ಗೋ ಶಾಲೆ ನಿರ್ಮಾಣಕ್ಕೆ ಅನುಮತಿ ನೀಡಿ

ಕಳಸ: ರಸ್ತೆ ಕಚೇರಿ ಮುಂದೆ ನಿಂತು ಪ್ರತಿಭಟನೆ ಮಾಡುವ ಮುಂಚಿತವಾಗಿ ಕಳಸದ ಸರ್ವೇ ನಂ.494ರಲ್ಲಿ ಗೋ ಶಾಲೆ ನಿರ್ಮಿಸಲು ಅನುಮತಿ ನೀಡಬೇಕು ಎಂದು ವಿಶ್ವ ಹಿಂದು ಪರಿಷತ್ ಹಾಸನ ವಿಭಾಗದ ಸಂಚಾಲಕ ಆರ್.ಡಿ ಮಹೇಂದ್ರ ಹೇಳಿದರು.
ಕಳಸದ ಗೇರುತೋಟದಲ್ಲಿ ವಿಶ್ವ ಹಿಂದು ಪರಿಷತ್ ಭಜರಂಗದಳ ಕಳಸ ಪ್ರಖಂಡದಿಂದ ನಡೆದ ಗೋ ಪೂಜೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಜಿಲ್ಲೆಗೊಂದು ಗೋಶಾಲೆ ಬೇಕು ಎಂದು ಸರ್ಕಾರವೇ ಆದೇಶ ಮಾಡಿದೆ. ಆದರೆ ಸರ್ಕಾರ ಅದನ್ನು ಮಾಡುತ್ತಿಲ್ಲ. ಕಳೆದ ಎರಡು ವರ್ಷದಿಂದ ಕಳಸದ ಗೇರು ತೋಟದಲ್ಲಿರುವ ಗೋಮಾಳ ಭೂಮಿಯನ್ನು ಗೋ ಶಾಲೆಗೆ ನೀಡುವಂತೆ ಕೇಳಲಾಗುತ್ತಿದೆ. ಅಲ್ಲದೆ ಅದೇ ಸ್ಥಳದಲ್ಲಿ ಎರಡು ವರ್ಷದಿಂದ ಗೋ ಪೂಜೆ ಮಾಡುವ ಮೂಲಕ ಹೋರಾಟ ಮಾಡುತ್ತಿದ್ದರೂ ಪ್ರಯೋಜನವಾಗಿಲ್ಲ. ನಾವು ಕಚೇರಿ ಕಟ್ಟಡ ಮಾಡಲು ಭೂಮಿ ಕೇಳುತ್ತಿಲ್ಲ. ಗೋ ರಕ್ಷಣೆಗಾಗಿ ಕೇಳುತ್ತಿದ್ದೇವೆ. ಮುಂದಿನ ದಿನಗಳಲ್ಲಿ ಕಚೇರಿ ಮುಂದೆ ನಮ್ಮ ಕೂಗು ಕೇಳಿಸುವ ಮೊದಲು ಗೋ ಶಾಲೆಗೆ ಭೂಮಿ ನೀಡಬೇಕು ಎಂದು ಒತ್ತಾಯಿಸಿದರು.
ಜಿಲ್ಲಾ ಧರ್ಮ ಪ್ರಸಾರಕ ಪ್ರಮುಖ್ ಜಗದೀಶ್ ಭಟ್ ಮಾತನಾಡಿ, ಕಳೆದ 20 ವರ್ಷಗಳಿಂದ ಗೋ ಶಾಲೆ ಭೂಮಿಗಾಗಿ ಹೋರಾಟ ನಡೆಸಲಾಗುತ್ತಿದೆ. ಗೋವಿಗಾಗಿ ಇರುವ ಭೂಮಿಯಾಗಿದೆ. ಸರ್ಕಾರ ಭೂಮಿ ಕೊಟ್ಟರೆ ಒಂದು ವರ್ಷದೊಳಗೆ ಇಲ್ಲಿ ಗೋಶಾಲೆ ನಿರ್ಮಾಣ ಮಾಡಲಾಗುವುದು. ಆದಷ್ಟು ಬೇಗ ಈ ಭೂಮಿಯನ್ನು ಗೋ ಶಾಲೆಗೆ ಭೂಮಿ ಮಂಜೂರು ಮಾಡಿಕೊಡ ಬೇಕು ಇಲ್ಲವಾದಲ್ಲಿ ಮುಂದಿನ ದಿನಗಳಲ್ಲಿ ಪ್ರತಿಭಟನೆ ಮಾಡಬೇಕಾಗುತ್ತದೆ ಎಂದರು.
ಕಲಶೇಶ್ವರ ದೇವಸ್ಥಾನದ ಪ್ರಧಾನ ಅರ್ಚಕ ಅನಂತ ಪದ್ಮನಾಭ ಭಟ್ ಮಾತನಾಡಿ, ಗೋವುಗಳನ್ನು ಸುಖವಾಗಿಟ್ಟುಕೊಂಡರೆ ಲೋಕ ಸುಖವಾಗಿರುತ್ತದೆ. ಇದು ಪ್ರತೀ ನಿತ್ಯ ಗೋ ಪೂಜೆ ನಡೆಯುತ್ತಿಲ್ಲ. ಗೋವುಗಳನ್ನು ಸಾಕಬೇಕು ಎಂದು ಹೇಳಿದರು.
ವಿಶ್ವ ಹಿಂದು ಪರಿಷತ್ ಜಿಲ್ಲಾ ಉಪಾಧ್ಯಕ್ಷ ಉಮೇಶ್, ಜಿಲ್ಲಾ ಸಂಯೋಜಕ ಅಜಿತ್ ಕುಲಾಲ್, ಸಹ ಸಂಯೋಜಕ ಮಂಜುನಾಥ್ ದುರ್ಗಾವಾಹಿನಿ ತಾಲೂಕು ಸಂಯೋಜಕಿ ಮೈನಾ, ಕಳಸ ಗ್ರಾ ಪಂ ಅಧ್ಯಕ್ಷೆ ಉಷಾ ವಿಶ್ವನಾಥ್, ಮುಖಂಡರಾದ ಸುಜಯ ಸದಾನಂದ, ಸುಜಿಲ್, ಸಂತೋಷ್, ಪ್ರವೀಣ್, ದೀಕ್ಷಿತ್, ಕಾರ್ತಿಕ್ ಇತರರು ಇದ್ದರು.