ಅವೈಜ್ಞಾನಿಕ ಸುಂಕದ ಕಟ್ಟೆಗೆ ದರ ಕೇಡು

ಪರಶುರಾಮ ಭಾಸಗಿ ವಿಜಯಪುರ

ರಾಷ್ಟ್ರೀಯ ಹೆದ್ದಾರಿಗಳ ಸುಂಕ ಹೆಚ್ಚಿಸಲು ಮುಂದಾಗಿರುವ ರಾಜ್ಯ ಸರ್ಕಾರದ ಕ್ರಮಕ್ಕೆ ತೀವ್ರ ಆಕ್ರೋಶ ವ್ಯಕ್ತವಾಗಿದ್ದು, ಅವೈಜ್ಞಾನಿಕ ಹೆದ್ದಾರಿಗೆ ದರ ಬೇರೆ ಕೇಡು ಎಂಬ ಅಪವಾದ ಕೇಳಿ ಬಂದಿದೆ.

ಹೌದು, ಇಲ್ಲಿನ ರಾಷ್ಟ್ರೀಯ ಹೆದ್ದಾರಿ 50ರ ವಿಜಯಪುರ- ಸೊಲ್ಲಾಪುರ- ಬೆಂಗಳೂರು ರಸ್ತೆಯಲ್ಲಿ ನಿರ್ವಿುಸಿದ ಸುಂಕದ ಕಟ್ಟೆಯೇ ಅವೈಜ್ಞಾನಿಕವಾಗಿದೆ. ಐತಿಹಾಸಿಕ ನಗರದ ಕೇವಲ ನಾಲ್ಕು ಕಿಮೀ ಅಂತರದಲ್ಲಿ ಸುಂಕದ ಕಟ್ಟೆ ನಿರ್ಮಾಣ ಮಾಡಲಾಗಿದೆ. ಇದರಿಂದ ಗ್ರಾಮೀಣ ಪ್ರದೇಶದ ಜನ ಹೆದ್ದಾರಿ ಬಳಸದಿದ್ದರೂ ಸುಂಕ ಕಟ್ಟಬೇಕಾದ ಅನಿವಾರ್ಯತೆ ಇದೆ. ಅಲ್ಲದೆ, ದ್ವಿಚಕ್ರ ಹಾಗೂ ತ್ರಿಚಕ್ರ ವಾಹನಗಳು ಸುತ್ತು ಬಳಸಿ ಗ್ರಾಮ ಸೇರುವಂತಾಗಿದೆ. ನಗರ ವಿಸ್ತಾರಗೊಳ್ಳುತ್ತಿದ್ದು, ಟೋಲ್ ಗೇಟ್ ನಗರದ ಒಳಭಾಗಕ್ಕೆ ಬಂದಂತಾಗಿದೆ. ಸುತ್ತಲೂ ಶಾಲೆ- ಕಾಲೇಜ್​ಗಳು ನಿರ್ವಣಗೊಂಡಿದ್ದು, ಖಾಸಗಿ ಆಸ್ಪತ್ರೆಗಳು ತಲೆ ಎತ್ತುತ್ತಿವೆ. ಅಲ್ಲದೇ, ಕೃಷಿ ಮಹಾವಿದ್ಯಾಲಯ ನಗರದ ಅನತಿ ದೂರದಲ್ಲಿದ್ದು, ಅಲ್ಲಿಗೆ ಹೋಗಲು ಅನಿವಾರ್ಯವಾಗಿ ಪ್ರತಿದಿನ ಸುಂಕ ಕಟ್ಟಬೇಕಿದೆ. ಹೆದ್ದಾರಿ ಬಳಸದಿದ್ದರೂ ಸುಂಕ ಕಟ್ಟುವುದು ಯಾವ ನ್ಯಾಯ? ಎಂಬುದು ಸ್ಥಳೀಯ ನಿವಾಸಿಗಳ ದೂರು. ಪ್ರಸ್ತುತ ಟೋಲ್​ಗೇಟ್ ಅಂತರ ಹೆಚ್ಚಿಸಬೇಕೆಂಬುದು ಬಹು ದಿನದ ಬೇಡಿಕೆಯಾಗಿದೆ. ಈಗಾಗಲೇ ಇದರ ಬಗ್ಗೆ ಯೋಜನೆ ಸಹ ರೂಪಿಸಲಾಗಿತ್ತಾದರೂ, ಅದು ನನೆಗುದಿಗೆ ಬಿದ್ದಿದೆ. ಟೋಲ್​ಗೇಟ್​ನಿಂದಾಗಿ ಹತ್ತಿರದ ನಿವಾಸಿಗಳು ತೀವ್ರ ತೊಂದರೆ ಅನುಭವಿಸುವಂತಾಗಿದೆ. ವಾಹನಗಳ ಹೊಗೆ, ಶಬ್ದ ಮಾಲಿನ್ಯ ಸೇರಿದಂತೆ ಅಪಘಾತಗಳ ಆತಂಕದಲ್ಲಿ ಕಾಲ ಕಳೆಯುತ್ತಿದ್ದಾರೆ.

