆ ಅಘೋಷಿತ ಬಂದ್ ವಾತಾವರಣ ನಿರ್ಮಾಣ ಮಾಡಿದೆ. (ಏಜೆನ್ಸೀಸ್)
