ಹರಿಹರ: ಮುಂದಿನ ವರ್ಷ ಮಾರ್ಚ್‌ನಲ್ಲಿ ಆಯೋಜಿಸಿರುವ ಗ್ರಾಮ ದೇವತೆ ಹಬ್ಬದ ಉತ್ಸವ ಸಮಿತಿಗೆ ಪರಸ್ಥಳದ ಹಾರ್ನಳ್ಳಿ ಮಂಜುನಾಥ್ ಅವರನ್ನು ಅಧ್ಯಕ್ಷರನ್ನಾಗಿ ಆಯ್ಕೆ ಮಾಡಿರುವುದಕ್ಕೆ ನಮ್ಮ ವಿರೋಧವಿದೆ ಎಂದು ಮಹಜೇನಹಳ್ಳಿ ಭಾಗದ ಮುಖಂಡರು ಹೇಳಿದರು.
ಹಾರ್ನಳ್ಳಿ ಮಂಜುನಾಥ್ ಮೂಲತಃ ಹರಿಹರದವರಲ್ಲ. ಅದರಲ್ಲೂ ಹೆಚ್ಚು ಕಾಲ ಕಸಬಾ ನಿವಾಸಿಯಾಗಿದ್ದು, ಇತ್ತೀಚೆಗೆ ಮಹಜೇನಹಳ್ಳಿ ಭಾಗಕ್ಕೆ ಬಂದಿದ್ದಾರೆ ಎಂದು ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ವಹಜೇನಹಳ್ಳಿ ಹಿಂದಿನ ಉತ್ಸವ ಸಮಿತಿಯ ಖಜಾಂಚಿ ಶೇರಾಪುರ ರಾಜಶೇಖರ್ ಆರೋಪಿಸಿದರು.
ಆಯ್ಕೆ ಪ್ರಕ್ರಿಯೆಯಲ್ಲಿ ಗೊಂದಲ ಏರ್ಪಟ್ಟಾಗ ಮುಖಂಡರು ಪ್ರತ್ಯೇಕ ಕೊಠಡಿಯಲ್ಲಿ ಚರ್ಚಿಸಿ ಅಧ್ಯಕ್ಷರ ಆಯ್ಕೆ ಪ್ರಕ್ರಿಯೆ ಮುಂದಿನ ಮಂಗಳವಾರಕ್ಕೆ ಮುಂದೂಡಿದ್ದಾಗಿ ತಿಳಿಸಿದ್ದರಿಂದ ಬಹುತೇಕರು ನಿರ್ಗಮಿಸಿದ್ದರು. ಇದರ ನಂತರ ಮುಖಂಡರು ದಿಢೀರನೆ ಹಾರ್ನಳ್ಳಿ ಮಂಜುನಾಥ್ ಅವರನ್ನು ಅಧ್ಯಕ್ಷರನ್ನಾಗಿ ಮಾಜಿ ಶಾಸಕ ಎಸ್.ರಾಮಪ್ಪ ಘೋಷಿಸಿರುವುದನ್ನು ನಾವು ಒಪ್ಪುವುದಿಲ್ಲ ಎಂದರು. ಈ ಹಿಂದೆ ನಡೆದ ಉತ್ಸವ ಸಮಿತಿಯಲ್ಲಿ ಅಮರಾವತಿ ಮಂಡಕ್ಕಿ ರೇವಣಸಿದ್ದಪ್ಪರನ್ನು ಸಮಿತಿಗೆ ನೇಮಿಸುವ ವೇಳೆ ಕೆಲವರು ಅವರನ್ನು ಮೂಲತಃ ಹರಿಹರದವರಲ್ಲ ಎಂದು ತಿರಸ್ಕರಿಸಿದ್ದರು. ಹಾಗೆಯೇ ಈಗ ಅಧ್ಯಕ್ಷರಾದವರು ಸಹ ಹರಿಹರದವರಲ್ಲ, ಇವರನ್ನೂ ನಾವು ಒಪ್ಪುವುದಿಲ್ಲ ಎಂದು ವಿರೋಧಿಸಿದರು.
ಅಲ್ಲದೆ, ಅಧ್ಯಕ್ಷರು, ಕಾರ್ಯದರ್ಶಿ, ಸಹ ಕಾರ್ಯದರ್ಶಿಯನ್ನು ಘೋಷಿಸುವ ಸಂಪ್ರದಾಯ ಮತ್ತು ಅಧಿಕಾರ ಚನ್ನಬಸಪ್ಪ ಗೌಡರಿಗೆ ಮಾತ್ರ ಇದೆ. ಆದರೆ, ಅವರ ಬದಲು ಮಾಜಿ ಶಾಸಕ ಎಸ್. ರಾಮಪ್ಪ ಘೋಷಿಸಿರುವುದು ಅಧಿಕೃತವಾಗುವುದಿಲ್ಲ. ಆಕಾಂಕ್ಷಿಗಳು ಜಾಸ್ತಿ ಇದ್ದಾಗ ಕೈ ಎತ್ತುವ ಮೂಲಕ ಅಥವಾ ಚೀಟಿ ಎತ್ತುವ ಮೂಲಕ ಆಯ್ಕೆ ಮಾಡಬೇಕು. ಅದು ಬಿಟ್ಟು ತಮಗೆ ಬೇಕಾದವರನ್ನು ಆಯ್ಕೆ ಮಾಡುವುದು ಸರಿಯಲ್ಲ ಹಾಗೂ ಇದು ರಾಜಕೀಯವಲ್ಲ ಎಂಬುದನ್ನು ತಿಳಿಯಬೇಕು ಎಂದರು.
ಒಂದು ವೇಳೆ ಇವರನ್ನೇ ಮುಂದುವರಿಸಿದರೆ ಮಹಾಜೇನಹಳ್ಳಿ ಭಾಗದವರು ಉತ್ಸವದಲ್ಲಿ ಪಾಲ್ಗೊಳ್ಳುವುದಿಲ್ಲ. ಹಾಗಾಗಿ, ಕೂಡಲೇ ಮತ್ತೆ ಸಭೆ ಕರೆದು ಎಲ್ಲ ಗೊಂದಲಕ್ಕೆ ತೆರೆ ಎಳೆಯಬೇಕು. ಜನ ಬೆಂಬಲ ಇದ್ದವರನ್ನು ಆಯ್ಕೆ ಮಾಡಬೇಕು ಎಂದು ಒತ್ತಾಯಿಸಿದರು. ಸುದ್ದಿಗೋಷ್ಠಿಯಲ್ಲಿ ನಗರಸಭಾ ಸದಸ್ಯ ದಿನೇಶ್‌ಬಾಬು, ಗಂಗಾಧರ್, ಪಾಲಾಕ್ಷಪ್ಪ ಮಂಕ್ರಿ, ಶ್ರೀಕಾಂತ್ ಮೆಹರವಾಡೆ. ಬೆಳಕೆರೆ ನಾಗಣ್ಣ, ಬಾಂಬೆ ನಾಗಣ್ಣ, ಹಂಚಿನ ಮನೆ ದೇವೇಂದ್ರಪ್ಪ, ಡಿ.ಸಿದ್ದೇಶ್, ಮಾಕನೂರ್ ತಿಪ್ಪೇಶ್, ಬಸವನಗೌಡ್ರು ಇತರರಿದ್ದರು.