ನಿಯಮ ಉಲ್ಲಂಘನೆ: ಹೆದ್ದಾರಿಯುದ್ದಕ್ಕೂ ಅನಧಿಕೃತ ಬಾರ್ ಹಾಗೂ ದಾಬಾಗಳ ದರ್ಬಾರ್ ಹೆಚ್ಚಿದ್ದು, ಅಮಲಿನಲ್ಲಿ ಇಹಲೋಕ ತ್ಯಜಿಸುವವರ ಸಂಖ್ಯೆ ಹೆಚ್ಚಿದೆ. ಸುಂಕದ ಕಟ್ಟೆಗಳ ಸುತ್ತಲಿನ ದಾಬಾಗಳಲ್ಲಿ ವೇಶ್ಯೆಯರ ಬಿಂಕ ಬಿನ್ನಾಣಗಳು ಹೆಚ್ಚುತ್ತಿವೆ. ಮಾತ್ರವಲ್ಲ, ಡಾಬಾಗಳಲ್ಲಿ ಗಾಂಜಾ, ಅಫೀಮ್ಳ ಮಾರಾಟ ಎಗ್ಗಿಲ್ಲದೇ ಸಾಗುತ್ತಿದೆ. ರಾಷ್ಟ್ರೀಯ ಹೆದ್ದಾರಿ 50ರಲ್ಲಿ ಬರುವ ನಿಡಗುಂದಿ, ಆಲಮಟ್ಟಿ, ಹುನಗುಂದ ಸೇರಿದಂತೆ ಹಲವು ಕಡೆ ಅನಧಿಕೃತ ಡಾಬಾಗಳು ತಲೆ ಎತ್ತಿವೆ. ಅಲ್ಲದೇ, ಹೆದ್ದಾರಿಯಿಂದ 200 ಮೀಟರ್ ಅಂತರದಲ್ಲಿ ಯಾವುದೇ ಬಾರ್ ಮತ್ತು ರೆಸ್ಟೋರೆಂಟ್ ಇರಕೂಡದು ಎಂಬ ನಿಯಮ ಗಾಳಿಗೆ ತೂರಲಾಗಿದೆ.

ಮೂಲಸೌಕರ್ಯಗಳು ಮರೀಚಿಕೆ

ಪ್ರಸ್ತುತ ಹೆದ್ದಾರಿಯಲ್ಲಿ ಬರುವ ಟೋಲ್​ನಿಂದ ಸುಮಾರು 10 ಕಿ.ಮೀ. ಅಂತರದಲ್ಲಿ ಮೇಲ್ಸೇತುವೆ ನಿರ್ವಿುಸಲಾಗಿದೆ. ಇದರಿಂದ ಗ್ರಾಮೀಣ ಜನ ಹೊಲಗದ್ದೆಗಳಿಗೆ ಹೋಗಲು ಅನವಶ್ಯಕವಾಗಿ 10 ಕಿ.ಮೀ. ಸಂಚರಿಸಬೇಕಿದೆ. ಹಿಟ್ನಳ್ಳಿ ಬಳಿ ಮೇಲ್ಸೇತುವೆ ನಿರ್ವಿುಸಲಾಗಿದ್ದು, ಕೆಳಭಾಗದಲ್ಲಿ ಪಾದಚಾರಿಗಳು ಹಾಗೂ ಚಕ್ಕಡಿ ಸೇರಿದಂತೆ ಇನ್ನಿತರ ವಾಹನ ಸಂಚರಿಸಲು ಅವಕಾಶ ಕಲ್ಪಿಸಲಾಗಿದೆಯಾದರೂ ಇಷ್ಟೊಂದು ದೂರದಲ್ಲಿ ಸೇತುವೆ ನಿರ್ವಿುಸಿರುವುದು ತೊಂದರೆದಾಯಕವಾಗಿದೆ. ಇನ್ನು ಹೆದ್ದಾರಿಯುದ್ದಕ್ಕೂ ನಿರ್ವಿುಸಿದ ತಾತ್ಕಾಲಿಕ ತಂಗುದಾಣಗಳು ಕುಡುಕರ ತಾಣಗಳಾಗಿವೆ. ಗ್ರಾಮೀಣ ಪ್ರದೇಶಕ್ಕೆ ಅಂಟಿಕೊಂಡಂತೆ ಅನೇಕ ಬಸ್ ನಿಲ್ದಾಣಗಳು ಹಾಳಾಗಿವೆ. ಅಲ್ಲಲ್ಲಿ, ನಿರ್ವಿುಸಿದ ಶೌಚಗೃಹಗಳು ಸಂಪೂರ್ಣ ಹಾಳಾಗಿವೆ. ಹೀಗಾಗಿ ಪ್ರಯಾಣಿಕರು ಹದ್ದಾರಿಯಲ್ಲೇ ವಾಹನ ನಿಲ್ಲಿಸಿ ದೇಹಬಾಧೆ ತೀರಿಸಿಕೊಳ್ಳುವ ಅನಿವಾರ್ಯತೆ ಇದೆ.

