ಹೆಗ್ಗಡೆಯವರಿಂದ 10 ಪೀಳಿಗೆಯ ಸಾಧನೆ: ಡಾ.ವಿಜಯ ಸಂಕೇಶ್ವರ

ವಿಜಯವಾಣಿ ಸುದ್ದಿಜಾಲ ಮಂಗಳೂರು
ದೇವರ ಪೂಜೆಯಂತೆ ಸಣ್ಣಪುಟ್ಟ ಕೆಲಸವನ್ನೂ ಶ್ರದ್ಧೆಯಿಂದ ಮಾಡುವವರು ದೊಡ್ಡ ಸಾಧಕರಾಗುತ್ತಾರೆ ಎಂದು ವಿಆರ್‌ಎಲ್ ಸಮೂಹ ಸಂಸ್ಥೆಗಳ ಅಧ್ಯಕ್ಷ ಡಾ.ವಿಜಯ ಸಂಕೇಶ್ವರ ಅಭಿಪ್ರಾಯಪಟ್ಟರು.

ಶ್ರೀಕ್ಷೇತ್ರ ಧರ್ಮಸ್ಥಳ ಲಕ್ಷದೀಪೋತ್ಸವ ಅಂಗವಾಗಿ ಗುರುವಾರ ಸಾಹಿತ್ಯ ಸಮ್ಮೇಳನದ 86ನೇ ಅಧಿವೇಶನ ಉದ್ಘಾಟಿಸಿ ಮಾತನಾಡಿದರು.

ನಾನು 50 ವರ್ಷಗಳಿಂದ ಡಾ.ಹೆಗ್ಗಡೆಯವರನ್ನು ಗಮನಿಸುತ್ತಾ ಬಂದಿದ್ದೇನೆ. ಅವರನ್ನು ತಿಳಿದುಕೊಳ್ಳುವುದು ಸಾಧ್ಯವಾಗಿಲ್ಲ. ಸಾಹಿತ್ಯ, ಕಲಾಸೇವೆ, ಶೈಕ್ಷಣಿಕವಾಗಿ ಆಯುರ್ವೇದ, ಇಂಜಿನಿಯರಿಂಗ್, ಡೆಂಟಲ್ ಕಾಲೇಜು ಹುಟ್ಟುಹಾಕಿದ್ದರಿಂದ ತೊಡಗಿ ವಸ್ತುಸಂಗ್ರಹಾಲಯ ಇರಬಹುದು, ಕಾರುಗಳ ಅಪಾರ ಸಂಗ್ರಹ ಇರಬಹುದು, ಫೋಟೊಗ್ರಫಿ ಹವ್ಯಾಸದವರೆಗೂ ಹೆಗ್ಗಡೆಯವರ ಆಸಕ್ತಿ ವಿಸ್ತಾರವಾಗುತ್ತಲೇ ಇದೆ. ಅವರ ಬಗ್ಗೆ ಸಾಕಷ್ಟು ಮಂದಿ ಬರೆದಿರಬಹುದಾದರೂ ಅದರಲ್ಲಿ ಅವರನ್ನು ಸಮಗ್ರವಾಗಿ ಕಟ್ಟಿಕೊಡಲು ಸಾಧ್ಯವಾಗದು. 10 ಪೀಳಿಗೆಯವರ ಸಾಧನೆಯನ್ನು ಏಕಾಂಗಿಯಾಗಿ ಮಾಡಿದ್ದಾರೆ ಎಂದು ಶ್ಲಾಘಿಸಿದರು.

