ಮೋದಿ ಅಲೆ ಮೇಲೆ ಬಹುಮತದ ಮಳೆ

ದಿನೇದಿನೆ ದೇಶಾದ್ಯಂತ ಲೋಕಸಭೆ ಚುನಾವಣೆ ಕಾವು ಏರುತ್ತಿದೆ. ಹಳ್ಳಿಯಿಂದ ದಿಲ್ಲಿಯವರೆಗೆ ಅಖಾಡಕ್ಕಿಳಿದಿರುವ ರಾಜಕೀಯ ನಾಯಕರು ಆರೋಪ, ಪ್ರತ್ಯಾರೋಪ, ಸಾಧನೆ, ವೈಫಲ್ಯಗಳ ಪ್ರಚಾರ ಭರಾಟೆಯಲ್ಲಿ ಮುಳುಗಿದ್ದಾರೆ. ಕನ್ನಡ ಪತ್ರಿಕೋದ್ಯಮದಲ್ಲಿ ಹೊಸ ಹೊಸ ಪ್ರಯೋಗಗಳಿಂದ ಓದುಗರ ಮನಗೆದ್ದಿರುವ ವಿಜಯವಾಣಿ ಈ ಬಾರಿಯೂ ವಿಭಿನ್ನ ಪ್ರಯತ್ನಕ್ಕೆ ಕೈಹಾಕಿದೆ. ಮತದಾರರ ನಾಡಿಮಿಡಿತ ಅರಿಯುತ್ತಲೇ ಮತಕಣದ ಜಿದ್ದಾಜಿದ್ದಿ, ಕಾಶ್ಮೀರದಿಂದ ಕನ್ಯಾಕುಮಾರಿವರೆಗಿನ ಹೊಸ ಹೊಸ ಸುದ್ದಿಗಳನ್ನು ಪ್ರದೇಶವಾರು ವಿಶ್ಲೇಷಣೆ, ವಿಷಯ ತಜ್ಞರ ಅಭಿಪ್ರಾಯದಡಿ ಬೇರೆ ಬೇರೆ ಆಯಾಮಗಳಿಂದ ಸಂಗ್ರಹಿಸಿ ವಿಶೇಷವಾಗಿ ಕಟ್ಟಿಕೊಡಲಿದೆ. ಲೋಕಸಭೆ ಚುನಾವಣೆ ಕಂಪ್ಲೀಟ್ ಕವರೇಜ್ ಇಂದಿನಿಂದ…

# ಮೋದಿ ಸರ್ಕಾರದ ಸಾಧನೆಗಳು

# ಎಲೆಕ್ಷನ್ ಕ್ವಿಜ್

# ಕರ್ನಾಟಕದ ಕ್ಷೇತ್ರವಾರು ರಣಕಣ

# ಚುನಾವಣಾ ಇತಿಹಾಸ

# ವೈವಿಧ್ಯಮಯ ಸುದ್ದಿ

# ಎಲ್ಲ ರಾಜ್ಯಗಳ ಚಿತ್ರಣ

# ಮಾತಂದ್ರೆ ಮಾತು, ಹಾಗೇ ಸುಮ್ಮನೆ!

ಅರಳಿದ ಕಮಲ

2014ರ ಏಪ್ರಿಲ್ 7ರಿಂದ ಮೇ 12ರವರೆಗೆ 9 ಹಂತಗಳಲ್ಲಿ ಲೋಕಸಭಾ ಚುನಾವಣೆ ನಡೆಯಿತು. ಚುನಾವಣಾ ಆಯೋಗದ ಪ್ರಕಾರ ಇದು ದೇಶದ ಇತಿಹಾಸದಲ್ಲಿ ದೀರ್ಘ ಅವಧಿಯವರೆಗೆ ನಡೆದ ಮತದಾನ ಪ್ರಕ್ರಿಯೆಗಳಲ್ಲೊಂದು. 543 ಲೋಕಸಭಾ ಸ್ಥಾನಗಳಿಗೆ ಒಟ್ಟು 8,251 ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು. ದೇಶದ ಒಟ್ಟು 81 ಕೋಟಿ ಜನರು ಮತಚಲಾಯಿಸಲು ಅರ್ಹರಾಗಿದ್ದರು. ದೇಶದ ಒಟ್ಟು ಮತದಾರರ ಪೈಕಿ 18-19 ವಯೋಮಾನದವರ ಪ್ರಮಾಣ ಶೇ.2.7ರಷ್ಟಿತ್ತು. 15ನೇ ಲೋಕಸಭೆ ಅವಧಿ 2014ರ ಮೇ 31ರಂದು ಮುಗಿಯಿತು. 2014ರ ಮೇ 16ರಂದು ಚುನಾವಣಾ ಫಲಿತಾಂಶ ಪ್ರಕಟವಾಯಿತು. ಬಿಜೆಪಿ 282 ಸೀಟುಗಳನ್ನು ಪಡೆಯುವ ಮೂಲಕ ಐತಿಹಾಸಿಕ ವಿಜಯ ಸಾಧಿಸಿತು. ಶತಮಾನದ ಪಕ್ಷ ಕಾಂಗ್ರೆಸ್ ಕೇವಲ 44 ಸ್ಥಾನಗಳಿಗೆ ಸೀಮಿತವಾಗಿ ಹೀನಾಯ ಸೋಲನ್ನು ಕಂಡಿತು. ಬಹುಮತಕ್ಕೆ ಅಗತ್ಯವಾದ ಸೀಟುಗಳನ್ನು ಬಿಜೆಪಿಯೊಂದೇ ಪಡೆದಿದ್ದರೂ, ಮಿತ್ರಪಕ್ಷಗಳಿಗೂ ಸರ್ಕಾರದಲ್ಲಿ ಅವಕಾಶ ನೀಡಲಾಯಿತು.

