ನವದೆಹಲಿ: ಇಸ್ಲಾಮಿಕ್ ಸ್ಟೇಟ್ ಇನ್ ಇರಾಕ್ ಆ್ಯಂಡ್ ಸಿರಿಯಾ ಉಗ್ರ ಸಂಘಟನೆಗೆ ಹೊಸ ನಾಯಕನನ್ನು ನೇಮಿಸಿರುವುದಾಗಿ ಗುಪ್ತಚರ ಅಧಿಕಾರಿಗಳು ಖಚಿತಪಡಿಸಿದ್ದಾರೆ. ಆಮೀರ್ ಮೊಹಮ್ಮದ್ ಅಬ್ದುಲ್ ರೆಹಮಾನ್ ಅಲ್ ಮಾವ್ಲಿ ಅಲ್ ಸಲ್ಬಿ ಐಸಿಸ್ ನಾಯಕತ್ವದ ಹೊಣೆ ಹೊರಿಸಲಾಗಿದೆ.
ಅಕ್ಟೋಬರ್ನಲ್ಲಿ ಅಮೆರಿಕ ಸೇನೆ ನಡೆಸಿದ ಕಾರ್ಯಾಚರಣೆಯಲ್ಲಿ ಈ ಹಿಂದಿನ ನಾಯಕ ಅಬೂ ಬಕರ್ ಅಲ್ ಬಾಗ್ದಾದಿಯನ್ನು ಹೊಡೆದುರುಳಿಸಲಾಗಿತ್ತು. ಅಂದಿನಿಂದ ಐಸಿಸ್ ಹೊಸ ನಾಯಕತ್ವದ ಬಗ್ಗೆ ಚರ್ಚೆಯಾಗಿತ್ತು. ಇದೀಗ ಆ ಹೊಣೆಯನ್ನು ಸಲ್ಬಿ ಹೊತ್ತುಕೊಂಡಿದ್ದಾನೆ.
ಅಂದಹಾಗೆ ಸಲ್ಬಿ ಐಸಿಸ್ ಸಂಘಟನೆಯ ಸ್ಥಾಪಕ ಸದಸ್ಯನಾಗಿದ್ದಾನೆ. ಎನ್ಸ್ಲವೆಮೆಂಟ್ ಆಫ್ ಇರಾಕ್ ಯಜಿದಿ ಮೈನಾರಿಟಿ ಗುಂಪಿನ ನೇತೃತ್ವವನ್ನು ಈತ ವಹಿಸಿದ್ದ. ಜಗತ್ತಿನಾದ್ಯಂತ ನಡೆದ ಉಗ್ರ ಕಾರ್ಯಾಚರಣೆಯ ಮೇಲ್ವಿಚಾರಣೆಯನ್ನು ಸಲ್ಬಿ ನಡೆಸುತ್ತಿದ್ದ ಎಂದು ತಿಳಿದುಬಂದಿದೆ.
ಬಾಗ್ದಾದಿ ಸತ್ತ ಒಂದು ಗಂಟೆಯ ಬೆನ್ನಲ್ಲೇ ಸಲ್ಬಿ ಹೆಸರನ್ನು ತೆಗೆದುಕೊಳ್ಳಲಾಗಿತ್ತಂತೆ. ಅಲ್ಲದೆ, ಬಾಗ್ದಾದಿ ಸ್ಥಾನಕ್ಕೆ ಸಬು ಇಬ್ರಾಹಿಂ ಅಲ್ ಹಸಿಮಿ ಅಲ್ ಖುರೇಷಿ ಹೆಸರು ಕೂಡ ಕೇಳಿಬಂದಿತ್ತು. ಆದರೆ, ಸಂಘಟನೆಯ ಹಿರಿಯ ನಾಯಕರು ಹೆಚ್ಚಿನ ಒಲವು ಸಲ್ಬಿಯೆಡೆಗೆ ತೊರಿದ್ದರಿಂದ ಸಲ್ಬಿಗೆ ನಾಯಕತ್ವ ಪಟ್ಟ ಕಟ್ಟಲಾಗಿದೆ ಎಂದು ಗುಪ್ತಚರ ವರದಿ ತಿಳಿಸಿದೆ.
ಐಸಿಸ್ ಪಟ್ಟಿಯಲ್ಲಿ ಸಲ್ಬಿಯೊಬ್ಬ ಪ್ರಭಾವಿ ಆದರ್ಶವಾದಿ ಎಂದು ಹೇಳಲಾಗಿದೆ. ತಲ್ ಅಫಾರ್ ಪಟ್ಟಣದ ಇರಾಕಿ ಟರ್ಕ್ಮೆನ್ ಕುಟುಂಬದಲ್ಲಿ ಜನಿಸಿರುವ ಸಲ್ಬಿ, ಐಸಿಸ್ ನಾಯಕತ್ವ ಪಟ್ಟಿಯಲ್ಲಿ ಕೆಲವೇ ಅರಬ್ಯೇತರ ನಾಯಕರಲ್ಲಿ ಒಬ್ಬನಾಗಿದ್ದಾನೆ. ಈತನನ್ನು ನಾಮ್ ಡೆ ಗುರ್ರೆ ಹಜಿ ಅಬ್ದುಲ್ಲಾ ಹೆಸರಿನಿಂದಲೂ ಕರೆಯಲಾಗುತ್ತದೆ. (ಏಜೆನ್ಸೀಸ್)