ಸರ್ಕಾರಗಳ ಯೋಜನೆಗಳು ಹಲವೆಡೆ ದುರುಪಯೋಗ ಆಗುತ್ತಿರುವ ಕಾಲದಲ್ಲಿ ಧರ್ಮಸ್ಥಳದಲ್ಲಿ ಅನಕ್ಷರಸ್ಥರಿಗೂ ಸಾಲ ಕೊಟ್ಟು ಅವರನ್ನು ಸ್ವಾವಲಂಬಿ ಆಗಿ ರೂಪಿಸುವ ಮಹತ್ಕಾರ್ಯ ಕೈಗೊಂಡಿರುವುದಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ರೈತರು ವಿದೇಶಿ ಪದ್ಧತಿಯಲ್ಲಿ ವ್ಯವಸಾಯ ಮಾಡುವುದಕ್ಕೆ ಹೋಗಿ ಕಷ್ಟಕ್ಕೀಡಾಗಿದ್ದಾರೆ, ರಾಸಾಯನಿಕ ಬಳಕೆಯಿಂದ ವಿಷಯುಕ್ತ ಆಹಾರವನ್ನು ಜನರಿಗೆ ನೀಡುವ ಜತೆಗೆ ತಾವೂ ವಿಷಸೇವಿಸಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವ ವಿಷಾದನೀಯ ಪರಿಸ್ಥಿತಿಯಲ್ಲಿ ನಾವಿದ್ದೇವೆ. ಇನ್ನೊಂದೆಡೆ ಸಮಾಜದಲ್ಲಿ ವ್ಯಸನಗಳಿಂದಾಗಿ ಜನ ದಾರಿ ತಪ್ಪುತ್ತಿದ್ದಾರೆ. ಇಂತಹವರಿಗೆ ಮಾರ್ಗದರ್ಶನ ನೀಡಿ ಸ್ವಾವಲಂಬಿ ಬದುಕು ಕಟ್ಟಿಕೊಡುವಲ್ಲಿ ಡಾ.ಹೆಗ್ಗಡೆಯವರು ಅಭಿನಂದನಾರ್ಹ ಸಾಧನೆ ಮಾಡಿದ್ದಾರೆ. ಧರ್ಮಸ್ಥಳಕ್ಕೆ ಬಂದು ಯಾತ್ರಿಗಳು ಕೇವಲ ಬಂದು ಹೋಗುವುದಲ್ಲ. ಇಲ್ಲಿಂದ ಕಲಿತು ಬದುಕು ಬದಲಾಯಿಸಿಕೊಂಡು ಜೀವನ ಸುಂದರಗೊಳಿಸಬೇಕು ಎಂದು ಹೇಳಿದರು.

ಈ ಸಂದರ್ಭ ಡಾ.ಹೆಗ್ಗಡೆಯವರ ಬದುಕು- ಸಾಧನೆ ಪರಿಚಯಿಸುವ ಸುವರ್ಣ- ಸಂಚಯ ಪುಸ್ತಕವನ್ನು ಡಾ.ವಿಜಯ ಸಂಕೇಶ್ವರ ಬಿಡುಗಡೆ ಮಾಡಿದರು.

ವಿಜಯವಾಣಿ ಅಂಕಣಗಾರ್ತಿ ಕವಿತಾ ಅಡೂರು, ನಟ ನಿರ್ದೇಶಕ, ನಿರ್ಮಾಪಕ ಡಾ.ಅಬ್ದುಲ್ ರೆಹಮಾನ್ ಪಾಷಾ, ದ.ಕ ಜಿಲ್ಲಾ ಎಸ್ಪಿ ಡಾ.ಬಿ.ಆರ್.ರವಿಕಾಂತೇಗೌಡ ಉಪನ್ಯಾಸ ನೀಡಿದರು. ಧರ್ಮಸ್ಥಳದ ಡಿ.ಹರ್ಷೇಂದ್ರ ಕುಮಾರ್ ಉಪಸ್ಥಿತರಿದ್ದರು.

ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಸ್ವಾಗತಿಸಿದರು. ರಾಮಚಂದ್ರ ಎಂ. ಕಾರ್ಕಳ ಕಾರ್ಯಕ್ರಮ ನಿರೂಪಿಸಿದರು. ರುಡ್‌ಸೆಟ್ ನಿರ್ದೇಶಕ ವಿನಯ್ ಕುಮಾರ್ ಸಿ. ವಂದಿಸಿದರು.

