ಭರತನಾಟ್ಯ ಸ್ಪರ್ಧೆಗೆ ನಟನಂ ಶಾಲೆ ಆಯ್ಕೆ

ಕಡೂರು: ಭರತನಾಟ್ಯ ಭಾರತೀಯ ಸಂಸ್ಕೃತಿಯ ಪ್ರತೀಕ ಎಂದು ನಟನಂ ನೃತ್ಯ ಶಾಲೆ ಪ್ರಾಚಾರ್ಯ ಡಾ. ಕೇಶವಕುಮಾರ ಪಿಳೈ ಹೇಳಿದರು.
ಪಟ್ಟಣದ ಶಾಸಕರ ಮಾದರಿ ಶಾಲೆಯಲ್ಲಿ ಭಾನುವಾರ ನಟನಂ ನೃತ್ಯ ಶಾಲೆಯ ಗುರುವಂದನಾ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ನಟನಂ ಶಾಲೆ ಕಡೂರಿನಲ್ಲಿ ಆರಂಭವಾಗಿ ಹತ್ತು ವರ್ಷಗಳಾಗಿವೆ. ಈ ಅವಧಿಯಲ್ಲಿ ನೂರಾರು ವಿದ್ಯಾರ್ಥಿಗಳು ಭರತನಾಟ್ಯ ಇತರ ನೃತ್ಯ ಪ್ರಾಕಾರಗಳ ಅಭ್ಯಾಸ ಮಾಡಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರತಿಭೆ ಪ್ರದರ್ಶಿಸಿ ಮನ್ನಣೆ ಪಡೆದಿದ್ದಾರೆ ಎಂದರು.
ಈ ಶಾಲೆ ಕಡೂರಿನ ನಾಟ್ಯ ಕಲಾಸಕ್ತರಿಗೆ ಉತ್ತಮ ತರಬೇತಿಯನ್ನು ನಿರಂತರವಾಗಿ ನೀಡುತ್ತಿದೆ. ಸೆಪ್ಟೆಂಬರ್‌ನಲ್ಲಿ ಬ್ಯಾಂಕಾಕ್‌ನಲ್ಲಿ ನಡೆಯಲಿರುವ ಅಂತಾರಾಷ್ಟ್ರೀಯ ಭರತನಾಟ್ಯ ಸ್ಪರ್ಧೆೆಯಲ್ಲಿ ಕಡೂರು ನಟನಂ ಶಾಲೆಯ 10 ವಿದ್ಯಾರ್ಥಿಗಳು ಸ್ಪರ್ಧಿಸುವುದು ಹೆಮ್ಮೆಯ ಸಂಗತಿ ಎಂದರು. ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ಅಧ್ಯಕ್ಷ ಹರೀಶ್ ಅಗ್ನಿ ಮಾತನಾಡಿ, ನಟನಂ ಶಾಲೆಯ ಶ್ರಮ ಶ್ಲಾಘನೀಯವಾದುದು. ಅಂತಾರಾಷ್ಟ್ರೀಯ ಸ್ಪರ್ಧೆಗೆ ತೆರಳಲಿರುವ ವಿದ್ಯಾರ್ಥಿಗಳನ್ನು ರೋಟರಿ ಸಂಸ್ಥೆಯಿಂದ ಸನ್ಮಾನಿಸಲಾಗುವುದು ಎಂದರು.
ರೋಟರಿ ಅಧ್ಯಕ್ಷ ಟಿ.ಡಿ.ರಾಜನ್, ನೃತ್ಯ ಶಿಕ್ಷಕಿ ನಾಟ್ಯಶ್ರೀ ಚೇತನ್, ಪುರಸಭಾ ಸದಸ್ಯ ಕೆ.ಎಂ.ಮೋಹನಕುಮಾರ್, ಶಿಕ್ಷಕಿ ಶೋಭಾ ಇದ್ದರು.