ಪೂಜೆ ನೆಪದಲ್ಲಿ ಮಗುವಿನ ಕುತ್ತಿಗೆಗೆ ಹಾವು ಸುತ್ತಿದ ಹಾವಾಡಿಗ: ಹಸುಳೆಯ ಕಚ್ಚಿ ಕೊಂದಿತು ನಾಗ

ರಾಯ್ಪುರ: ಮೂಢನಂಬಿಕೆಗೆ ಜೋತುಬಿದ್ದ ಪಾಲಕರು ತಮ್ಮ 5 ತಿಂಗಳ ಹೆಣ್ಣು ಮಗುವನ್ನು ಕಳೆದುಕೊಂಡಿರುವ ಘಟನೆ ಛತ್ತೀಸ್​ಗಢದಲ್ಲಿ ನಡೆದಿದೆ.

ಪಾಲಕರು ತಮ್ಮ 5 ತಿಂಗಳ ಹಸುಗೂಸಿಗೆ ನಾಗ ದೇವತೆಯ ಆಶೀರ್ವಾದ ಸಿಗಲಿ ಎಂದು ರಾಜನಂದಗಾಂವ್​ನಲ್ಲಿ ಪೂಜೆ ಹಮ್ಮಿಕೊಂಡಿದ್ದರು. ತಮ್ಮ ಮಗುವನ್ನು ಹಾವಾಡಿಗನ ಕೈಗೆ ಒಪ್ಪಿಸಿದದರು. ಮಗುವನ್ನು ಮಲಗಿಸಿಕೊಂಡು ಪೂಜೆ ಮಾಡುತ್ತಿದ್ದ ಸಂದರ್ಭದಲ್ಲಿ ಆ ಹಾವು ಮಗುವಿಗೆ ಕಚ್ಚಿದೆ. ಆದರೆ ಆ ಹಾವಾಡಿಗ ಹಾವು ವಿಷಪೂರಿತವಲ್ಲ. ಏನೂ ಆಗುವುದಿಲ್ಲ ಎಂದು ಹೇಳುತ್ತ ಪೂಜೆಯನ್ನು ಹಾಗೇ ಸುಮಾರು ಎರಡು ತಾಸು ಮುಂದುವರಿಸಿದ್ದಾನೆ. ಯಾವಾಗ ಮಗುವಿನ ಉಸಿರಾಟ ನಿಧಾನವಾಗಲು ಶುರುವಾಯಿತೋ ಆಗ ಅದರ ಪಾಲಕರು ಭಯಗೊಂಡು ಕೂಡಲೇ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಆದರೆ ಅದಾಗಲೇ ಆ ಪುಟ್ಟ ಹೆಣ್ಣುಮಗು ಮೃತಪಟ್ಟಿತ್ತು ಎನ್ನಲಾಗಿದೆ.

ಹೆಣ್ಣುಮಗು ಪದೇಪದೆ ಅನಾರೋಗ್ಯಕ್ಕೀಡಾಗುತ್ತಿತ್ತು. ಒಂದು ದಿನ ಮನೆಗೆ ಬಂದಿದ್ದ ಹಾವಾಡಿಗ ಬಿಲ್ಲು ರಾಮ್ ಮರ್ಕಮ್​ ನಾಗದೇವತೆಯ ಆಶೀರ್ವಾದ ಪಡೆದರೆ ಸರಿಯಾಗುತ್ತದೆ. ಅದಕ್ಕಾಗಿ ಒಂದು ಪೂಜೆಯನ್ನು ಮಾಡಿಸಬೇಕು ಎಂದು ಹೇಳಿದ್ದ. ಅದನ್ನು ನಂಬಿದ ಪಾಲಕರು ತಮ್ಮ ಮಗುವನ್ನು ಆತನ ಬಳಿ ಕರೆದುಕೊಂಡು ಹೋಗಿದ್ದರು. ಹಾವಾಡಿಗ ಆ ಮಗುವಿಗೆ ಹಾವಿನ ಆಶೀರ್ವಾದ ಮಾಡಿಸುವ ಸಲುವಾಗಿ ಅದರ ಕುತ್ತಿಗೆಗೆ ಸುತ್ತಿದ್ದ. ಇದೇ ವೇಳೆ ಹಾವು ಕಚ್ಚಿದೆ ಎಂದು ಪಾಲಕರು ಮೂಲಗಳು ತಿಳಿಸಿವೆ. ಬಿಲ್ಲುವನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.