ವಾಷಿಂಗ್ಟನ್: ಕಳೆದ ತಿಂಗಳು ಮನೆಗೆ ಮರಳುತ್ತಿದ್ದವಳು ನಾಪತ್ತೆಯಾಗಿದ್ದಾಳೆ ಎಂದು ಕುಟುಂಬದವರು ದೂರು ದಾಖಲಿಸಿದ್ದ ಭಾರತೀಯ ಮೂಲದ ಅಮೆರಿಕ ಮಹಿಳೆ ತನ್ನ ಕಾರಿನ ಟ್ರಂಕ್ನಲ್ಲಿ ಶವವಾಗಿ ಪತ್ತೆಯಾಗಿರುವ ಘಟನೆ ನಡೆದಿದೆ.
ಸುರೀಲಾ ಡಾಬಾವಾಲ(34) ಮೃತ ಮಹಿಳೆ. ಷಿಕಾಗೋದ ಲಯೋಲಾ ವಿಶ್ವವಿದ್ಯಾಲಯದಲ್ಲಿ ಎಬಿಎಂ ವಿದ್ಯಾರ್ಥಿನಿಯಾಗಿದ್ದ ಸುರೀಲಾ, ಕಳೆದ ಡಿಸೆಂಬರ್ 30, 2019ರಂದು ನಾಪತ್ತೆಯಾಗಿದ್ದಾಗಿ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ಹಲವು ದಿನಗಳವರೆಗೆ ತೀವ್ರ ಶೋಧ ಕಾರ್ಯಾಚರಣೆ ನಡೆಸಿದ ಬಳಿಕ ತನ್ನ ಕಾರಿನ ಟ್ರಂಕ್ ಒಳಗೆ ಬ್ಲ್ಯಾಂಕೆಟ್ನಲ್ಲಿ ಸುತ್ತಿದ ರೀತಿಯಲ್ಲಿ ಸುರೀಲಾ ಶವ ಸೋಮವಾರ ಷಿಕಾಗೋದ ವೆಸ್ಟ್ ಗ್ಯಾರಿಫೀಲ್ಡ್ ಪಾರ್ಕ್ ಬಳಿ ಪತ್ತೆಯಾಗಿದೆ.
ಶವವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು ಅದರ ವರದಿಗಾಗಿ ಅಮೆರಿಕ ಪೊಲೀಸರು ಎದುರು ನೋಡುತ್ತಿದ್ದಾರೆ. ಆದರೆ, ಪ್ರಕರಣ ಸಂಬಂಧ ಈವರೆಗೂ ಯಾರನ್ನೂ ಬಂಧಿಸಿಲ್ಲ.
ಸರೀಲಾ, ಶಾಂಬರ್ಗ್ ಮೂಲದ ಅಶರಾಫ್ ದಾಬಾವಾಲ ಎಂಬುವರ ಮಗಳು. ಅಶರಾಫ್ ದಾಬಾವಾಲ ಶಾಂಬರ್ಗ್ ಏರಿಯಾದಲ್ಲಿ ಗೌರವಾನ್ವಿತ ವೈದ್ಯರಾಗಿದ್ದಾರೆ. ಇವರು ಗುಜರಾತ್ ಮೂಲದವರಾಗಿದ್ದಾರೆ.
ಸುರೀಲಾ ಕಾಣೆಯಾದ ದಿನದಿಂದ ಆಕೆಯ ಬಗ್ಗೆ ಮಾಹಿತಿ ನೀಡಿದವರಿಗೆ 10 ಸಾವಿರ ಡಾಲರ್(7,10,837 ರೂ.) ನೀಡುವುದಾಗಿ ಕುಟುಂಬ ಘೋಷಿಸಿತ್ತು. ಇದೀಗ ಸುರೀಲಾ ಶವವಾಗಿ ಪತ್ತೆಯಾಗಿರುವುದು ಕುಟುಂಬಕ್ಕೆ ಶಾಕ್ ನೀಡಿದೆ. ತನಿಖೆ ನಡೆಯುತ್ತಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)