ಈಗಾಗಲೇ ಪೆಟ್ರೋಲ್, ಡಿಸೇಲ್ ಬೆಲೆಯಲ್ಲಿ ಏರಿಕೆಯಾಗುತ್ತಿದೆ. ಅಂಥದರಲ್ಲಿ ಟೋಲ್ ಫೀ ಹೆಚ್ಚಿಸಲು ಮುಂದಾಗಿರುವ ರಾಜ್ಯ ಸರ್ಕಾರದ ನಿರ್ಧಾರ ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಸರ್ಕಾರದ ಬೊಕ್ಕಸ ತುಂಬಲು ಕೈಗೊಂಡಿರುವ ಈ ನಿರ್ಣಯ ಸಾರ್ವಜನಿಕರ ಮೇಲೆ ಮತ್ತಷ್ಟು ಪರಿಣಾಮ ಬೀರಲಿದೆ. ಒಂದು ಕೈಯಿಂದ ಕೊಟ್ಟಂತೆ ಮಾಡಿ ಇನ್ನೊಂದು ಕೈಯಿಂದ ಕಸಿದುಕೊಳ್ಳುವುದು ಯಾವ ನ್ಯಾಯ.

| ಅರುಣ ಹುಂಡೇಕರ ಪೆಟ್ರೋಲಿಯಂ ಅಸೋಸಿಯೇಶನ್ ಅಧ್ಯಕ್ಷರು

ವಿಜಯಪುರದಿಂದ ಹುನಗುಂದ 425 ರೂ. ಸುಂಕ ತೆಗೆದುಕೊಳ್ಳುತ್ತಾರೆ. 500 ರೂ. ಸಿಗುವ ಭತ್ಯೆಯೂ ಇದಕ್ಕೇ ಹಾಕಬೇಕಿದೆ. ಟೋಲ್ ಫೀ ಸಲುವಾಗಿ ಸಾಕಾಗಿದೆ. ಸುಮ್ಮನೆ ಕೂಲಿ ಮಾಡುವುದು ಒಳಿತು. ಟೋಲ್ ಶೋಷಣೆಯಿಂದ ಸಾಕಷ್ಟು ಜನ ಬೇಸತ್ತಿದ್ದಾರೆ. ಟೋಲ್ ಹತ್ತಿರ ಎರಡ್ಮೂರು ಕಿಮೀ ರಸ್ತೆ ಸರಿಯಾಗಿರುತ್ತದೆ. ಇನ್ನುಳಿದ ಕಡೆ ಹದಗೆಟ್ಟಿರುತ್ತದೆ. ಮೂತ್ರಿಗಳು ಸಂಪೂರ್ಣ ಹದಗೆಟ್ಟಿವೆ. ಸೌಲಭ್ಯ ಮರೀಚಿಕೆ.

| ಆಂಜನೇಯ ಲಾರಿ ಚಾಲಕ, ಗಂಗಾವತಿ

ಟೋಲ್ ಕಟ್ಟುವುದರಲ್ಲಿಯೇ ಜೀವನ ಸವೆಯುತ್ತಿದೆ. ಕರ್ನಾಟಕದಲ್ಲಿ ಇರುವಷ್ಟು ಟೋಲ್ ಫೀ ಎಲ್ಲೂ ಇಲ್ಲ. ಬೆಂಗಳೂರಿನಿಂದ ವಿಜಯಪುರಕ್ಕೆ ಬರುವುದರೊಳಗೆ 3500 ಟೋಲ್ ಫೀ ಹೋಗುತ್ತೆ. ಇದರಿಂದ ಲಾರಿ ಮಾಲೀಕರಿಗೆ ಭಾರಿ ತೊಂದರೆಯಾಗುತ್ತಿದೆ. ಸಾರಿಗೆ ಶುಲ್ಕ, ವಾಹನದ ಶುಲ್ಕ ಎಲ್ಲ ಕಟ್ಟಿ ಆದಾಯ ಗಳಿಸೋದು ಕಷ್ಟಕರ.

| ಏಗಂಬರ ಲಾರಿ ಮಾಲೀಕ ವೆಲ್ಲೂರ ತಮಿಳುನಾಡು