ಅಡಿಲೇಡ್: ನಾಲ್ಕು ವರ್ಷಗಳ ಹಿಂದೆ ಅಹರ್ನಿಶಿ ಟೆಸ್ಟ್ ಪಂದ್ಯಗಳ ಹ್ಯಾಟ್ರಿಕ್ ಗೆಲುವಿನ ವಿಶ್ವಾಸದೊಂದಿಗೆ ಅಡಿಲೇಡ್ನಲ್ಲಿ ಕಣಕ್ಕಿಳಿದಿದ್ದ ಭಾರತ ತಂಡ, ಮೊದಲ ಇನಿಂಗ್ಸ್ನಲ್ಲಿ 53 ರನ್ಗಳ ಅಮೂಲ್ಯ ಮುನ್ನಡೆ ಸಾಧಿಸಿದರೂ, ಪಂದ್ಯದ ಮೂರನೇ ದಿನದಾಟದಲ್ಲಿ ಕೇವಲ 36 ರನ್ಗಳಿಗೆ ಆಲೌಟ್ ಆಗಿ ಸೋಲು ಅನುಭವಿಸಿತ್ತು. ಆ ಸೋಲಿನಿಂದ ಕುಗ್ಗದೆ ಭಾರತ ತಂಡ ನಂತರ ಪುಟಿದೆದ್ದು ಐತಿಹಾಸಿಕ ಸರಣಿ ಗೆಲುವು ದಾಖಲಿಸಿದ್ದರೂ, ಆ ಪ್ರವಾಸದಲ್ಲಿ ತನ್ನ ನಿಕೃಷ್ಟ ಮೊತ್ತಕ್ಕೆ ಆಲೌಟ್ ಆದ ನೋವು ಕಾಡುತ್ತಲೇ ಬಂದಿದೆ. ಅದನ್ನು ನಿವಾರಿಸಲು ಭಾರತಕ್ಕೆ ಈ ಸಲದ ಆಸ್ಟ್ರೆಲಿಯಾ ಪ್ರವಾಸದಲ್ಲಿ ಉತ್ತಮ ಅವಕಾಶ ಎದುರಾಗಿದೆ. ಮುಂದಿನ ಶುಕ್ರವಾರದಿಂದ ಅಡಿಲೇಡ್ನಲ್ಲಿ ಹೊನಲು&ಬೆಳಕಿನಲ್ಲೇ ನಡೆಯಲಿರುವ ಬಾರ್ಡರ್-ಗಾವಸ್ಕರ್ ಟ್ರೋಫಿಯ 2ನೇ ಟೆಸ್ಟ್ ಪಂದ್ಯ ಭಾರತಕ್ಕೆ ಆತಿಥೇಯ ಆಸ್ಟ್ರೆಲಿಯಾದ ಪಿಂಕ್ಬಾಲ್ ಪ್ರಾಬಲ್ಯಕ್ಕೆ ಸೆಡ್ಡುಹೊಡೆದು ಸೇಡು ತೀರಿಸಿಕೊಳ್ಳುವ ಅವಕಾಶ ಕಲ್ಪಿಸಿದೆ. 2020ರ ಅಡಿಲೇಡ್ ಟೆಸ್ಟ್ನಲ್ಲಿ 36 ರನ್ಗಳಿಗೆ ಆಲೌಟ್ ಆದ ಭಾರತ 3 ಆಟಗಾರರಷ್ಟೇ (ಕೊಹ್ಲಿ, ಬುಮ್ರಾ, ಅಶ್ವಿನ್) ಈಗಿನ ತಂಡದಲ್ಲೂ ಇದ್ದಾರೆ.
ಪಿಂಕ್ಬಾಲ್ನಲ್ಲಿ ಆಸೀಸ್ ಪ್ರಾಬಲ್ಯ: ಆಸ್ಟ್ರೆಲಿಯಾ ತಂಡ ಇದುವರೆಗೆ 12 ಅಹರ್ನಿಶಿ ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, ಈ ಪೈಕಿ 11ರಲ್ಲಿ ಗೆದ್ದ ಬಲಿಷ್ಠ ದಾಖಲೆ ಹೊಂದಿದೆ. ವರ್ಷಾರಂಭದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಬ್ರಿಸ್ಬೇನ್ನಲ್ಲಿ ಆಡಿದ ತನ್ನ ಕೊನೇ ಪಿಂಕ್ಬಾಲ್ ಟೆಸ್ಟ್ನಲ್ಲಿ ಆಸೀಸ್ ಸೋಲು ಕಂಡಿತ್ತು.
