ಪಿಂಚಣಿ ನೀಡಲು ಇಲ್ಲ ಅನುದಾನ

ವಿಜಯವಾಣಿ ಸುದ್ದಿಜಾಲ ಧಾರವಾಡ
ಕರ್ನಾಟಕ ವಿಶ್ವ ವಿದ್ಯಾಲಯದ ಆರ್ಥಿಕ ಪರಿಸ್ಥಿತಿ ಉತ್ತಮವಾಗಿಲ್ಲ. ಮುಂದಿನ ತಿಂಗಳಿಂದ ನಿವೃತ್ತರಿಗೆ ಪಿಂಚಣಿ ನೀಡಲು ಅನುದಾನ ಇಲ್ಲ ಎಂದು ಕವಿವಿ ಪ್ರಭಾರ ಕುಲಪತಿ ಪ್ರೊ. ಜಯಶ್ರೀ ಎಸ್​. ತಿಳಿಸಿದರು.
ಬುಧವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕವಿವಿಯಲ್ಲಿ ಸುಮಾರು 1800 ಜನ ನಿವೃತ್ತರಿಗೆ ಪಿಂಚಣಿ ನೀಡಬೇಕು. ಪ್ರತಿ ತಿಂಗಳು 8 ರಿಂದ 9 ಕೋಟಿ ರೂ.ದಂತೆ ವಾರ್ಷಿಕವಾಗಿ 126 ಕೋಟಿ ರೂ. ಪಿಂಚಣಿಗೆ ಹಣ ಬೇಕಿದೆ. ಆದರೆ ಸರ್ಕಾರ ಪ್ರಸಕ್ತವಾಗಿ 70 ಕೋಟಿ ರೂ. ಮಾತ್ರ ಬಿಡುಗಡೆ ಮಾಡಿದೆ. ಉಳಿದ ಹಣವನ್ನು ಕವಿವಿ ಆಂತರಿಕ ಆರ್ಥಿಕ ಸಂಪನ್ಮೂಲದಿಂದ ನೀಡುವಂತೆ ಹೇಳುತ್ತಿದೆ. ಆದರೆ ಇದು ಕಷ್ಟ ಸಾಧ್ಯ. ಹೀಗಾಗಿ ಮುಂದಿನ ತಿಂಗಳಿಂದ ಪಿಂಚಣಿ ನೀಡಲು ಹಣವಿಲ್ಲ ಎಂದರು.
ಕವಿವಿ ಸಿಬ್ಬಂದಿ ವೇತನ ಎಚ್​ಆರ್​ಎಂಸ್​ ಮೂಲಕ ಆಗುತ್ತಿದೆ. ಸರ್ಕಾರದಿಂದ ಅನುದಾನ ಸಮಯಕ್ಕೆ ಸರಿಯಾಗಿ ಸಿಗದ ಕಾರಣ ಪಿಂಚಣಿ ನೀಡುವುದು ಸೇರಿ ಸಾಕಷ್ಟು ಅಭಿವೃದ್ಧಿ ಕಾರ್ಯಗಳಿಗೆ ಹಿನ್ನಡೆಯಾಗಿದೆ. ನಮ್ಮ ವಿಶ್ವ ವಿದ್ಯಾಲಯ ಹಳೇಯದ್ದಾಗಿದ್ದರಿಂದ ನಿವೃತ್ತರ ಸಂಖ್ಯೆ ಹೆಚ್ಚಿದೆ. ಇದೇ ಸ್ಥಿತಿ ಮೈಸೂರು ವಿಶ್ವ ವಿದ್ಯಾಲಯದಲ್ಲೂ ಇದೆ. ಉಳಿದ ವಿವಿಗಳಿಗೆ ಅನುದಾನ ಕೊರತೆ ಎದುರಾಗಿಲ್ಲ ಎಂದರು.
ಬೆಳಗು ಪಠ್ಯದ ಪ್ರಕರಣ ಕುರಿತು ಪ್ರತಿಕ್ರಿಯಿಸಿದ ಜಯಶ್ರೀ ಎಸ್​., ಈಗಾಗಲೇ ಪಠ್ಯದಲ್ಲಿನ ವಿವಾದಿತ ಪಾಠವನ್ನು ಕೈ ಬಿಡಲಾಗಿದೆ. ತಪ್ಪಿತಸ್ಥರ ಮೇಲೆ ಕ್ರಮಕ್ಕೆ ರಚಿಸಿದ ಸಮಿತಿಯಿಂದ ಸಂಬಂಧಿಸಿದವರಿಗೆ ನೋಟಿಸ್​ ಸಹ ನೀಡಲಾಗಿತ್ತು. ಅವರಿಂದ ವಿವರಣೆ ಬಂದಿದ್ದು, ಮುಂದಿನ ದಿನಗಳಲ್ಲಿ ಅಗತ್ಯ ಕ್ರಮವಹಿಸಲಾಗುವುದು ಎಂದರು.