ದೇಶವೇ ಮೋದಿಗೆ ಪರಿವಾರವಾದರೆ, ರಾಜ್ಯದ ಕೆಲವರಿಗೆ ಕುಟುಂಬವೇ ಪರಿವಾರ ಎಂದು ಎಸ್​ಎಂ ಕೃಷ್ಣ ಕುಟುಕಿದ್ದು ಯಾರಿಗೆ?

ಶಿವಮೊಗ್ಗ: ಇಡೀ ದೇಶವೇ ಪ್ರಧಾನಿ ನರೇಂದ್ರ ಮೋದಿಗೆ ಪರಿವಾರವಾಗಿದೆ. ಆದರೆ, ರಾಜ್ಯದಲ್ಲಿರುವ ಕೆಲವರಿಗೆ ಕುಟುಂಬವೇ ಪರಿವಾರವಾಗಿದೆ ಎಂದು ಮಾಜಿ ಸಿಎಂ ಎಸ್​.ಎಂ.ಕೃಷ್ಣ ಅವರು ಮಾಜಿ ಪ್ರಧಾನಿ ಎಚ್​.ಡಿ.ದೇವೇಗೌಡರ ವಿರುದ್ಧ ವಾಗ್ದಾಳಿ ನಡೆಸಿದರು.

ಶಿವಮೊಗ್ಗದಲ್ಲಿ ಮಾತನಾಡಿದ ಅವರು, ರಾಜ್ಯದಲ್ಲಿರುವ ಕೆಲವರಿಗೆ ಕುಟುಂಬವೇ ಪರಿವಾರ. ಮಕ್ಕಳು, ಮೊಮ್ಮಕ್ಕಳು‌, ‌ಅಳಿಯಂದಿರೇ ಪರಿವಾರವಾಗಿದೆ ಎಂದು ಮಾಜಿ ಪ್ರಧಾನಮಂತ್ರಿ ಎಚ್​.ಡಿ.ದೇವೇಗೌಡರ ಹೆಸರೇಳದೆ ವಾಗ್ದಾಳಿ ನಡೆಸಿದರು.

ಬಾಲಾಕೋಟ್ ದಾಳಿಯಲ್ಲಿ ಎಷ್ಟು ಜನ ಸತ್ತರು? ಎಂದು ಸೇನೆಯ ಸಾಹಸವನ್ನು ವಿಪಕ್ಷ ನಾಯಕರು ಪ್ರಶ್ನಿಸುತ್ತಾರೆ. 2ನೇ ಮಹಾಯುದ್ಧ ಆದಾಗ ಎಷ್ಟು ಜನ ಸತ್ತರು? ಎಂದು ಯಾರಾದರೂ ಕೇಳಿದ್ದಾರಾ? ಕೆಲವರು ಸೇನೆಯ ಬಗ್ಗೆ ಹುಡುಗಾಟಿಕೆಯ ಮಾತುಗಳನ್ನಾಡುತ್ತಾರೆ ಎಂದು ವಿಪಕ್ಷ ನಾಯಕರ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.

ಬಿಜೆಪಿ ಕಾರ್ಯಕರ್ತರ ಮುಖ ನರೇಂದ್ರ ಮೋದಿಯಾಗಿದ್ದು, ಸ್ಥಳೀಯ ಅಭ್ಯರ್ಥಿಗೂ ಕೂಡ ಮುಖ ಇದೆ. ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ರಾಘವೇಂದ್ರ ಅವರು ಸಂಸದರಾಗಿ ಉತ್ತಮ ಕೆಲಸ ಮಾಡಿದ್ದಾರೆ. ಹಾಗೂ ರಾಘವೇಂದ್ರ ಅವರು ಸುಲಭವಾಗಿ ಸಿಗುವ ಒಬ್ಬ ಪ್ರತಿನಿಧಿಯಾಗಿದ್ದಾರೆ ಎಂದರು.

ಶಿವಮೊಗ್ಗದಲ್ಲಿ ಯಡಿಯೂರಪ್ಪ- ಈಶ್ವರಪ್ಪ ಜೋಡೆತ್ತುಗಳು ಎಂದ ಅವರು, ಅವರಿಗೆ ಜನರು ಆಶೀರ್ವಾದ ಮಾಡಿದ್ದಾರೆ. ಇಬ್ಬರಲ್ಲೂ ಹೊಂದಾಣಿಕೆ ಇದ್ದು, ಒಬ್ಬರು ಗರಂ ಆದಾಗ ಇನ್ನೊಬ್ಬರು ಸೈಲೆಂಟ್ ಆಗಿರುತ್ತಾರೆ. ಇದೇ ಅವರಿಬ್ಬರ ರಾಜಕೀಯ ಯಶಸ್ಸಿನ ಗುಟ್ಟು ಎಂದರು.(ದಿಗ್ವಿಜಯ ನ್ಯೂಸ್​)

Leave a Reply

Your email address will not be published. Required fields are marked *