ಬಾಹುಬಲಿಯ ಸಹಾನುಭೂತಿಯ ಮುಖಭಾವ ನನಗೆ ಕಾಣಿಸುತ್ತಿದೆ: ರಾಮನಾಥ ಕೋವಿಂದ್​

ಹಾಸನ: ಶಾಂತಿ, ಅಹಿಂಸೆ, ಮೈತ್ರಿ ಹಾಗೂ ತ್ಯಾಗಗಳು ಇಡೀ ವಿಶ್ವ ಶಾಂತಿಗೆ ಅಗತ್ಯವಾದ ಸಂದೇಶಗಳಾಗಿವೆ. ಈ ವಿದ್ಯಮಾನಗಳೆಡೆಗೆ ಸಹಾನುಭೂತಿ ಹೊಂದಿರುವ ಬಾಹುಬಲಿಯ ಮುಖಭಾವ ನನಗೆ ಕಾಣಿಸುತ್ತಿದೆ ಎಂದು ರಾಷ್ಟ್ರಪತಿ ರಾಮನಾಥ ಕೋವಿಂದ್​ ಅವರು ಸಂದೇಶ ಸಾರಿದ್ದಾರೆ.

88ನೇ ಐತಿಹಾಸಿಕ ಮಹಾಮಸ್ತಕಾಭಿಷೇಕ ಮಹೋತ್ಸವ ಉದ್ಘಾಟಿಸಿ, ಸಹೋದರ, ಸಹೋದರಿಯರೇ ನನ್ನ ನಮಸ್ಕಾರಗಳು ಎಂದು ಕನ್ನಡದಲ್ಲಿ ಭಾಷಣ ಆರಂಭಿಸಿದ ಅವರು ಕರ್ನಾಟಕದ ಜನರಲ್ಲಿನ ಆತಿಥ್ಯ ಪದೇ ಪದೇ ಬರುವಂತೆ ಪ್ರೇರೇಪಿಸುತ್ತದೆ. ರಾಜ್ಯಕ್ಕೆ ಇದು ನನ್ನ ಮೂರನೇ ಭೇಟಿ ಎಂದು ಪ್ರಶಂಸಿಸಿದರು.

ಬಾಹುಬಲಿ ದರ್ಶನದಿಂದ ಅಪಾರ ಪ್ರಸನ್ನತಾ ಭಾವ ಅನುಭವವಾಗುತ್ತಿದೆ. ಬಾಹುಬಲಿ ಮಾನವತೆಯ ಕಲ್ಯಾಣಕ್ಕಾಗಿ ಹಲವು ಸಂದೇಶ ನೀಡಿದ್ದಾರೆ. ಅದರ ಕಾರಣಕ್ಕಾಗಿ ಶ್ರವಣಬೆಳಗೊಳ ಇಂದು ಆಕರ್ಷಣೆಯ ಕೇಂದ್ರವಾಗಿದೆ ಎಂದರು.

ಉಜ್ಜಯಿನಿಯಿಂದ ಬಂದ ಭದ್ರಬಾಹು ಹಾಗೂ ಸಾಮ್ರಾಟ ಚಂದ್ರಗುಪ್ತ ಕೂಡ ಇಲ್ಲಿಗೆ ಬಂದು ದೇಹತ್ಯಾಗ ಮಾಡಿದ್ದಾರೆ. ಅಂತಹ ರಾಷ್ಟ್ರ ನಿರ್ಮಾತೃಗಳು ಶಾಂತಿ, ನೆಮ್ಮದಿ ಹಾಗೂ ತ್ಯಾಗದ ಪ್ರತೀಕವಾಗಿದ್ದಾರೆ. ಜೈನ ಸಿದ್ಧಾಂತ ಇಡೀ ದೇಶವನ್ನು ಒಂದುಗೂಡಿಸಿದೆ ಎಂದು ಹೇಳಿದರು.

ಸಾವಿರ ವರ್ಷದ ಹಿಂದೆ ಮೂರ್ತಿ ಕೆತ್ತಿದ ಶಿಲ್ಪಿ ಕಲ್ಲಿಗೆ ಜೀವ ತುಂಬಿದ್ದಾರೆ. ಜೈನ ಧರ್ಮ ಪಕೃತಿಯನ್ನ ಕಾಪಾಡುವ ಸಂದೇಶ ಸಾರಿದೆ. ಬಾಹುಬಲಿಯ ವಿಶೇಷ ಪ್ರತಿಮೆ ಭಾರತೀಯ ಕಲೆ ಮತ್ತು ವಾಸ್ತುಶಿಲ್ಪಿಯ ಹಿರಿಮೆಗೆ ಒಂದು ಉದಾಹಾರಣೆ. ಜೈನಧರ್ಮದ ಮಹಾಮಜ್ಜನ ಮಹೋತ್ಸವದಲ್ಲಿ ಭಾಗಿಯಾದ ಸಂತೋಷ ನನ್ನದಾಗಿದೆ. ಮಹಾಮಸ್ತಕಾಭಿಷೇಕ ಕಲ್ಯಾಣಕ್ಕೆ ಶ್ರಮಿಸುತ್ತಿರುವ ಎಲ್ಲರಿಗೂ ಅಭಿನಂದನೆಗಳು ಎಂದರು.

Leave a Reply

Your email address will not be published. Required fields are marked *