ತವರಿನ ಡೇ-ನೈಟ್ ಟೆಸ್ಟ್ಗಳಲ್ಲಿ ಭಾರತ ಮೇಲುಗೈ: ಭಾರತ ತಂಡ ಆಸೀಸ್ ನೆಲದಲ್ಲಿ 2020ರಲ್ಲಿ ಆಡಿದ ಏಕೈಕ ಪಿಂಕ್ಬಾಲ್ ಟೆಸ್ಟ್ನಲ್ಲಿ ಸೋತಿದ್ದರೂ, ಅದಕ್ಕೆ ಮುನ್ನ ತವರಿನಲ್ಲಿ ಆಡಿದ ಮೂರೂ ಅಹರ್ನಿಶಿ ಟೆಸ್ಟ್ಗಳಲ್ಲಿ ಗೆದ್ದ ದಾಖಲೆ ಹೊಂದಿದೆ. 2019ರಲ್ಲಿ ಬಾಂಗ್ಲಾ ವಿರುದ್ಧ ಕೋಲ್ಕತದಲ್ಲಿ, 2021ರಲ್ಲಿ ಇಂಗ್ಲೆಂಡ್ ವಿರುದ್ಧ ಅಹಮದಾಬಾದ್ನಲ್ಲಿ ಮತ್ತು 2022ರಲ್ಲಿ ಶ್ರೀಲಂಕಾ ವಿರುದ್ಧ ಬೆಂಗಳೂರಿನಲ್ಲಿ ಭಾರತ ಗೆಲುವು ದಾಖಲಿಸಿತ್ತು. ಅಹರ್ನಿಶಿ ಟೆಸ್ಟ್ನಲ್ಲಿ 2019ರಲ್ಲಿ ಕೋಲ್ಕತದಲ್ಲಿ 9 ವಿಕೆಟ್ಗೆ 347 ರನ್ ಗಳಿಸಿರುವುದೇ ಭಾರತದ ಗರಿಷ್ಠ ಮೊತ್ತವಾಗಿದೆ. ವಿರಾಟ್ ಕೊಹ್ಲಿ ಅಹರ್ನಿಶಿ ಟೆಸ್ಟ್ಗಳಲ್ಲಿ ಭಾರತ ಪರ ಗರಿಷ್ಠ 277 ರನ್ ಬಾರಿಸಿದ ದಾಖಲೆ ಹೊಂದಿದ್ದಾರೆ. ಆರ್. ಅಶ್ವಿನ್ ಗರಿಷ್ಠ 18 ವಿಕೆಟ್ ಕಬಳಿಸಿದ್ದಾರೆ.
ಎಲ್ಲ 22 ಪಂದ್ಯಗಳಲ್ಲಿ ಫಲಿತಾಂಶ!
ಇದುವರೆಗೆ 22 ಅಹರ್ನಿಶಿ ಟೆಸ್ಟ್ ಪಂದ್ಯಗಳು ನಡೆದಿದ್ದು, ಎಲ್ಲ ಪಂದ್ಯಗಳಲ್ಲೂ ಸ್ಪಷ್ಟ ಫಲಿತಾಂಶ ದಾಖಲಾಗಿವೆ. ಈ ಪೈಕಿ 5 ಪಂದ್ಯಗಳಲ್ಲಿ ಮಾತ್ರ 5ನೇ ದಿನದವರೆಗೂ ಆಟ ನಡೆದಿದೆ. 2 ಪಂದ್ಯಗಳು ಎರಡೇ ದಿನಗಳಲ್ಲಿ ಮುಗಿದಿವೆ. ಆಸೀಸ್ 10ಕ್ಕಿಂತ ಅಧಿಕ ಅಹರ್ನಿಶಿ ಟೆಸ್ಟ್ ಆಡಿರುವ ಏಕೈಕ ದೇಶವಾಗಿದೆ.
ಅಡಿಲೇಡ್ನಲ್ಲೇ ಮೊದಲ ಪಿಂಕ್ ಟೆಸ್ಟ್!
