ನವದೆಹಲಿ: ಐಸಿಸ್ಗೆ ಸೇರಿದ್ದನೆನ್ನಲಾದ ಬೆಂಗಳೂರಿನ ಬಿಜಿನೆಸ್ ಮ್ಯಾನೇಜ್ಮೆಂಟ್ ಕಾಲೇಜಿನ ಪದವೀಧರ ಸಿರಿಯಾದಲ್ಲಿ ಹತ್ಯೆಗೀಡಾಗಿದ್ದಾನೆಂದು ಹೇಳಲಾಗಿದೆ.
ಬೆಂಗಳೂರಿನ ಶ್ರೀಮಂತ ಕುಟುಂಬದ ಸದಸ್ಯನಾಗಿದ್ದ ಫೈಜ್ ಮಸೂದ್ ಎಂಬಾತ ಕಳೆದ ಏಳು ವರ್ಷಗಳಿಂದ ನಾಪತ್ತೆಯಾಗಿದ್ದ. ಈತನಿಗೆ ತಂದೆ- ತಾಯಿ, ಪತ್ನಿ ಹಾಗೂ ಇಬ್ಬರು ಮಕ್ಕಳಿದ್ದಾರೆ. ಈತನ ಪಾಲಕರು ನಾಪತ್ತೆ ದೂರು ದಾಖಲಿಸಿಲ್ಲ ಎಂದು ಹೇಳಲಾಗಿದೆ.
ಐಸಿಸ್ನೊಂದಿಗೆ ನಂಟು ಹೊಂದಿದ್ದ ಆರೋಪದಲ್ಲಿ ರಾಷ್ಟ್ರೀಯ ಭದ್ರತಾ ದಳದ ಸಿಬ್ಬಂದಿಯಿಂದ ಇತ್ತೀಚೆಗೆ ಬಂಧಿತನಾದ ಬೆಂಗಳೂರಿನ ಬಸವನಗುಡಿಯ ವೈದ್ಯ ಅಬ್ದುರ್ ರೆಹಮಾನ್ ಕೂಡ ಫೈಜ್ ಮಸೂದ್ನ ಸಾವನ್ನು ಖಚಿತಪಡಿಸಿದ್ದಾನೆ ಎಂದು ತಿಳಿದು ಬಂದಿದೆ. ನೇತ್ರವೈದ್ಯನಾಗಿದ್ದ ರೆಹ್ಮಾನ್ 2013-14ರಲ್ಲಿ ಐಸಿಸ್ ಸೇರಲು ಸಿರಿಯಾಗೆ ಪ್ರಯಾಣಿಸಿದ್ದ.
ಇದನ್ನೂ ಓದಿ; ಸಿಕ್ಕಿದ್ದು 30 ಗ್ರಾಂ ಹೆರಾಯಿನ್; ಕೊಟ್ಟಿದ್ದು ಮರಣದಂಡನೆ; ಕ್ಯಾಸಿನೋಗಳಷ್ಟೇ ಅಲ್ಲ, ಶ್ರೀಲಂಕಾದಲ್ಲಿದೆ ಕಠಿಣ ಕಾನೂನು
ಉಗ್ರ ಸಂಘಟನೆ ಇಸ್ಲಾಮಿಕ್ ಸ್ಟೇಟ್ನಲ್ಲಿ ಮಸೂದ್ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದ. ಸಿರಿಯಾ ಹಾಗೂ ಇರಾಕ್ನಲ್ಲಿ ಕಾರ್ಯಾಚರಣೆ ನಡೆಸುತ್ತಿದ್ದ. ಜತೆಗೆ, ಬೆಂಗಳೂರಿನಿಂದ ಯುವಕರನ್ನು ಐಸಿಸ್ಗೆ ಭರ್ತಿ ಮಾಡಿಕೊಳ್ಳುವಲ್ಲಿ ಮುಖ್ಯ ಪಾತ್ರ ವಹಿಸಿದ್ದ. 2013ರ ಸೆಪ್ಟಂಬರ್ನಲ್ಲಿ ಕತಾರ್ಗೆ ತೆರಳಿದ್ದ ಮಸೂದ್ ಆ ಬಳಿಕ ನಾಪತ್ತೆಯಾಗಿದ್ದಾನೆ. ಸಿರಿಯಾದಲ್ಲಿ ಆತನಿದ್ದ ಕ್ಯಾಂಪ್ ಮೇಲೆ ನಡೆದ ದಾಳಿಯಲ್ಲಿ ಆತ ಮೃತಪಟ್ಟಿದ್ದಾನೆಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ; ಈ ಫೋಟೋದಲ್ಲಿ ಹತ್ತು ವ್ಯತ್ಯಾಸ ಗುರುತಿಸಬಲ್ಲಿರಾ? ಅಮೆರಿಕ ಗುಪ್ತಚರ ಸಂಸ್ಥೆ ಹಾಕಿದ ಸವಾಲಿದು….!
2014-15ರಲ್ಲಿಯೇ ಈತ ಮೃತಪಟ್ಟಿದ್ದಾನೆ ಎಂದು ಹೇಳಲಾಗಿತ್ತು. ಆಗ ಭಾರತದಿಂದ ಐಸಿಸ್ಗೆ ಭರ್ತಿಯಾದವರ ಬಗ್ಗೆ ತನಿಖೆ ಚುರುಕುಗೊಂಡಿತ್ತು. ಕೊನೆಗೆ ಉತ್ತರ ಬೆಂಗಳೂರಿನ ಶ್ರೀಮಂತ ಮುಸ್ಲಿಂ ಕುಟುಂಬದ ಮಸೂದ್ ಬಗ್ಗೆ ತಿಳಿದು ಬಂದಿತ್ತು. ಈತ ಧರ್ಮದ ಬಗ್ಗೆ ಚರ್ಚೆ ಮಾಡುತ್ತಿದ್ದ. ಬಳಿಕ ಈತನ ಗುಂಪಿನ ಹಲವರು ಐಸಿಸ್ ಸೇರ್ಪಡೆಯಾಗಿದ್ದಾರೆ ಎಂದು ಹೇಳಲಾಗಿದೆ ಎಂದು ವರದಿಯಾಗಿದೆ.