ಹೊಸ ಸಂಪ್ರದಾಯಕ್ಕೆ ನಾಂದಿ

ಬಿಜೆಪಿಯ ಭರ್ಜರಿ ಸಾಧನೆಗೆ ಮೋದಿ ಅಲೆ ಮುಖ್ಯ ಕಾರಣವಾಗಿತ್ತು. ಮುಖ್ಯಮಂತ್ರಿಯಾಗಿ ಗುಜರಾತ್ ಮಾಡೆಲ್ ಮೂಲಕ ಸಂಚಲನ ಮೂಡಿಸಿದ್ದ ಮೋದಿಯವರನ್ನು ಪ್ರಧಾನಿ ಅಭ್ಯರ್ಥಿಯಾಗಿ ಮುಂಚಿತವಾಗಿಯೇ ಘೋಷಿಸುವ ಮೂಲಕ ಬಿಜೆಪಿ ಭಾರತದಲ್ಲಿ ಹೊಸ ಸಂಪ್ರದಾಯ ಶುರುಮಾಡಿತು. ಈ ಕಾರ್ಯತಂತ್ರ ಯಶಸ್ಸು ಗಳಿಸಿತು. 10 ವರ್ಷಗಳಿಂದ ಕಾಂಗ್ರೆಸ್ ನೇತೃತ್ವದ ಯುಪಿಎ ಆಡಳಿತ ಕಂಡಿದ್ದ ಜನ ಬದಲಾವಣೆ ಬಯಸಿದ್ದರು. ಆ ಸಮಯಕ್ಕೆ ಸರಿಯಾಗಿ ರಾಷ್ಟ್ರ ರಾಜಕಾರಣಕ್ಕೆ ಮೋದಿ ಎಂಟ್ರಿಯಾಯಿತು. ದೇಶದ ಹಲವೆಡೆ ಬಿರುಗಾಳಿಯಂತೆ ಸಂಚರಿಸಿದ ಮೋದಿ 450 ರ್ಯಾಲಿಗಳನ್ನು ನಡೆಸಿದರು. ಮೋದಿಗೆದುರಾಗಿ ಕಾಂಗ್ರೆಸ್​ನಿಂದ ರಾಹುಲ್ ಗಾಂಧಿ ಬಿಂಬಿತವಾಗಿದ್ದರೂ, ಅವರಿಂದ ನಿರೀಕ್ಷಿತ ಸಾಧನೆ ಹೊಮ್ಮಲಿಲ್ಲ. ಯುವಜನರು ಪಕ್ಷಭೇದ ಮರೆತು ಮೋದಿಯವರನ್ನು ಬೆಂಬಲಿಸಿದ್ದು ಫಲಿತಾಂಶೋತ್ತರ ವಿಶ್ಲೇಷಣೆಯಲ್ಲಿ ಕಂಡುಬಂತು.

ಭಿನ್ನ ಹಾದಿ

2014ರ ಮೇ 26ರಂದು ನರೇಂದ್ರ ಮೋದಿ ಪ್ರಧಾನಿಯಾಗಿ ಪ್ರಮಾಣವಚನ ಸ್ವೀಕರಿಸಿದರು. ಇಲ್ಲಿಯೂ ಒಂದು ವಿಶೇಷವಿತ್ತು. ಅವರು ಮುಖ್ಯಮಂತ್ರಿಯಾಗಿಯೇ ಮೊದಲ ಬಾರಿಗೆ ಗುಜರಾತ್ ವಿಧಾನಸಭೆ ಪ್ರವೇಶಿಸಿದ್ದರು. ಅಂತೆಯೇ, ಪ್ರಧಾನಿಯಾಗಿಯೇ ಸಂಸತ್ ಪ್ರವೇಶಿಸಿದ ದಾಖಲೆ ನಿರ್ವಿುಸಿದರು. ಬಿಜೆಪಿ ನಾಯಕರು ಮತ್ತು ಪಕ್ಷದ ನೂತನ ಸಂಸದರನ್ನು ಉದ್ದೇಶಿಸಿ ಮಾತನಾಡಲು ಮೋದಿಯವರು ಸಂಸತ್ ಭವನದ ಸೆಂಟ್ರಲ್ ಹಾಲ್​ಗೆ ಆಗಮಿಸುವಾಗ ಪ್ರವೇಶದ್ವಾರದ ಮೆಟ್ಟಿಲಿಗೆ ಹಣೆತಾಗಿಸಿ ನಮಸ್ಕರಿಸಿದ್ದು ದೇಶದ ಗಮನಸೆಳೆಯಿತು. ಪ್ರಮಾಣವಚನ ಸಮಾರಂಭಕ್ಕೆ ಸಾರ್ಕ್ ದೇಶಗಳ ಮುಖ್ಯಸ್ಥರನ್ನು ಆಹ್ವಾನಿಸುವ ಮೂಲಕ, ವಿದೇಶಾಂಗ ನೀತಿ ತಮಗೆ ಹೊಸದಾದರೂ ಈ ನಿಟ್ಟಿನಲ್ಲಿ ವಿಭಿನ್ನ ಹೆಜ್ಜೆಯಿರಿಸುವ ಸುಳಿವನ್ನು ಆರಂಭದಲ್ಲೇ ನೀಡಿದರು. ಆ ರೀತಿಯಲ್ಲೇ ನಂತರದಲ್ಲಿ ಸರ್ಕಾರದ ವಿದೇಶಾಂಗ ರೂಪುಗೊಳ್ಳುತ್ತ ಸಾಗಿದ್ದು ಈಗ ಸರ್ವವಿದಿತ.