VIDEO| ಧೋನಿ ರನೌಟ್​ ಬಗ್ಗೆ ಐಸಿಸಿ ಟ್ವೀಟ್ ಮಾಡಿದ​ ವಿಡಿಯೋ ವಿರುದ್ಧ ಕ್ರೀಡಾಭಿಮಾನಿಗಳು ಗರಂ!

ನವದೆಹಲಿ: ಟೀಂ ಇಂಡಿಯಾದ ವಿಶ್ವಕಪ್​ ಕನಸು ಭಗ್ನವಾಗಿದ್ದು, ಭಾರತೀಯರಲ್ಲಿ ನಿರಾಸೆ ಉಂಟುಮಾಡಿದೆ. ಬುಧವಾರ ನ್ಯೂಜಿಲೆಂಡ್​ ವಿರುದ್ಧದ ಪಂದ್ಯದಲ್ಲಿ ಇನ್ನೇನು ಗೆಲ್ಲುವ ಆಸೆಯಲ್ಲಿದ್ದ ಭಾರತೀಯರಿಗೆ ಮಾಜಿ ನಾಯಕ ಎಂ.ಎಸ್​.ಧೋನಿ ರನೌಟ್​ ಆಗಿದ್ದು, ಭಾರಿ ಆಘಾತ ನೀಡಿತು. ಮಾರ್ಟಿನ್​ ಗುಪ್ಟಿಲ್​ ಮಾಡಿದ ಅದ್ಭುತ ರನೌಟ್​ ಪಂದ್ಯದ ದಿಕ್ಕನ್ನೇ ಬದಲಿಸಿ, ನ್ಯೂಜಿಲೆಂಡ್​ ಫೈನಲ್​ ಹಾದಿಯನ್ನು ಸುಲಭಗೊಳಿಸಿತು. ಇದೀಗ ಧೋನಿ ರನೌಟ್​ ಕುರಿತು ಐಸಿಸಿ ತನ್ನ ಟ್ವಿಟರ್​​​ನಲ್ಲಿ ಅಪ್​ಲೋಡ್​ ಮಾಡಿರುವ ವಿಡಿಯೋ ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿದೆ.

ಐಸಿಸಿ ಅಪ್​ಲೋಡ್​ ಮಾಡಿರುವ ವಿಡಿಯೋದಲ್ಲಿ ಗುಪ್ಟಿಲ್​ ತನ್ನ ಬೆಂಕಿಯಂತಹ ಕಣ್ಣುಗಳಿಂದ ವಿಕೆಟ್​ಗೆ ಗುರಿಯಿಟ್ಟು ಎಸೆದ ಚೆಂಡು ವಿಕೆಟ್​ಗೆ ಬಡಿದು ಬಾಂಬ್​ನಂತೆ ಸ್ಫೋಟಗೊಳ್ಳುತ್ತದೆ. ಇದಕ್ಕೆ ಐಸಿಸಿ ಅರ್ನಾಲ್ಡ್​ ಅಭಿನಯದ ಟರ್ಮಿನೇಟರ್​ ಚಿತ್ರಕ್ಕೆ ಹೋಲಿಸಿ, ಅದರಲ್ಲಿ ಅರ್ನಾಲ್ಡ್​ ಹೊಡೆಯುವ ಡೈಲಾಗ್​ ಅನ್ನು ಧೋನಿಗೆ ತಳುಕು ಹಾಕಿ ”ಹಸ್ತ ಲಾ ವಿಸ್ತಾ, ಧೋನಿ” ಎಂದು ಅಡಿಬರಹ ನೀಡಿದೆ.

ಇದನ್ನು ನೋಡಿದ ಭಾರತೀಯರು ಟೂರ್ನಿಯನ್ನು ಆಯೋಜಿಸುವ ನಿಮ್ಮಂತಹವರು ಸಾಮಾಜಿಕ ಜಾಲತಾಣದಲ್ಲಿ ಈ ರೀತಿಯಾಗಿ ವಿಡಿಯೋ ಪ್ರಕಟಿಸುವುದು ಸರಿಯಲ್ಲ ಎಂದು ಐಸಿಸಿ ವಿರುದ್ಧ ಕಿಡಿಕಾರಿದ್ದಾರೆ. ಅಲ್ಲದೆ, ವಿಡಿಯೋವನ್ನು ಡಿಲೀಟ್​ ಮಾಡಿ, ಇದನ್ನು ಮತ್ತೆ ತೋರಿಸಿ ನಾವು ಅಳುವಂತೆ ಮಾಡಬೇಡಿ, ಈಗಾಗಲೇ ಸಾಕಷ್ಟು ನೋವು ಅನುಭವಿಸಿದ್ದೇವೆ ಎಂದು ಕ್ರೀಡಾಭಿಮಾನಿಗಳು ಮನವಿ ಮಾಡಿಕೊಂಡಿದ್ದಾರೆ.

ಮೀಸಲು ದಿನವಾದ ಬುಧವಾರ ಇನಿಂಗ್ಸ್​ನ ಕೊನೇ 23 ಎಸೆತಗಳನ್ನು ಎದುರಿಸಿದ ನ್ಯೂಜಿಲೆಂಡ್, 8 ವಿಕೆಟ್​ಗೆ 239 ರನ್ ಪೇರಿಸಿತು. ಪ್ರತಿಯಾಗಿ ಭಾರತ ತಂಡ ಆಲ್ರೌಂಡರ್ ರವೀಂದ್ರ ಜಡೇಜಾರ (77 ರನ್ 59 ಎಸೆತ, 4 ಬೌಂಡರಿ, 4 ಸಿಕ್ಸರ್) ಭರ್ಜರಿ ಬ್ಯಾಟಿಂಗ್​ ಹಾಗೂ ಅನುಭವಿ ಎಂಎಸ್ ಧೋನಿ (50 ರನ್, 72 ಎಸೆತ, 1 ಬೌಂಡರಿ, 1 ಸಿಕ್ಸರ್) ಅರ್ಧಶತಕದ ಹೊರತಾಗಿಯೂ 49.3 ಓವರ್​ಗಳಲ್ಲಿ 221 ರನ್​ಗೆ ಆಲೌಟ್ ಆಗಿ ವಿಶ್ವಕಪ್​ನಿಂದ ನಿರ್ಗಮಿಸಿತ್ತು. (ಏಜೆನ್ಸೀಸ್​)

Leave a Reply

Your email address will not be published. Required fields are marked *