ಭಿನ್ನಮತ ಕೇಡಲ್ಲ, ಸಹಜ: ಭಿನ್ನಮತ ಎನ್ನುವುದನ್ನು ಸಮಾಜ ದೌರ್ಬಲ್ಯ ಅಥವಾ ಕೇಡು ಎಂದು ಭಾವಿಸುವುದು ಸರಿಯಲ್ಲ. ಬದಲಾಗಿ ಅದು ಇನ್ನೊಂದು ಯೋಚನಾ ಕ್ರಮ ಎಂದು ಯೋಚಿಸಿದಾಗ ಮಾತ್ರ ಸಾಹಿತ್ಯ ಮಾನವಿಕ ಶಿಕ್ಷಣವನ್ನು ಒದಗಿಸುತ್ತದೆ ಎಂದು ಅಧ್ಯಕ್ಷತೆ ವಹಿಸಿದ್ದ ಹಿರಿಯ ವಿಮರ್ಶಕ ಪ್ರೊ. ಟಿ.ಪಿ.ಅಶೋಕ ಅವಲೋಕಿಸಿದರು. ಬದುಕಿನಲ್ಲಿ ಅಥವಾ ಸಾಹಿತ್ಯದಲ್ಲಿ ಯೆಸ್(ಹೌದು) ಹಾಗೂ ಬಟ್(ಆದರೆ) ಇವೆರಡು ಇದ್ದಾಗ ಮಾತ್ರ ಇತರ ಯೋಚನಾ ಕ್ರಮಗಳನ್ನು ಗೌರವಿಸುವ ವಾತಾವರಣ ಇರುತ್ತದೆ ಎಂದರು.

ಮಾತುಗಳೇ ಹಿಂಸೆಯಾಗಿರುವ ಕಾಲಘಟ್ಟವಿದು. ವಿದ್ಯುನ್ಮಾನ ಮಾಧ್ಯಮಗಳ ಚರ್ಚೆಯಲ್ಲಿ, ಪತ್ರಿಕೆಗಳ ಲೇಖನಗಳಲ್ಲಿ ಗಮನಿಸಿದರೆ ಹಿಂಸೆ ಕಾಣುತ್ತದೆ. ಒಂದು ಕಾಲದಲ್ಲಿ ಕತೆ ಹೇಳುವುದೇ ಪುಣ್ಯದ ಕೆಲಸವಾಗಿತ್ತು. ಆದರೆ ಈಗ ಮಾತು ಎಂಬುದು ಹಿಂಸೆ ಆಗಿದೆ. ಆಧುನಿಕ ಪತ್ರಿಕೋದ್ಯಮ ನಮ್ಮ ದೌರ್ಬಲ್ಯವನ್ನು ಬಂಡವಾಳ ಮಾಡಿಕೊಳ್ಳುತ್ತಿದೆ. ಪರರ ನಿಂದೆಯಲ್ಲಿ ವಿಕೃತ ಸಂತೋಷವನ್ನು ಪಡೆಯುತ್ತಿದೆ. ಸಾಹಿತ್ಯ ಕೂಡ ಅದೇ ಹಾದಿಯಲ್ಲಿ ಸಾಗಬಾರದು. ಆರೋಗ್ಯಕರ ವಿಚಾರಗಳಿಂದ ಸಾಹಿತ್ಯ ಗಟ್ಟಿಗೊಳ್ಳಬೇಕು. ಆಗ ಸಾಹಿತ್ಯಕ್ಕೆ ಪ್ರಸ್ತುತತೆ ಬರಲು ಸಾಧ್ಯ ಎಂದು ಅವರು ವಿಶ್ಲೇಷಿಸಿದರು.

ವಿದ್ಯುನ್ಮಾನ ಮಾಧ್ಯಮಗಳು ಬಂದ ಬಳಿಕ ಓದುಗರನ್ನು ಕಳೆದುಕೊಳ್ಳುತ್ತಿದ್ದೇವೆ ಎಂಬ ಭೀತಿ ಸರಿಯಲ್ಲ. ವಾಸ್ತವದಲ್ಲಿ ಸಾಹಿತ್ಯ ಹಿಂದಿಗಿಂತ ಈಗ ಬಲಿಷ್ಠವಾಗಿದೆ. ಸಾಹಿತ್ಯ ವಿಮರ್ಶೆ ಎಂಬುದು ಜಗಳ ಆಗಬಾರದು. ತಾನು ಹೇಳಿದ್ದೇ ಸರಿ ಎಂದಾದರೆ ಅದು ಮೂಲಭೂತವಾದ ಆಗುತ್ತದೆ. ಸಂವಾದದಲ್ಲಿ ಸಮಾನತೆ, ಆರೋಗ್ಯ ಪೂರ್ಣ ಚರ್ಚೆ ನಡೆದಾಗ ಮಾತ್ರ ಅಂತಹ ಸಾಹಿತ್ಯಾನುಭವ ಹಾಗೂ ಅದರ ಅಧ್ಯಯನ ಸಾರ್ಥಕ ಪಡೆದುಕೊಳ್ಳುತ್ತದೆ ಎಂದು ಅವರು ಹೇಳಿದರು.

