ಬೀಜಿಂಗ್: ವಿರಳ ಕಾಯಿಲೆಯಿಂದ ವಯಸ್ಸಾದಂತೆ ಕಾಣುತ್ತಿದ್ದ 15 ವರ್ಷದ ಹುಡುಗಿಯೊಬ್ಬಳು ಪ್ಲ್ಯಾಸ್ಟಿಕ್ ಸರ್ಜರಿಯಿಂದ ಹೊಸ ಜೀವನದ ಸ್ವರೂಪ ಪಡೆದುಕೊಂಡಿರುವ ಅಪರೂಪದ ಪ್ರಕರಣ ಚೀನಾದಲ್ಲಿ ಕಂಡಬಂದಿದೆ. ಪರೋಪಕಾರಿಗಳ ತಂಡವೊಂದು ಸೇರಿ ಸಂತ್ರಸ್ತ ಹುಡುಗಿಗೆ ಹೊಸ ಬಾಳನ್ನು ನೀಡಿದ್ದಾರೆ.
ಚೀನಾದ ಶೆನ್ಯಾಂಗ್ ನಿವಾಸಿಯಾಗಿರುವ ಸಿಯೊಡೊನಿಮ್ ಕ್ಷಿಯೊ ಫೆಂಗ್ ಹೆಸರಿನ ಬಾಲಕಿ ವಿರಳ ಕಾಯಿಲೆಯಿಂದ ವಯಸ್ಸಾದಂತೆ ಕಾಣುತ್ತಿದ್ದಳು. ಅವಳ ಸುಕ್ಕುಗಟ್ಟಿದ ಮುಖವನ್ನು ನೋಡಿ ಶಾಲೆಯಲ್ಲಿ ಎಲ್ಲರೂ ಭಯಬೀಳುತ್ತಿದ್ದರು. ಇದರಿಂದ ಫೆಂಗ್ಗೆ ಏಕಾಂಗಿ ಭಾವನೆ ಮತ್ತು ಕೀಳರಿಮೆ ಕಾಡುತ್ತಿತ್ತು. ಇತರರಂತೆ ನಾನಿಲ್ಲವಲ್ಲ ಎಂದು ದಿನನಿತ್ಯ ಫೆಂಗ್ ಕೊರಗುತ್ತಿದ್ದಳು.
ಇದೀಗ ಪ್ಲ್ಯಾಸ್ಟಿಕ್ ಸರ್ಜರಿಗೆ ಒಳಗಾಗಿರುವ ಫೆಂಗ್, ಇಂದು ಮೊದಲ ಬಾರಿಗೆ ಸಾರ್ವಜನಿಕವಾಗಿ ಕಾಣಿಕೊಂಡು ಎಲ್ಲರಲ್ಲೂ ಅಚ್ಚರಿ ಮೂಡಿಸಿದ್ದರು. ಬಹಳ ಸುಂದರ ಹುಡುಗಿಯಂತೆ ಫೆಂಗ್ ಕಾಣಿಸುತ್ತಿದ್ದಳು.
8 ಮಿಲಿಯನ್ ಮಂದಿಯಲ್ಲಿ ಒಬ್ಬರಿಗೆ ಕಾಣಿಸಿಕೊಳ್ಳುವ ಕಾಯಿಲೆ
ಫೆಂಗ್ ಸ್ಥಿತಿಯ ಬಗ್ಗೆ ಶೆನ್ಯಾಂಗ್ ಸನ್ಲೈನ್ ಪ್ಲ್ಯಾಸ್ಟಿಕ್ ಸರ್ಜರಿ ಆಸ್ಪತ್ರೆಯ ಸರ್ಜನ್ ಮಾತನಾಡಿ, ಫೆಂಗ್ 8 ಮಿಲಿಯನ್ ಮಂದಿಯಲ್ಲಿ ಒಬ್ಬರಿಗೆ ಸಂಭವಿಸುವ ವಿರಾಳಾತಿವಿರಳವಾದ ಪ್ರೊಗೆರಿಯಾ ಕಾಯಿಲೆಗೆ ತುತ್ತಾಗಿದ್ದಳು. ಇದರಿಂದಾಗಿ ಫೆಂಗ್ ವಯಸ್ಸಾದಂತೆ ಕಾಣುತ್ತಿದ್ದಳು. ಅದೃಷ್ಟವಶಾತ್ ಫೆಂಗ್ ಪ್ರಕರಣದಲ್ಲಿ ಈ ಕಾಯಿಲೆ ಆಕೆಯ ಚರ್ಮಕ್ಕೆ ಮಾತ್ರ ಪ್ರಭಾವ ಬೀರಿತ್ತು. ಇದರಿಂದ ಆಕೆಯ ಅಂಗಾಗಳಿಗೆ ಯಾವುದೇ ತೊಂದರೆಯಾಗಿರಲಿಲ್ಲ ಎಂದು ಹೇಳಿದ್ದಾರೆ.
