ತಿರುವನಂತಪುರ: ಕರೊನಾ ವೈರಸ್ ತಡೆಗಟ್ಟುವ ಸಲುವಾಗಿ ದೇಶದಲ್ಲಿ ಅನೇಕ ರೀತಿಯ ಮುಂಜಾಗ್ರತಾ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತಿದೆ. ಅನೇಕರು ಕರೊನಾ ವೈರಸ್ ಕುರಿತಾಗಿ ವಿಶೇಷ ಹಾಡುಗಳನ್ನು ತಯಾರಿಸುತ್ತಿದ್ದರೆ ಇನ್ನು ಅನೇಕರು ಅದಕ್ಕೆಂದೇ ವಿಶೇಷ ರೀತಿಯಲ್ಲಿ ನೃತ್ಯ ಮಾಡಿ ಅರಿವು ಮೂಡಿಸುವ ಪ್ರಯತ್ನ ಮಾಡುತ್ತಿದ್ದಾರೆ. ಇದೀಗ ಕೇರಳ ಪೊಲೀಸರು ಕೈ ತೊಳೆಯುವುದು ಹೇಗೆ ಎನ್ನುವುದನ್ನು ನೃತ್ಯದ ಮೂಲಕ ಹೇಳಿಕೊಟ್ಟಿದ್ದು ಆ ವಿಡಿಯೋ ಸಖತ್ ವೈರಲ್ ಆಗಿದೆ.
ಕೇರಳದ ರಾಜ್ಯ ಪೊಲೀಸ್ ಮೀಡಿಯಾ ಸೆಂಟರ್ ಒಂದು ವಿಶೇಷವಾದ ವಿಡಿಯೋವನ್ನು ತಮ್ಮ ಫೇಸ್ಬುಕ್ ಖಾತೆಯಲ್ಲಿ ಪೋಸ್ಟ್ ಮಾಡಿದೆ. ಆರು ಜನ ಪೊಲೀಸ್ ಸಿಬ್ಬಂದಿ ಮುಖಕ್ಕೆ ಮಾಸ್ಕ್ ತೊಟ್ಟುಕೊಂಡು ಅಯ್ಯಪ್ಪನೂ ಕೋಶಿಯೂಂ ಸಿನಿಮಾದ ಕಲಕ್ಕಥ ಹಾಡಿಗೆ ನೃತ್ಯ ಮಾಡಿದ್ದಾರೆ. 1 ನಿಮಿಷ 25 ಸೆಕೆಂಡ್ ಇರುವು ಈ ವಿಡಿಯೋದಲ್ಲಿ ಕರೊನಾ ವೈರಸ್ನಿಂದ ರಕ್ಷಿಸಿಕೊಳ್ಳಲು ಯಾವ ರೀತಿಯಲ್ಲಿ ಕೈಗಳನ್ನು ತೊಳೆಯಬೇಕು ಎನ್ನುವುದನ್ನು ಪೊಲೀಸರು ತೋರಿಸಿಕೊಟ್ಟಿದ್ದಾರೆ.
ಮಂಗಳವಾರದಂದು ಸಂಜೆ ಈ ವಿಡಿಯೋವನ್ನು ಪೋಸ್ಟ್ ಮಾಡಲಾಗಿದ್ದು ಇದೀಗ ವಿಡಿಯೋ ಸಖತ್ ವೈರಲ್ ಆಗಿದೆ. ಪೋಸ್ಟ್ ಮಾಡಿದ ಕೇವಲ 17 ಗಂಟೆಗಳಲ್ಲಿ 9,37,000ಕ್ಕೂ ಹೆಚ್ಚು ಜನರು ವಿಡಿಯೋವನ್ನು ವೀಕ್ಷಿಸಿದ್ದಾರೆ. ರಕ್ಷಣೆ ಮಾಡುವ ಪೊಲೀಸರು ಆರೋಗ್ಯದ ಬಗ್ಗೆಯೂ ಇಷ್ಟೊಂದು ಕಾಳಜಿ ವ್ಯಕ್ತ ಪಡಿಸಿರುವುದು ಅನೇಕರಿಂದ ಮೆಚ್ಚುಗೆ ಪಡೆದುಕೊಂಡಿದೆ. (ಏಜೆನ್ಸೀಸ್)
https://www.facebook.com/statepolicemediacentrekerala/videos/240901263736432/