ಕಲೆ, ವಿಜ್ಞಾನ, ಸಾಹಿತ್ಯ ಒಲವು
ಇರುವವರಲ್ಲಿ ಸಮತೂಕದ ವ್ಯಕ್ತಿತ್ವ: ಹೆಚ್ಚು ಧಾರ್ಮಿಕನಾದವ, ಕಲೆ ಸಾಹಿತ್ಯ, ವಿಜ್ಞಾನದ ಬಗ್ಗೆ ಹೆಚ್ಚು ಒಲವು ಹೊಂದಿರುವವನಲ್ಲಿ ಸಮತೂಕದ ವ್ಯಕ್ತಿತ್ವ ನಿರ್ಮಾಣಗೊಂಡಿರುತ್ತದೆ. ಅದಕ್ಕಾಗಿ ಧರ್ಮ- ವಿಜ್ಞಾನ- ಸಾಹಿತ್ಯಗಳ ಸಂಗಮ ಮಹತ್ವ ಪಡೆದುಕೊಂಡಿದೆ ಎಂದು ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಹೇಳಿದರು. ಧರ್ಮ ಕೂಡ ಸಾಹಿತ್ಯವನ್ನು ತನ್ನ ಪ್ರಸಾರದ ಮಾಧ್ಯಮವಾಗಿ ಬಳಸಿಕೊಂಡಿತ್ತು ಹಾಗೂ ಸಾಹಿತ್ಯದ ಮೂಲಕ ಧರ್ಮ ಜನರ ಮನೆಮನಗಳನ್ನು ಪ್ರವೇಶಿಸಲು ಸಾಧ್ಯವಾಯಿತು ಎಂದರು.

ಒಂದು ಮರ ಸೊಗಸಾಗಿ ಕಾಣಲು ಬೇರು ಆಳವಾಗಿ ಹೋಗಿರಬೇಕು. ಆಗ ಅದರಲ್ಲಿ ಹೊಸ ಚಿಗುರು ಮೊಳೆಯುತ್ತದೆ. ಅದೇ ರೀತಿ ಹಿರಿಯರಿಂದ ಬಂದ ತತ್ವಗಳನ್ನು ಇಂದಿನ ಜಗತ್ತಿಗೆ ಹೊಂದಿಸಿಕೊಂಡರೆ ಅದೇ ಧರ್ಮ ಎನಿಸಿಕೊಳ್ಳುತ್ತದೆ. ಅನಾದಿಕಾಲದಿಂದ ಬಂದ ಋಷಿಗಳ ದಿಕ್ಕುಗಳನ್ನು ನಮ್ಮ ಇಂದಿನ ವಿಜ್ಞಾನ ಕಲೆಗಳಿಗೆ ಹೊಂದಿಸಿಕೊಂಡರೆ ಜನಜೀವನಕ್ಕೆ ಯಶಸ್ಸು ಕಟ್ಟಿಟ್ಟ ಬುತ್ತಿ ಎಂದು ಹೇಳಿದರು.

