ತುಮಕೂರು: ಚಿಕ್ಕನಾಯಕನಹಳ್ಳಿ ತಾಲೂಕು ಮತಿಘಟ್ಟದ ಕೈಮರದಲ್ಲಿ ನಿರ್ಮಿಸಿರುವ ವಿದ್ಯುತ್ ಉಪಸ್ಥಾವರಕ್ಕೆ ಏಕಮಖ ಪ್ರಸರಣ ಮಾರ್ಗಕ್ಕೆ ಅಗತ್ಯವಾದ ಭೂಮಿಯನ್ನು ಯಾವುದೇ ಪರಿಹಾರ ನೀಡದೆ ವಶಪಡಿಸಿಕೊಂಡು ಟವರ್ ನಿರ್ಮಿಸಿರುವ ಕೆಪಿಟಿಸಿಎಲ್ಗೆ ಹೈಕೋರ್ಟ್ ಆದೇಶ ಬ್ರೇಕ್ ಹಾಕಿದೆ.
ಕರ್ನಾಟಕ ವಿದ್ಯುತ್ ಪ್ರಸರಣ ನಿಗಮ ನೂರಾರು ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸುತ್ತಿರುವ ಹಂದನಕೆರೆ ಉಪಸ್ಥಾವರದಿಂದ ಮತಿಟ್ಟ ಸ್ಥಾವರಕ್ಕೆ ವಿದ್ಯುತ್ ಮಾರ್ಗಕ್ಕೆ 7.7ಕಿಮೀ ಉದ್ದದ ಮಾರ್ಗಕ್ಕೆ ರೈತರ ಭೂಮಿಗೆ ಪರಿಹಾರ ನೀಡದೆ ಭೂಮಿ ಪಡೆಯಲಾಗಿದ್ದ ಬಗ್ಗೆ ರೈತರು ಮತ್ತು ಕೆಪಿಟಿಸಿಎಲ್ ನಡುವೆ ಸಂರ್ಷಕ್ಕೆ ಕಾರಣವಾಗಿದೆ. ಹಂದನಕೆರೆ, ಹುಚ್ಚನಹಳ್ಳಿ, ಸೋರಲಮಾವು, ಬಂದ್ರೆಹಳ್ಳಿ, ಮತಿಟ್ಟ, ಮಲ್ಲಿಗೆರೆ ಮತ್ತಿತರ ಗ್ರಾಮಗಳ ನೂರಾರು ರೈತರ ಜಮೀನುಗಳಿಗೆ ನಯಾಪೈಸೆ ಪರಿಹಾರ ನೀಡದೆ ಈಗಾಗಲೇ 34 ಟವರ್ಗಳನ್ನು ನಿರ್ಮಿಸಲಾಗಿದ್ದು, ಬಹುತೇಕ ಕಾಮಗಾರಿ ಪೂರ್ಣಗೊಂಡಿದೆ. ಈ ಬಗ್ಗೆ ಸಂತ್ರಸ್ಥ ರೈತರು ಹೈಕೋರ್ಟ್ ಮೆಟ್ಟಿಲೇರಿದ್ದು, ನ್ಯಾಯಾಧೀಶರಾದ ಕೆ.ಎಸ್.ಹೇಮಲೇಖ ಅವರಿದ್ದ ಏಕಸದಸ್ಯ ಪೀಠ ಮುಂದಿನ ವಿಚಾರಣೆವೆರಗೂ ಯಾವುದೇ ಕಾಮಗಾರಿ ನಡೆಸದಂತೆ ಆದೇಶಿಸಿದೆ.
ಟವರ್ ನಿರ್ಮಿಸಲು ಮತಿಟ್ಟ ಹಾಗೂ ಮಲ್ಲಿಗೆರೆಯ ರೈತರು ಆಕ್ಷೇಪ ವ್ಯಕ್ತಪಡಿಸಿ ನ್ಯಾಯಾಲಯಕ್ಕೆ ಮೆಟ್ಟಿಲೇರಿದ್ದರು ತೀರ್ಪು ಪ್ರಕಟವಾಗುವ ಮುನ್ನವೇ ಪೊಲೀಸ್ ನಿಲ್ಲಿಸಿಕೊಂಡು ತರಾತುರಿಯಲ್ಲಿ ಕಾಮಗಾರಿ ಪೂರ್ಣಗೊಳಿಸಲು ತುಮಕೂರು ಜಿಲ್ಲಾಧಿಕಾರಿ ಸೂಚಿಸಿದ್ದರು.
ಕಾಮಗಾರಿ ಪೂರ್ಣಗೊಂಡರೂ ನಯಾಪೈಸೆ ಪರಿಹಾರ ನೀಡದ ಕೆಪಿಟಿಸಿಎಸ್ ವಿರುದ್ಧ ಆಕ್ರೋಶಗೊಂಡಿರುವ ರೈತರು ನ್ಯಾಯಕ್ಕಾಗಿ ಹೈಕೋರ್ಟ್ಗೆ ಮೇಲ್ಮನವಿ ಸಲ್ಲಿಸಿದ್ದು ವಿಚಾರಣೆ ಕೈಗೆತ್ತಿಕೊಂಡಿರುವುದು ಭೂಮಿ, ಬೆಳೆ ಕಳೆದುಕೊಂಡ ರೈತರಿಗೆ ತುಸು ನೆಮ್ಮದಿ ಸಿಕ್ಕಂತಾಗಿದೆ.
ಪೊಲೀಸರ ಲಾಠಿ ತೋರಿಸಿ ರೈತರನ್ನು ಹೆದರಿಸಿ ಕಾಮಗಾರಿ ನಡೆಸಿರುವ ಕೆಪಿಟಿಸಿಎಲ್ ವಿರುದ್ಧ ನ್ಯಾಯಾಲಯದ ಸಲ್ಲಿಸಿದ್ದ ಮನವಿ ಆಲಿಸಿದ ನ್ಯಾಯಾಧೀಶರು ಮುಂದಿನ ವಿಚಾರಣೆವರೆಗೂ ಯಥಾಸ್ಥಿತಿ ಕಾಯ್ದು ಕೊಳ್ಳುವಂತೆ, ರೈತರ ಬೆಳೆ ಹಾಳು ಮಾಡದಂತೆ ಆದೇಶ ನೀಡಿರುವುದು ನೆಮ್ಮದಿ ಸಿಕ್ಕಿದೆ.
ಯೋಗೇಶ್ ಸಂತ್ರಸ್ಥ, ಮತಿಘಟ್ಟ
