ಶಿಕ್ಷಣದಲ್ಲಿರಲಿ ಧರ್ಮ, ಸಂಸ್ಕೃತಿಯ ಪಾಠ

ಪರ್ಯಾಯ ಪುತ್ತಿಗೆ ಶ್ರೀ ಆಶಯ | ಸಾಂಸ್ಕೃತಿಕ ಕಾರ್ಯಕ್ರಮ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಆಧುನಿಕ ಶಿಕ್ಷಣ ವ್ಯವಸ್ಥೆಯಿಂದ ಮಕ್ಕಳಿಗೆ ಭಾರತೀಯತೆಯ ಜ್ಞಾನ ಲಭಿಸುತ್ತಿಲ್ಲ. ಮಕ್ಕಳಿಗೆ ದೇಸೀಯ ಇತಿಹಾಸ, ಧಾರ್ಮಿಕ ಪ್ರಜ್ಞೆ ನೀಡುವ ಶಿಕ್ಷಣ ಲಭಿಸುತ್ತಿಲ್ಲ. ಇಂದಿನ ಶಿಕ್ಷಣ ವ್ಯವಸ್ಥೆಯಲ್ಲಿ ಧರ್ಮ, ಸಂಸ್ಕೃತಿ, ಸಂಸ್ಕಾರ, ಆಚಾರ, ವಿಚಾರಗಳ ಪರಿಚಯ ಮಾಡಿಸುವಂತಹ ಪಾಠಗಳು ಇರಬೇಕು ಎಂದು ಪರ್ಯಾಯ ಪುತ್ತಿಗೆ ಸುಗುಣೇಂದ್ರ ತೀರ್ಥ ಶ್ರೀಪಾದರು ನುಡಿದರು.

ಉಡುಪಿಯ ಭಂಡಾರಕೇರಿ ಮಠದ ವಿದ್ಯೇಶ ತೀರ್ಥ ಶ್ರೀಪಾದರ 45ನೇ ಚಾತುರ್ಮಾಸ್ಯ ಮಹೋತ್ಸವದ ನಿಮಿತ್ತ ರಥಬೀದಿಯ ಭಂಡಾರಕೇರಿ ಮಠದಲ್ಲಿ ಶನಿವಾರ ಆಯೋಜಿಸಿದ್ದ ಸಾಂಸ್ಕೃತಿಕ ಕಾರ್ಯಕ್ರಮ ಹಾಗೂ ಭಾಗವತ ಪ್ರೋಷ್ಠಪದಿ ಪ್ರವಚನ ಉದ್ಘಾಟಿಸಿ ಮಾತನಾಡಿದರು.

ಸಂಸಾರದ ಮೋಹ

ಬ್ರಾಹ್ಮಣ, ತೌಳವ ಸಮಾಜ ಸಂಸಾರದ ಮೋಹಕ್ಕೆ ಮರುಳಾಗುತ್ತಿದ್ದಾರೆ. ಅದರಿಂದ ಜನಸಂಖ್ಯೆಯೂ ಕ್ಷೀಣಿಸುತ್ತಲಿದೆ. ನಮ್ಮ ಸಂಸ್ಕೃತಿಯ ರಕ್ಷಣೆಗೆ ಈಗಲೇ ಚಿಂತನೆ, ಕಾರ್ಯಯೋಜನೆ ಮಾಡಬೇಕು. ಇಲ್ಲದಿದ್ದಲ್ಲಿ ಭವಿಷ್ಯದಲ್ಲಿ ಗಂಡಾಂತರ ಎದುರಾಗಲಿದೆ. ಸನ್ಯಾಸಿಗಳು ಕೇವಲ ಜಪ, ಪೂಜೆ, ಭಿಕ್ಷೆಗೆ ಸೀಮಿತವಾಗದೆ ಸಮಾಜದ ಉದ್ಧಾರಕ್ಕೂ ಶ್ರಮಿಸಬೇಕು ಎಂದರು.

ಎಲ್ಲಡೆ ರಕ್ತಪಾತ

ಭಂಡಾರಕೇರಿ ಮಠದ ವಿದ್ಯೇಶ ತೀರ್ಥ ಶ್ರೀಪಾದರು ಆಶೀರ್ವಚನ ನೀಡಿ, ಸಂವಿಧಾನದತ್ತ ಗೋರಕ್ಷಣೆಯ ಕೆಲಸ ಪ್ರಾಮಾಣಿಕವಾಗಿ ನಡೆಯುತ್ತಿಲ್ಲ. ಹೀಗಾಗಿ ಎಲ್ಲಡೆ ರಕ್ತಪಾತವಾಗುತ್ತಿದೆ. ಭಗವದ್ಗೀತೆಯೆಂಬ ಕ್ಷೀರ, ಭಾಗವತವೆಂಬ ಹಣ್ಣು ಸೇವಿಸಿ ಆತ್ಮ ದಷ್ಟ-ಪುಷ್ಟವಾಗಬೇಕು. ಭಗವಂತ ಹೃದಯ ಭಕ್ತಿಗೆ ಮಾತ್ರ ಒಲಿಯುತ್ತಾನೆ. ಆಡಂಬರದ ಭಕ್ತಿ ಅವನಿಗೆ ಬೇಕಾಗಿಲ್ಲ ಎಂದರು.

ಉಡುಪಿ ಶಾಸಕ ಯಶಪಾಲ್​ ಸುವರ್ಣ, ಕರ್ಣಾಟಕ ಬ್ಯಾಂಕ್​ನ ಡಿಜಿಎಂ ರಾಜಗೋಪಾಲ ಭಟ್​ ಮಾತನಾಡಿದರು.

ಪುತ್ತಿಗೆ ಕಿರಿಯ ಶ್ರೀ ಸುಶ್ರೀಂದ್ರ ತೀರ್ಥ ಶ್ರೀಪಾದರು, ಉಡುಪಿ ಜಿಲ್ಲಾ ಯುವ ಬ್ರಾಹ್ಮಣ ಪರಿಷತ್​ನ ಅಧ್ಯಕ್ಷ ಕೆ. ಚಂದ್ರಕಾಂತ್​ ಉಪಸ್ಥಿತರಿದ್ದರು.

ಅಮೃತಾ ಶೀರೂರು ಪ್ರಾರ್ಥಿಸಿದರು. ನಾಗೇಂದ್ರ ಆಚಾರ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಪೆರಂಪಳ್ಳಿ ವಾಸುದೇವ ಭಟ್​ ನಿರೂಪಿಸಿದರು. ವಿಷ್ಣುಪ್ರಸಾದ್​ ಪಾಡಿಗಾರು ವಂದಿಸಿದರು.