ಕೊಡಗಿಗೆ 10 ಕೋಟಿ ರೂ. ನೆರವು: ರಾಜ್ಯದ ಹಲವೆಡೆ ಅತಿವೃಷ್ಟಿ ಆಗಿರುವುದು ಒಂದೆಡೆಯಾದರೆ 24 ಕಡೆಗಳಲ್ಲಿ ಬರಗಾಲ ಇರುವುದು ಬೇಸರದ ವಿಚಾರ. ನಾವು ಶ್ರೀಕ್ಷೇತ್ರ ಹಾಗೂ ಗ್ರಾಮಾಭಿವೃದ್ಧಿ ಯೋಜನೆ ಸಿಬ್ಬಂದಿ ಮುಖ್ಯಮಂತ್ರಿ ಪರಿಹಾರ ನಿಧಿಗೆ ಕೊಡಗಿಗೆ 2 ಕೋಟಿ ರೂ. ಅನುದಾನ ನೀಡಿದ್ದು, ಕೊಡಗಿನಲ್ಲಿ ಮನೆಗಳ ಪುನಃ ನಿರ್ಮಾಣಕ್ಕೆ ಮತ್ತೆ 8 ಕೋಟಿ ರೂ. ನೆರವು ನೀಡಲಾಗುವುದು ಎಂದು ಡಾ.ಹೆಗ್ಗಡೆ ತಿಳಿಸಿದರು. ಕೊಡಗಿನಲ್ಲಿ ಹಾನಿಗೀಡಾಗಿರುವ 1044 ಮನೆಗಳ ಪುನಃ ನಿರ್ಮಾಣಕ್ಕೆ ಸಹಕಾರ ನೀಡುತ್ತಿದ್ದೇವೆ. ಕೊಡಗಿಗೆ ಪೂರ್ಣ ನೆರವು ನೀಡುತ್ತಿದ್ದೇವೆ ಎಂದರು.

ಸಂಕೇಶ್ವರ ಸಾಧನೆಗೆ ಹೆಗ್ಗಡೆ ಶ್ಲಾಘನೆ: ಪತ್ರಿಕೆಗಳು ಸಾಹಿತ್ಯ ವಿಜ್ಞಾನ ಮತ್ತು ಧರ್ಮದ ಮಧ್ಯೆ ಕೊಂಡಿಯಾಗಿರಬೇಕು. ವಿಜಯ ಸಂಕೇಶ್ವರ ಅವರು ವಿಜಯವಾಣಿ ಮೂಲಕ ಸಾಹಿತ್ಯದ ಸೇವೆ ಮಾಡುತ್ತಿದ್ದಾರೆ. ಸದಭಿರುಚಿಯ ಪತ್ರಿಕೆಯನ್ನಾಗಿ ರೂಪಿಸಿದ್ದಾರೆ ಎಂದು ಡಾ.ವೀರೇಂದ್ರ ಹೆಗ್ಗಡೆ ಶ್ಲಾಘಿಸಿದರು.

ನಂದಿ ಪಲ್ಲಕ್ಕಿಯಲ್ಲಿ ಸ್ವಾಮಿ ಮೆರವಣಿಗೆ
ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿ ಸಾನ್ನಿಧ್ಯದಲ್ಲಿ ಲಕ್ಷದೀಪೋತ್ಸವ ಅಂಗವಾಗಿ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆ ನೇತೃತ್ವದಲ್ಲಿ ಬುಧವಾರ ರಾತ್ರಿ ಕಂಚಿಮಾರುಕಟ್ಟೆ ಉತ್ಸವ ನಡೆಯಿತು.

ಲಕ್ಷದೀಪೋತ್ಸವದ ಐದು ದಿನಗಳ ಉತ್ಸವದಲ್ಲಿ ನಾಲ್ಕನೇ ದಿನದ ಕಂಚಿಮಾರುಕಟ್ಟೆ ಉತ್ಸವ ಪ್ರಮುಖವಾದುದು. ದೇಗುಲದ ಹೊರಭಾಗದಿಂದ ಶುದ್ಧಿ ಮಾಡಿದ ನಂತರ ಒಳಭಾಗದಲ್ಲಿ ಉತ್ಸವ ಆರಂಭವಾಗುತ್ತದೆ. ಮೆರವಣಿಗೆ ಪ್ರತಿ ಸುತ್ತಿನಲ್ಲಿಯೂ ಬಲಿ ಕಲ್ಲನ್ನು ಶುದ್ಧಿ ಮಾಡಲಾಗುತ್ತದೆ. 16 ಸುತ್ತು ಬಳಿಕ ಉತ್ಸವ ಮೂರ್ತಿಯನ್ನು ದೇಗುಲದ ಮುಂಭಾಗಕ್ಕೆ ತಂದು ನಂದಿ ಪಲ್ಲಕ್ಕಿಯಲ್ಲಿ ಕೂರಿಸಲಾಯಿತು.
ದೇವಳದಿಂದ ಆರಂಭಗೊಂಡ ವಿಜೃಂಭಣೆಯ ಮೆರವಣಿಗೆ ವೈಶಾಲಿ ವಸತಿಗೃಹದ ಮುಂಭಾಗದಲ್ಲಿರುವ ಕಂಚಿಮಾರುಕಟ್ಟೆ ಬಳಿ ಸಾಗಿ ತಂತ್ರಿ ಪುಂಡಲೀಕ ಆಚಾರ್ ವಿಶೇಷ ಪೂಜೆ ನೆರವೇರಿಸಿದರು. ರಾಮಕೃಷ್ಣ ಕಲ್ಲೂರಾಯ ಉತ್ಸವ ಮೂರ್ತಿ ಹೊತ್ತರು. ನಂತರ ಉತ್ಸವ ಮೂರ್ತಿಯನ್ನು ದೇವಸ್ಥಾನದ ಬಳಿ ತಂದು ಬೆಳ್ಳಿರಥದಲ್ಲಿ ದೇವಳದ ಸುತ್ತಲೂ ಮೆರವಣಿಗೆ ಮಾಡಲಾಯಿತು. ಭಕ್ತರು ಬೆಳ್ಳಿರಥ ಎಳೆಯುವ ಮೂಲಕ ಸ್ವಾಮಿ ಕೃಪೆಗೆ ಪಾತ್ರರಾದರು. ಬಳಿಕ ಉತ್ಸವ ಮೂರ್ತಿಗೆ ಮಂಗಳಾರತಿ ಮಾಡಿ ದೇಗುಲದ ಒಳಗೆ ಕೊಂಡೊಯ್ಯಲಾಯಿತು.

