ಮುಂಬೈ: ಹಿಂದೆಂದೂ ಕಾಣದ ಭೀಕರ ಕಾಡ್ಗಿಚ್ಚಿಗೆ ಕಾಂಗರೂ ನಾಡು ಆಸ್ಟ್ರೇಲಿಯಾ ತುತ್ತಾಗಿದೆ. ಲಕ್ಷಾಂತರ ಪ್ರಾಣಿಗಳ ಸಾವು, 25 ಜನರ ಪ್ರಾಣ ಹಾನಿ ಹಾಗೂ ಅನೇಕ ಮನೆಗಳು ಬೆಂಕಿಯ ಕೆನ್ನಾಲಿಗೆಗೆ ಸುಟ್ಟು ಕರಕಲಾಗಿವೆ. ಇಂತಹ ಸಂಕಷ್ಟದ ಸ್ಥಿತಿಯಲ್ಲಿ ಬಾಲಿವುಡ್ ನಟಿ ಜೂಹಿ ಚಾವ್ಲಾ ಮಗ ನೆರವಿಗೆ ಧಾವಿಸಿ ಮಾದರಿಯಾಗಿದ್ದಾರೆ.
ಜೂಹಿ ಚಾವ್ಲಾ ಮಗ ಅರ್ಜುನ್ ಆಸ್ಟ್ರೇಲಿಯಾ ಕಾಡ್ಗಿಚ್ಚು ಪರಿಹಾರ ನಿಧಿಗೆ 300 ಪೌಂಡ್(ಅಂದಾಜು 28 ಸಾವಿರ ರೂ.) ಹಣವನ್ನು ನೀಡಿದ್ದಾರೆ. ಅದೂ ಕೂಡ ಕೂಡಿಟ್ಟಿದ್ದ ಪಾಕೆಟ್ ಮನಿಯನ್ನು ಪರಿಹಾರ ನಿಧಿಗೆ ನೀಡಿ ಮಾನವೀಯತೆ ಮೆರೆದಿದ್ದಾರೆ.
ಈ ಬಗ್ಗೆ ಮಾತನಾಡಿರುವ ಜೂಹಿ ಚಾವ್ಲಾ, ಆಸ್ಟ್ರೇಲಿಯಾ ಕಾಡ್ಗಿಚ್ಚಿನಲ್ಲಿ 500 ಮಿಲಿಯನ್ ಪ್ರಾಣಿಗಳು ಸಾವಿಗೀಡಾಗಿರುವ ಬಗ್ಗೆ ನನ್ನ ಮಗ ಹೇಳಿದ. ಬಳಿಕ ನಾವೇನು ಮಾಡುತ್ತಿದ್ದೇವೆ ಎಂದು ಪ್ರಶ್ನಿಸಿದ. ಕಾವೇರಿ ಕೂಗು ಯೋಜನೆಯಡಿ ನಮ್ಮ ದೇಶದಲ್ಲಿ ಗಿಡಗಳನ್ನು ನೆಡಲು ಸಹಾಯ ಮಾಡುತ್ತಿರುವುದಾಗಿ ಹೇಳಿದೆ. ಅದೇ ದಿನ ಸಂಜೆ 300 ಪೌಂಡ್ ಪಾಕೆಟ್ ಮನಿಯನ್ನು ಕಳುಹಿಸಿದ್ದಾಗಿ ಹೇಳಿದ. ಅದು ಒಳ್ಳೆಯ ಜಾಗಕ್ಕೆ ತಲುಪಿದೆ ಎಂದು ನಾನು ಭಾವಿಸಿದ್ದೇನೆ. ನಾನು ನಿಜಕ್ಕೂ ಸಂತಸಗೊಂಡಿದ್ದು, ದೇವರಿಗೆ ಕೃತಜ್ಞಳಾಗಿದ್ದೇನೆ ಎಂದು ಚಾವ್ಲಾ ತಿಳಿಸಿದ್ದಾರೆ.
ಅಂದಹಾಗೆ ಅರ್ಜುನ್ ಯುಕೆಯ ಬೋರ್ಡಿಂಗ್ ಶಾಲೆಯಲ್ಲಿ ಓದುತ್ತಿದ್ದಾನೆ.
ಮೂಲಗಳ ಪ್ರಕಾರ ಆಸ್ಟ್ರೇಲಿಯಾದಲ್ಲಿ ಸಂಭವಿಸಿದ ಭೀಕರ ಕಾಡ್ಗಿಚ್ಚಿಗೆ 25 ಮಂದಿ ಪ್ರಾಣವನ್ನು ಕಳೆದುಕೊಂಡಿದ್ದಾರೆ. ಅಲ್ಲದೆ, ಬಿಲಿಯನ್ ಡಾಲರ್ನಷ್ಟು ನಷ್ಟ ಉಂಟಾಗಿದೆ. ಸದ್ಯ ಆಸ್ಟ್ರೇಲಿಯಾದ ಕೆಲವಡೆ ಮಳೆಯಾಗುತ್ತಿದ್ದು, ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗಿದೆ. (ಏಜೆನ್ಸೀಸ್)