ಅಡಿಲೇಡ್ ಅಂಗಣದಲ್ಲೇ 2015ರ ನವೆಂಬರ್ 27ರಿಂದ ಡಿಸೆಂಬರ್ 1ರವರೆಗೆ ಮೊಟ್ಟಮೊದಲ ಅಹರ್ನಿಶಿ ಟೆಸ್ಟ್ ಪಂದ್ಯ ನಡೆದಿತ್ತು. ನ್ಯೂಜಿಲೆಂಡ್ ವಿರುದ್ಧದ ಆ ಪಂದ್ಯದಲ್ಲಿ ಆಸೀಸ್ 3 ವಿಕೆಟ್ಗಳಿಂದ ಗೆದ್ದಿತ್ತು.
ವೇಗದ ಬೌಲಿಂಗ್ ಸ್ನೇಹಿ ಪಿಚ್
ಪಿಂಕ್ಬಾಲ್ ಟೆಸ್ಟ್ಗಳಲ್ಲಿ ಇದುವರೆಗೆ ವೇಗಿಗಳೇ ಪ್ರಾಬಲ್ಯ ಸಾಧಿಸುತ್ತ ಬಂದಿದ್ದಾರೆ. ಈ ಸಲವೂ ಅಡಿಲೇಡ್ನಲ್ಲಿ ಅದೇ ಸಂಪ್ರದಾಯ ಮುಂದುವರಿಯುವ ನಿರೀಕ್ಷೆ ಇದೆ. ಭಾರತ&ಆಸೀಸ್ 2ನೇ ಟೆಸ್ಟ್ಗೆ ಅಡಿಲೇಡ್ನಲ್ಲಿ ಸಿದ್ಧಗೊಂಡಿರುವ ಪಿಚ್ ಇದರ ಮುನ್ಸೂಚನೆಯನ್ನು ನೀಡಿದೆ. ಅಡಿಲೇಡ್ನಲ್ಲಿ ಈ ಹಿಂದೆ ಬ್ಯಾಟರ್ಗಳು ಮೇಲುಗೈ ಸಾಧಿಸಿದ್ದರೂ, ಇಲ್ಲಿ ಪಿಂಕ್ಬಾಲ್ ಟೆಸ್ಟ್ ಆಡಲಾರಂಭಿಸಿದ ಬಳಿಕ ವೇಗಿಗಳ ಸ್ವರ್ಗವಾಗಿ ಮಾರ್ಪಟ್ಟಿದೆ. ಹೊನಲು ಬೆಳಕಿನಲ್ಲಿ ಆಟ ನಡೆದಾಗ ಪಿಂಕ್ಬಾಲ್ ಭಿನ್ನವಾಗಿ ವರ್ತಿಸಿ ವೇಗಿಗಳಿಗೆ ಹೆಚ್ಚಿನ ನೆರವು ಒದಗಿಸಿದೆ. ಮಧ್ಯಾಹ್ನದ ನಂತರ ಆಟ ಶುರುವಾದಾಗ ಬ್ಯಾಟರ್ಗಳಿಗೆ ಅನುಕೂಲವಿದ್ದರೂ, ಸೂರ್ಯ ಮುಳುಗಿದ ಬಳಿಕ ವೇಗಿಗಳೇ ಪ್ರಾಬಲ್ಯ ಸಾಧಿಸಿದ್ದಾರೆ.
ಅಡಿಲೇಡ್ ತಲುಪಿದ ಭಾರತ
ಕ್ಯಾನ್ಬೆರಾದಲ್ಲಿ ಪಿಂಕ್ಬಾಲ್ ಅಭ್ಯಾಸ ಪಂದ್ಯ ಆಡಿದ ಬಳಿಕ ಭಾರತ ತಂಡ 2ನೇ ಟೆಸ್ಟ್ ಪಂದ್ಯಕ್ಕಾಗಿ ಸೋಮವಾರ ಅಡಿಲೇಡ್ ತಲುಪಿದೆ. ಮಂಗಳವಾರದಿಂದ ಭಾರತ ತಂಡ ನೆಟ್ಸ್ ಅಭ್ಯಾಸಕ್ಕಿಳಿಯುವ ನಿರೀಕ್ಷೆ ಇದೆ.