ಧರ್ಮಸ್ಥಳದಲ್ಲಿ ಇಂದು: ಗುರುವಾರ ರಾತ್ರಿ ಗೌರಿಮಾರುಕಟ್ಟೆ ಉತ್ಸವದೊಂದಿಗೆ ಐದು ದಿನಗಳ ವೈಭವದ ಲಕ್ಷದೀಪೋತ್ಸವ ಸಂಪನ್ನಗೊಂಡಿತು. ಡಿ.7ರಂದು ಸಾಯಂಕಾಲ 6.30ರಿಂದ ಮಹೋತ್ಸವ ಸಭಾಭವನದಲ್ಲಿ ಭಗವಾನ್ ಶ್ರೀ ಚಂದ್ರನಾಥ ಸ್ವಾಮಿಯ ಸಮವಸರಣ ಪೂಜಾ ಕಾರ್ಯಕ್ರಮ ಹಾಗೂ ಶ್ರೀವೇಣಿ ಸುಬ್ರಹ್ಮಣ್ಯ ಭಟ್ ಮತ್ತು ಬಳಗ ಕಾರ್ಕಳ ಇವರಿಂದ ಯಕ್ಷ-ಜಿನ-ಗಾನ- ವೈಭವ ಕಾರ್ಯಕ್ರಮ ನಡೆಯಲಿದೆ.

ದೇವರ ದರ್ಶನ ಪಡೆದ ಸಂಕೇಶ್ವರ: ವಿಆರ್‌ಎಲ್ ಸಮೂಹ ಸಂಸ್ಥೆಗಳ ಚೇರ್ಮನ್ ಡಾ.ವಿಜಯ ಸಂಕೇಶ್ವರ ಗುರುವಾರ ಧರ್ಮಸ್ಥಳ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆಯವರನ್ನು ಭೇಟಿ ಮಾಡಿ, ಶ್ರೀ ಮಂಜುನಾಥ ಸ್ವಾಮಿಯ ದರ್ಶನ ಪಡೆದರು. ಬಳಿಕ ಶ್ರೀ ಧರ್ಮಸ್ಥಳದ ಕಾರು ಮ್ಯೂಸಿಯಂ, ಮಂಜೂಷ ವಸ್ತು ಸಂಗ್ರಹಾಲಯ, ಬಾಹುಬಲಿ ಬೆಟ್ಟ ಹಾಗೂ ಇನ್ನಿತರ ಸ್ಥಳಗಳಿಗೆ ಭೇಟಿ ನೀಡಿದರು. ಪತ್ನಿ ಲಲಿತಾ ಸಂಕೇಶ್ವರ, ಕೃಷ್ಣ ಸಿಂಗ್, ಪಾರ್ಶ್ವನಾಥ್, ಪ್ರೊ.ಡಾ.ಜಯಕುಮಾರ್ ಶೆಟ್ಟಿ, ಲಕ್ಷ್ಮೀನಾರಾಯಣ ಮೊದಲಾದವರು ಜತೆಯಲ್ಲಿದ್ದರು.