ಪರೋಪಕಾರಿಗಳಿಗೆ ಧನ್ಯವಾದಗಳು
ಫೆಂಗ್ ಕುಟುಂಬ ಆರ್ಥಿಕವಾಗಿ ಸದೃಢವಾಗಿಲ್ಲ. ಹೀಗಾಗಿ ಆಕೆಗೆ ಚಿಕಿತ್ಸೆ ಕೊಡಿಸುವಷ್ಟು ಹಣವಿರಲಿಲ್ಲ. ಆದರೆ, ಪರೋಪಕಾರಿಗಳು ಒಗ್ಗಟ್ಟಿನಿಂದಾಗಿ ಇಂದು ಫೆಂಗ್ ಹೊಸ ರೂಪ ಪಡೆದುಕೊಂಡಿದ್ದಾಳೆ. ಸುಮಾರು 20,000 ಪೌಂಡ್ (18,58,448 ರೂ.) ವೈದ್ಯಕೀಯ ವೆಚ್ಚ ಭರಿಸಿ ಫೆಂಗ್ಗೆ ಚಿಕಿತ್ಸೆ ಕೊಡಿಸಲಾಗಿದೆ.
ಡಿಸೆಂಬರ್ 29ರಂದು ಸುಮಾರು 10 ಸರ್ಜನ್ಗಳಿಂದ ಆಪರೇಷನ್ ನಡೆದಿದೆ. ಮೂವರು ಅರಿವಳಿಕೆ ತಜ್ಞರು ಮತ್ತು ಐವರು ನರ್ಸ್ಗಳು ಕೂಡ ಆಪರೇಷನ್ನಲ್ಲಿ ಕೈಜೋಡಿಸಿದ್ದರು. ಫೆಂಗ್ ದೇಹದಲ್ಲಿದ್ದ 2.7 ಇಂಚಿನ ದಪ್ಪ ಚರ್ಮವನ್ನು ತೆಗದುಹಾಕಿ, ಪ್ಲ್ಯಾಸ್ಟಿಕ್ ಸರ್ಜರಿ ಮಾಡಲಾಗಿದೆ.
ದಯಾಪರತೆ ಮೆರೆದ ಆಸ್ಪತ್ರೆ
ಫೆಂಗ್ಗೆ ಚಿಕಿತ್ಸೆ ನೀಡಿದ ಆಸ್ಪತ್ರೆಯೂ ಕೂಡ ಆಕೆಯ ಬೆನ್ನಿಗೆ ನಿಂತಿದೆ. ಅಂತಿಮವಾಗಿ 56,000 ಪೌಂಡ್(52,03,204 ರೂ.) ಆಸ್ಪತ್ರೆ ಬಿಲ್ ಅನ್ನು ರದ್ದುಗೊಳಿಸಿದೆ. ನಿಧಿ ಸಂಗ್ರಹ ಹಣವನ್ನು ಆಕೆಯ ಚೇತರಿಕೆ ಮತ್ತು ಭವಿಷ್ಯದ ಅಧ್ಯಯನಕ್ಕೆ ನೀಡುವುದಾಗಿ ಆಸ್ಪತ್ರೆ ನಿರ್ವಹಣಾ ಮಂಡಳಿ ತಿಳಿಸಿದೆ. (ಏಜೆನ್ಸೀಸ್)