ಗುವಾಹಟಿ: ಆಸ್ಸಾಂನಲ್ಲಿ ಇಂದು ಎಂಟು ಉಗ್ರ ಸಂಘಟನೆಗಳ ಒಟ್ಟು 644 ಉಗ್ರರು ಶರಣಾಗಿದ್ದಾರೆ. ತಮ್ಮ ಶಸ್ತ್ರಾಸ್ತ್ರಗಳನ್ನು ಔಪಚಾರಿಕವಾಗಿ ಪೊಲೀಸರಿಗೆ ಒಪ್ಪಿಸಿದ್ದಾರೆ.
ಯುಎಲ್ಎಫ್ಎ(ಐ), ಎನ್ಡಿಎಫ್ಬಿ, ಆರ್ಎನ್ಎಲ್ಎಫ್, ಕೆಎಲ್ಒ, ಸಿಪಿಐ(ಮಾವೋವಾದಿ), ಎನ್ಎಸ್ಎಲ್ಎ, ಎಡಿಎಫ್ ಮತ್ತು ಎನ್ಎಲ್ಎಫ್ಬಿ ಸಂಘಟನೆಗಳ ಉಗ್ರರು ಇಂದು ಮುಖ್ಯಮಂತ್ರಿ ಸರ್ಬಾನಂದ ಸೊನೊವಾಲ್ ಸಮ್ಮುಖದಲ್ಲಿ ಶರಣಾಗಿದ್ದಾರೆ.
ಈ ಬಗ್ಗೆ ಮಾತನಾಡಿದ ಸಿಎಂ, ಆಸ್ಸಾಂನ ಅಭಿವೃದ್ಧಿಗಾಗಿ ಮುಖ್ಯವಾಹಿನಿಗೆ ಬರಲು ನಿರ್ಧರಿಸಿರುವ ಈ ಉಗ್ರಸಂಘಟನೆಗಳ ಸದಸ್ಯರ ಬಗ್ಗೆ ಇಲ್ಲಿನ ಜನರು ಸಂತೋಷ ವ್ಯಕ್ತಪಡಿಸಿದ್ದಾರೆ. ಇವರಂತೆಯೇ ಉಳಿದ ಉಗ್ರ, ಮಾವೋವಾದಿ ಸಂಘಟನೆಗಳೂ ಹೆಚ್ಚೆಚ್ಚು ಹೊರಬರಬೇಕು. ಶರಣಾಗುವ ಮೂಲಕ ಮುಖ್ಯವಾಹಿನಿಗೆ ಬಂದು ಈ ದೇಶವನ್ನು ಬಲಿಷ್ಠಗೊಳಿಸಬೇಕು ಎಂದು ಹೇಳಿದರು.
ಶರಣಾಗಿರುವ ಉಗ್ರರ ಪುನವರ್ಸತಿ, ಜೀವನಕ್ಕಾಗಿ ಸರ್ಕಾರ ಸಂವಿಧಾನ ಬದ್ಧವಾಗಿ ಕ್ರಮ ಕೈಗೊಳ್ಳಲಿದೆ. ಇವರೆಲ್ಲ ಸರ್ಕಾರದ ಯೋಜನೆಗಳ ಲಾಭವನ್ನು ಇನ್ನು ಮುಂದೆ ಪಡೆಯಬಹುದು ಎಂದರು.
ಶರಣಾದ 644 ಮಂದಿ ಉಗ್ರರಲ್ಲಿ ಅತಿಹೆಚ್ಚು ಅಂದರೆ 301 ಉಗ್ರರು ಎನ್ಎಲ್ಎಫ್ಬಿ (ನ್ಯಾಷನಲ್ ಲಿಬರೇಶನ್ ಫ್ರಂಟ್ ಆಫ್ ಬೆಂಗಾಲ್) ಗೆ ಸೇರಿದವರು ಎನ್ನಲಾಗಿದೆ. (ಪಿಟಿಐ)