ಉತ್ತರ ಕರ್ನಾಟಕಕ್ಕೆ ವೀರೇಂದ್ರ ಹೆಗ್ಗಡೆಯವರು ಅಪಾರ ಕೊಡುಗೆ ನೀಡಿದ್ದಾರೆ. ಹೆಗ್ಗಡೆಯವರ ಒಳ್ಳೆಯತನವನ್ನು ನಾವೂ ಕಲಿಯಬೇಕು. ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮತ್ತು ಹೆಗ್ಗಡೆಯವರ ಅವಿರತ ಕೆಲಸ ನೋಡಿ ಆಶ್ಚರ್ಯವಾಗುತ್ತದೆ.
– ಡಾ.ವಿಜಯ ಸಂಕೇಶ್ವರ್, ವಿಆರ್‌ಎಲ್ ಸಮೂಹ ಸಂಸ್ಥೆಗಳ ಅಧ್ಯಕ್ಷ

ಕುವೆಂಪು ವೈಚಾರಿಕತೆ ಮತ್ತು ವೈಜ್ಞಾನಿಕ ದೃಷ್ಟಿಕೋನದಿಂದ ಸಾಹಿತ್ಯವನ್ನು ಆಶ್ರಯಿಸಿದರು. ಕುವೆಂಪು ದೊಡ್ಡ ಆರಾಧಕರು. ಕಲಾಸೃಷ್ಟಿಗೆ ಕೊರತೆ ಆಗದಂತೆ ವಿವಿಧತೆಯಲ್ಲಿ ಏಕತೆಯನ್ನು ಸಾಧಿಸಿದರು. ಶಾಸ್ತ್ರ, ಸಂಪ್ರದಾಯ ಪರಂಪರೆಯ ಒಳಿತು-ಕೆಡುಕನ್ನು ವಿಮರ್ಶಿಸಿ ನಮ್ಮ ವಿವೇಕದಿಂದ ಸ್ವೀಕರಿಸುವ ಅಥವಾ ತಿರಸ್ಕರಿಸುವ ಮನೊಭಾವ ಹೊಂದಿರಬೇಕು. ನ್ಯಾಯ ಒದಗಿಸುವಲ್ಲಿ ಹೆಣ್ಣು ಮತ್ತು ಗಂಡಿಗೆ ಒಂದೇ ರೀತಿಯ ಮಾನದಂಡವಿರಬೇಕು ಎಂದು ಕುವೆಂಪು ಪ್ರತಿಪಾದಿಸಿದ್ದಾರೆ.
– ಡಾ.ಬಿ.ಆರ್.ರವಿಕಾಂತೇಗೌಡ, ದ.ಕ. ಪೊಲೀಸ್ ವರಿಷ್ಠಾಧಿಕಾರಿ

ಪರಿವರ್ತನೆ ಜಗದ ನಿಯಮ. ಬರವಣಿಗೆ ನಮ್ಮ ಅರಿವನ್ನು ಒರೆಗೆ ಹಚ್ಚುತ್ತದೆ. ವ್ಯಕ್ತಿತ್ವ ಪರಿಷ್ಕರಣೆಗೆ ಸಹಕಾರಿಯಾಗಿದೆ. ಕಗ್ಗ ಸದಾ ತನ್ನ ಮೌಲ್ಯ ಮತ್ತು ಮಾನವೀಯತೆಯನ್ನು ಉಳಿಸಿಕೊಂಡಿದೆ. ಬದುಕಿನಲ್ಲಿ ಅಭಾವ ವೈರಾಗ್ಯ ಸಲ್ಲದು. ನಾವು ಜೀವನ್ಮುಖಿಯಾಗಿ ಬಾಳಿ ಬದುಕುವಂತೆ ಜೀವನೋತ್ಸಾಹವನ್ನು ಕವಿತೆಗಳು ಮೂಡಿಸುತ್ತವೆ.
– ಕವಿತಾ ಅಡೂರು, ವಿಜಯವಾಣಿ ಅಂಕಣಕಾರ್ತಿ