ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಇತ್ತೀಚೆಗೆ ಟಿಕ್ಟಾಕ್ಗೆ ಎಂಟ್ರಿ ಕೊಟ್ಟಿದ್ದು, ಒಂದೇ ದಿನದಲ್ಲಿ ಲಕ್ಷಾಂತರ ಫಾಲೋವರ್ಸ್ಗಳನ್ನು ಹೊಂದಿದ್ದು ಗೊತ್ತಿರುವ ವಿಚಾರ. ಆದರೆ ಇದೇ ಟಿಕ್ಟಾಕ್ ವಿಚಾರಕ್ಕೆ ದೀಪಿಕಾಗೆ ವಿರೋಧ ವ್ಯಕ್ತವಾಗಿದೆ. ಹೌದು, ಅವರ ಟಿಕ್ಟಾಕ್ ವಿಡಿಯೋಗಳನ್ನು ನೋಡಿ ನಟಿ ಕಂಗನಾ ರಣಾವತ್ ಗರಂ ಆಗಿದ್ದಾರೆ. ಅಲ್ಲದೆ, ದೀಪಿಕಾ ಪಡುಕೋಣೆ ಕ್ಷಮೆ ಕೇಳಬೇಕು ಎಂದು ಕಂಗನಾ ಆಗ್ರಹಿಸಿದ್ದಾರೆ.
ದೀಪಿಕಾ ಟಿಕ್ಟಾಕ್ ವಿಡಿಯೋಗೂ ಕಂಗನಾ ರಣಾವತ್ಗೂ ಎಲ್ಲಿಯ ಸಂಬಂಧ ಎಂಬ ಪ್ರಶ್ನೆ ಮೂಡುವುದು ಸಹಜ. ಲಕ್ಷ್ಮೀ ಅಗರವಾಲ್ ಮೇಲೆ ಆದ ಆಸಿಡ್ ದಾಳಿ ಕುರಿತ ‘ಚಪಾಕ್’ ಚಿತ್ರದ ಪ್ರಚಾರಕ್ಕಾಗಿ ದೀಪಿಕಾ, ಆ್ಯಸಿಡ್ನಿಂದ ಮುಖ ಸುಟ್ಟಿರುವಂತೆ ಮೇಕಪ್ ಮಾಡಿಕೊಂಡು ಟಿಕ್ಟಾಕ್ ವಿಡಿಯೋ ಮಾಡಿದ್ದಾರೆ. ಅಲ್ಲದೆ, ಹಲವಾರು ಬಾರಿ ಲಕ್ಷ್ಮೀ ಅಗರ್ವಾಲ್ ಜತೆ ಸೇರಿ ಟಿಕ್ಟಾಕ್ ವಿಡಿಯೋಗಳನ್ನು ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ‘ಇದು ಸಿನಿಮಾ ಪ್ರಚಾರದ ಗಿಮಿಕ್. ಈ ರೀತಿಯ ವಿಡಿಯೋ ನೋಡಿ ನನ್ನ ತಂಗಿ ರಂಗೋಲಿ ಮಾನಸಿಕವಾಗಿ ನೊಂದಿದ್ದಾಳೆ. ಆಕೆಯೂ ಆ್ಯಸಿಡ್ ದಾಳಿಗೆ ಒಳಗಾದವಳು. ಪದೇಪದೆ ಇಂತಹ ವಿಡಿಯೋಗಳಿಂದ ಆಕೆ ಖಿನ್ನತೆಗೆ ಒಳಗಾಗುತ್ತಿದ್ದಾಳೆ. ಅಲ್ಲದೆ, ಆ್ಯಸಿಡ್ ದಾಳಿಗೆ ಒಳಗಾದವರಿಗೂ ದೀಪಿಕಾ ಟಿಕ್ಟಾಕ್ ವಿಡಿಯೋಗಳು ನೋವು ಉಂಟುಮಾಡಿವೆ. ದೀಪಿಕಾ ಯಾಕೆ ಹೀಗೆ ಮಾಡುತ್ತಿದ್ದಾರೆ ಎಂದು ಉತ್ತರಿಸಬೇಕು. ಈ ಬಗ್ಗೆ ಅವರು ಕ್ಷಮೆ ಕೇಳಬೇಕು’ ಎಂಬುದಾಗಿ ಕಂಗನಾ ರಣಾವತ್ ಆಗ್ರಹಿಸಿದ್ದಾರೆ.
ಇತ್ತೀಚೆಗೆ ಜೆಎನ್ಯುು ಗಲಭೆಯಲ್ಲಿ ಕಾಲೇಜಿಗೆ ಭೇಟಿ ನೀಡಿದ್ದಕ್ಕೆ ದೀಪಿಕಾ ವಿರುದ್ಧ ವಿರೋಧ ವ್ಯಕ್ತವಾಗಿದ್ದವು. ‘ಚಪಾಕ್’ ಸಿನಿಮಾ ಬಹಿಷ್ಕರಿಸುವಂತೆ ಮಾತುಗಳು ಕೇಳಿಬಂದಿದ್ದವು. ಈ ಎಲ್ಲ ಹಿನ್ನೆಲೆಯಲ್ಲಿ ಒಂದೊಳ್ಳೆಯ ಕಥೆ ಹೊಂದಿದ್ದರೂ ‘ಚಪಾಕ್’ ಚಿತ್ರ ಬಾಕ್ಸಾಫೀಸ್ನಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಸದ್ದು ಮಾಡಲಿಲ್ಲ. -ಏಜೆನ್ಸೀಸ್