ಅಡಿಲೇಡ್ಗೆ ಗಂಭೀರ್ ಪ್ರಯಾಣ
ಪರ್ತ್ ಟೆಸ್ಟ್ ಬಳಿಕ ಕುಟುಂಬದ ತುರ್ತು ಕಾರಣಗಳಿಂದಾಗಿ ತವರಿಗೆ ಮರಳಿದ್ದ ಭಾರತ ತಂಡದ ಮುಖ್ಯ ಕೋಚ್ ಗೌತಮ್ ಗಂಭೀರ್ ಸೋಮವಾರ ಮತ್ತೆ ಆಸೀಸ್ಗೆ ಪ್ರಯಾಣಿಸಿದ್ದಾರೆ. ಅವರು ಮಂಗಳವಾರ ಅಡಿಲೇಡ್ನಲ್ಲಿ ಭಾರತ ತಂಡವನ್ನು ಕೂಡಿಕೊಳ್ಳಲಿದ್ದಾರೆ. ಭಾರತ ತಂಡದ ಅಭ್ಯಾಸ ಪಂದ್ಯ ತಪ್ಪಿಸಿಕೊಂಡಿದ್ದ ಗಂಭೀರ್, ಅಡಿಲೇಡ್ ಟೆಸ್ಟ್ಗೆ ಭಾರತ ತಂಡದ ಬ್ಯಾಟಿಂಗ್ ಕ್ರಮಾಂಕ ನಿರ್ಧರಿಸುವಲ್ಲಿ ಮಹತ್ವದ ಪಾತ್ರ ವಹಿಸುವ ನಿರೀಕ್ಷೆ ಇದೆ. ರಾಹುಲ್ರನ್ನು ಆರಂಭಿಕರಾಗಿಯೇ ಉಳಿಸಿ, ರೋಹಿತ್ರನ್ನು ಮಧ್ಯಮ ಕ್ರಮಾಂಕದಲ್ಲಿ ಆಡಿಸಲು ಗಂಭೀರ್ ಕೂಡ ಒಲವು ತೋರುವರೇ ಎಂಬ ಕುತೂಹಲವಿದೆ.
ಆಸೀಸ್ ತಂಡದಲ್ಲಿ ಒಡಕು ವರದಿ ನಿರಾಕರಿಸಿದ ಹೆಡ್
ಆಸ್ಟ್ರೆಲಿಯಾ ತಂಡದ ಬ್ಯಾಟರ್ಸ್ ಮತ್ತು ಬೌಲಿಂಗ್ ವಿಭಾಗದ ನಡುವೆ ಒಡಕು ಮೂಡಿದೆ ಎಂಬವರ ವರದಿಯನ್ನು ಬ್ಯಾಟರ್ ಟ್ರಾವಿಸ್ ಹೆಡ್ ಸೋಮವಾರ ತಳ್ಳಿಹಾಕಿದ್ದಾರೆ. ಪರ್ತ್ ಟೆಸ್ಟ್ನ 3ನೇ ದಿನದಾಟದ ಬಳಿಕ ವೇಗಿ ಜೋಶ್ ಹ್ಯಾಸಲ್ವುಡ್ ತಂಡದ ಬ್ಯಾಟರ್ಗಳನ್ನು ದೂರಿದ್ದರು. ಇದರ ಬೆನ್ನಲ್ಲೇ ಆಸೀಸ್ ತಂಡದಲ್ಲಿ ಎರಡು ಗುಂಪುಗಳಿರುವ ವರದಿಯಾಗಿತ್ತು. ಆದರೆ ತಂಡದಲ್ಲಿ ಯಾವುದೇ ಒಡಕು ಇಲ್ಲ. ಬ್ಯಾಟರ್ಗಳು ತಂಡದ ಬೌಲಿಂಗ್ ವಿಭಾಗದ ಬೆಂಬಲ ಬಯಸುತ್ತಾರೆ. ಅದೇ ರೀತಿ ಬೌಲರ್ಗಳೂ ತಂಡದ ಬ್ಯಾಟರ್ಗಳಿಂದ ಉತ್ತಮ ನಿರ್ವಹಣೆಯನ್ನು ಬಯಸುತ್ತಾರೆ ಎಂದು ಹೆಡ್ ಸ್ಪಷ್ಟಪಡಿಸಿದ್ದಾರೆ.