ತೆಹ್ರಾನ್: ಇರಾನ್ ಸೇನಾ ಜನರಲ್ ಖಾಸಿಮ್ ಸೊಲೈಮಾನಿಯನ್ನು ಅಮೆರಿಕ ಸೇನೆ ವಾಯುದಾಳಿ ನಡೆಸಿ ಹತ್ಯೆಗೈದ ಬಳಿಕ ಯುಎಸ್-ಇರಾನ್ ನಡುವಿನ ಸಂಬಂಧ ಸಂಪೂರ್ಣ ಹದಗೆಟ್ಟಿದೆ. ಸೊಲೈಮಾನಿ ಸಾವಿಗೆ ಪ್ರತೀಕಾರ ತೀರಿಸಿಕೊಳ್ಳದೆ ಬಿಡುವುದಿಲ್ಲ ಎಂದು ಇರಾನ್ ಈಗಾಗಲೇ ಹೇಳಿಕೊಂಡಿದೆ.
ಇರಾನ್ ಪ್ರಜೆಗಳು ಅಮೆರಿಕ ಅಧ್ಯಕ್ಷನ ವಿರುದ್ಧ ಕಿಡಿಕಾರುತ್ತಿದ್ದಾರೆ. ಅಲ್ಲದೆ ಸೊಲೈಮಾನಿ ಅಂತ್ಯಕ್ರಿಯೆ ವೇಳೆ ಅವರ ಮಗಳೂ ಕೂಡ ಪ್ರತೀಕಾರದ ಪ್ರತಿಜ್ಞೆ ಮಾಡಿದ್ದಾರೆ.
ಹೀಗಿರುವಾಗ ಇರಾನ್ ಸೈನಿಕರು ಅಮೆರಿಕದ 80 ಉಗ್ರರನ್ನು ಇಂದು ಬೆಳಗ್ಗೆ ಹತ್ಯೆ ಮಾಡಿದ್ದಾರೆ ಎಂದು ಇರಾನಿಯನ್ ನ್ಯೂಸ್ ಚಾನೆಲ್ವೊಂದು ವರದಿ ಮಾಡಿದೆ.
ಇರಾಕ್ನಲ್ಲಿ ಬೀಡುಬಿಟ್ಟಿರುವ ಯುಎಸ್ ಸೇನಾ ಪಡೆಗಳನ್ನು, ಸೇನಾ ನೆಲೆಗಳನ್ನು ಗುರಿಯಾಗಿಸಿಕೊಂಡು ಇರಾನ್ ಸೈನಿಕರು ತೆಹ್ರಾನ್ನಿಂದ ಸುಮಾರು 15 ಕ್ಷಿಪಣಿಗಳ ದಾಳಿ ನಡೆಸಿದ್ದಾರೆ. ಯಾವುದೇ ಕ್ಷಿಪಣಿಯೂ ವಿಫಲವಾಗಿಲ್ಲ. ಈ ದಾಳಿಯಲ್ಲಿ ಒಟ್ಟು 80 ಅಮೆರಿಕನ್ ಉಗ್ರರು ಮೃತಪಟ್ಟಿದ್ದಾರೆ. ಹಾಗೇ ಯುಎಸ್ನ ಹೆಲಿಕಾಪ್ಟರ್ಗಳು, ಸೇನಾ ಸಾಮಗ್ರಿಗಳು ಹಾನಿಗೊಂಡಿವೆ ಎಂದು ಸುದ್ದಿ ಮಾಧ್ಯಮ ಹೇಳಿದೆ.
ಅಷ್ಟೇ ಅಲ್ಲದೆ ವಾಷಿಂಗ್ಟನ್ ಮತ್ತೆ ಪ್ರತೀಕಾರಕ್ಕೆ ಮುಂದಾದರೆ ಇನ್ನೂ 100 ಪ್ರದೇಶಗಳನ್ನು ಗುರಿಯಾಗಿಸಿ ದಾಳಿ ಮಾಡುತ್ತೇವೆ ಎಂದು ಇರಾನ್ ಸೇನಾಮೂಲಗಳು ತಿಳಿಸಿದ್ದಾಗಿ ವರದಿಯಾಗಿದೆ.
ಇರಾನ್ ನಡೆಸಿದ ಕ್ಷಿಪಣಿ ದಾಳಿ ಬಗ್ಗೆ ಟ್ವೀಟ್ ಮಾಡಿದ್ದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಆಲ್ ಈಸ್ ವೆಲ್, ಇರಾಕ್ನಲ್ಲಿರುವ ಯುಎಸ್ನ ಎರಡು ಸೇನಾ ನೆಲೆಗಳ ಮೇಲೆ ಇರಾನ್ ಕ್ಷಿಪಣಿ ದಾಳಿ ನಡೆಸಿದೆ. ಅಲ್ಲಿ ಉಂಟಾಗಿರುವ ಸ್ಥಳ ಹಾನಿ, ಸಾವು-ನೋವುಗಳ ಬಗ್ಗೆ ನಾವು ಪರಿಶೀಲನೆ ನಡೆಸುತ್ತಿದ್ದೇವೆ. ನಮ್ಮ ಅತ್ಯಂತ ಶಕ್ತಿಶಾಲಿ ಹಾಗೂ ಸುಸಜ್ಜಿತ ಸೇನಾ ಪಡೆ ವಿಶ್ವದ ಎಲ್ಲ ಕಡೆಗಳಲ್ಲೂ ಇದೆ. ಈ ದಾಳಿಯ ಬಗ್ಗೆ ನಾನು ನಾಳೆ ಸರಿಯಾಗಿ ಹೇಳಿಕೆ ನೀಡುತ್ತೇನೆ ಎಂದಿದ್ದಾರೆ. (ಏಜೆನ್ಸೀಸ್)