ರೈಲಿನಿಂದ ಬಿದ್ದು ಗಾಯಗೊಂಡಿದ್ದ ವ್ಯಕ್ತಿಯನ್ನು ರಕ್ಷಿಸಲು ರೈಲನ್ನು ರಿವರ್ಸ್​ ಓಡಿಸಿದ ಚಾಲಕ

ಜೈಪುರ: ರೈಲಿನಿಂದ ಬಿದ್ದು ಗಾಯಗೊಂಡಿದ್ದ ವ್ಯಕ್ತಿಯನ್ನು ರಕ್ಷಿಸಲು ರೈಲು ಚಾಲಕರೊಬ್ಬರು ಟ್ರೇನ್​ ಅನ್ನು ಅಂದಾಜು ಒಂದು ಕಿ.ಮೀ. ಹಿಂದಕ್ಕೆ ಓಡಿಸಿದ್ದಾರೆ.

ರಾಜಸ್ತಾನದ ಬರಾನ್​ ಜಿಲ್ಲೆಯ ಅಟ್ರು-ಸಲಾಪುರ್​ ರೈಲ್ವೆ ಮಾರ್ಗದಲ್ಲಿ ಸಲಾಪುರ್​ ಪ್ರದೇಶದಲ್ಲಿ ರೈಲು ಚಲಿಸುತ್ತಿದ್ದಾಗ ರಾಜೇಂದ್ರ ಎಂಬ ಮಾನಸಿಕ ಅಸ್ವಸ್ಥ ವ್ಯಕ್ತಿಯೊಬ್ಬರು ರೈಲಿನಿಂದ ಹೊರಗೆ ಜಿಗಿದಿದ್ದಾರೆ. ರಾಜೇಂದ್ರನನ್ನು ರಕ್ಷಿಸಲು ಅವರ ಸಹೋದರ ವಿನೋದ್​ ಪ್ರಯತ್ನಿಸಿದ್ದಾರೆ. ಆಗ ಅವರೂ ಆಯ ತಪ್ಪಿ ರೈಲಿನಿಂದ ಕೆಳಗೆ ಬಿದ್ದಿದ್ದಾರೆ. ತಕ್ಷಣ ಅವರ ಸಹಪ್ರಯಾಣಿಕರು ಚೈನ್​ ಎಳೆದು ರೈಲನ್ನು ನಿಲ್ಲಿಸಿದ್ದಲ್ಲದೆ, ಆಂಬುಲೆನ್ಸ್​ಗೆ ಫೋನ್​ ಮಾಡಿದ್ದಾರೆ.

ಆದರೆ ಅವರಿಬ್ಬರೂ ಬಿದ್ದ ಸ್ಥಳಕ್ಕೆ ರಸ್ತೆ ಸಂಪರ್ಕ ಇಲ್ಲದ ಕಾರಣ ಆಂಬುಲೆನ್ಸ್​ ಅಲ್ಲಿಗೆ ತೆರಳಲು ಸಾಧ್ಯವಾಗಲಿಲ್ಲ. ತಕ್ಷಣ ರೈಲ್ವೆ ಚಾಲಕ ರೈಲನ್ನು ಒಂದು ಕಿ.ಮೀ. ರಿವರ್ಸ್​ ಚಲಾಯಿಸಿ ಪ್ರಯಾಣಿಕರು ಬಿದ್ದಿದ್ದ ಸ್ಥಳ ತಲುಪಿದ್ದಾರೆ. ಗಾಯಾಳುಗಳನ್ನು ರೈಲಿನಲ್ಲಿ ಕರೆತಂದು ಮುಂದಿನ ನಿಲ್ದಾಣದಲ್ಲಿ ಇಳಿಸಿ ಬರಾನ್​ನ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಾಳುಗಳು ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ಅವರ ಸಂಬಂಧಿಗಳು ತಿಳಿಸಿದ್ದಾರೆ.

Leave a Reply

Your email address will not be published. Required fields are marked *