ಇಸ್ಲಮಾಬಾದ್: ಜಮ್ಮು ಮತ್ತು ಕಾಶ್ಮೀರದಲ್ಲಿ ಭಾರತೀಯ ಸೇನೆ ವಿರುದ್ಧ ಹೋರಾಡಲು ಕಾಶ್ಮೀರಿಗಳಿಗೆ ಉಗ್ರ ತರಬೇತಿ ನೀಡಲಾಗುತ್ತಿತ್ತು ಎಂಬುದನ್ನು ಪಾಕಿಸ್ತಾನದ ಮಾಜಿ ಅಧ್ಯಕ್ಷ, ಪಾಕ್ ಸೇನೆಯ ಮಾಜಿ ಜನರಲ್ ಫರ್ವೇಜ್ ಮುಷರಫ್ ಅವರು ಒಪ್ಪಿಕೊಂಡಿದ್ದಾರೆ. ಸಂದರ್ಶನವೊಂದರಲ್ಲಿ ಅವರು ಈ ಸತ್ಯವನ್ನು ಬಿಚ್ಚಿಟ್ಟಿದ್ದಾರೆ.
ಪಾಕಿಸ್ತಾನ ರಾಜಕಾರಣಿ ಫರ್ಹತುಲ್ಲಾ ಬಾಬರ್ ಎಂಬುವರು ಈ ಸಂದರ್ಶನದ ಸಣ್ಣ ತುಣುಕೊಂದನ್ನು ಟ್ವಿಟರ್ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.
ಕಾಶ್ಮೀರದಿಂದ ಯಾರೇ ಪಾಕಿಸ್ತಾನಕ್ಕೆ ಬಂದರೂ ಅವರನ್ನು ಇಲ್ಲಿ ಅದ್ಧೂರಿಯಾಗಿ ಸ್ವಾಗತಿಸಲಾಗುತ್ತಿತ್ತು. ಅವರಿಗೆ ಇಲ್ಲಿ ತರಬೇತಿ ನೀಡಲಾಗುತ್ತಿತ್ತು. ಭಾರತೀಯ ಸೇನೆಯ ವಿರುದ್ಧ ಹೋರಾಡಲು ಅವರನ್ನು ಅಣಿಗೊಳಿಸಿ ಮುಜಾಹಿದ್ದೀನ್ಗಳಂತೆ ಪರಿಗಣಿಸಲಾಗುತ್ತಿತ್ತು. ಅದೇ ವೇಳೆಯಲ್ಲಿ ಲಷ್ಕರ್ ಎ ತೊಯ್ಬಾದಂತಹ ಭಯೋತ್ಪಾದಕ ಸಂಘಟನೆಗಳು ಬೆಳೆದುಬಂದಿವೆ ಎಂದು ಮುಷರಫ್ ಹೇಳಿದ್ದನ್ನು ವಿಡಿಯೋದಲ್ಲಿ ಕೇಳಬಹುದು. ಅಷ್ಟೇ ಅಲ್ಲದೆ, ಒಸಮಾ ಬಿನ್ ಲಾಡನ್, ಅಯ್ಮಾನ್ ಅಲ್-ಜವಾಹರಿ, ಜಲಾಲುದ್ದೀನ್ ಹಕ್ಕಾನಿ ಮತ್ತಿತರರು ಪಾಕಿಸ್ತಾನದ ಹೀರೋಗಳು ಎಂದು ಕೂಡ ಅವರು ಹೇಳಿದ್ದಾರೆ.
1979ರಲ್ಲಿ ಪಾಕಿಸ್ತಾನಕ್ಕೆ ಲಾಭ ಪಡೆಯುವುದಕ್ಕೋಸ್ಕರ ಅಫ್ಘಾನಿಸ್ತಾನದಲ್ಲಿ ಧಾರ್ಮಿಕ ಭಯೋತ್ಪಾದನೆಯನ್ನು ನಾವೇ ಪರಿಚಯಿಸಿದ್ದೇವೆ. ಜಗತ್ತಿನ ಎಲ್ಲ ಭಾಗದಲ್ಲಿರುವ ಮುಜಾಹಿದ್ದೀನ್ಗಳನ್ನೂ ನಾವು ಪಾಕಿಸ್ತಾನಕ್ಕೆ ಕರೆದುಕೊಂಡುಬಂದು ಅವರಿಗೆ ತರಬೇತಿ ನೀಡಿ, ಯುದ್ಧಾಸ್ತ್ರಗಳನ್ನೂ ಒದಗಿಸಿದೆವು. ತಾಲಿಬಾನಿಗಳನ್ನು ಕರೆಸಿ ತರಬೇತಿ ನೀಡಿ ವಾಪಸ್ ಕಳೆಸಿದ್ದೇವೆ. ಅವರೆಲ್ಲ ನಮ್ಮ ಹೀರೋಗಳು, ಹಕ್ಕಾನಿ, ಒಸಮಾ ಬಿನ್ ಲಾಡನ್ ಎಲ್ಲರೂ ಪಾಕಿಸ್ತಾನದ ಹೀರೋಗಳು. ಬಳಿಕ ಜಗತ್ತಿನ ದೃಷ್ಟಿಕೋನ ಬದಲಾಯಿತು. ನಮ್ಮ ಹೀರೋಗಳನ್ನೆಲ್ಲ ಖಳನಾಯಕರಂತೆ ನೋಡಲು ಪ್ರಾರಂಭಿಸಿತು ಎಂದಿದ್ದಾರೆ.
ನಾವು ಉಗ್ರರಿಗೆ ತರಬೇತಿ ನೀಡುವುದಿಲ್ಲ, ಸುರಕ್ಷಿತ ತಾಣದಲ್ಲಿ ಅವರನ್ನು ಇಟ್ಟು ಪೋಷಿಸುತ್ತಿಲ್ಲ ಎಂದೇ ಹೇಳಿಕೊಂಡು ಬರುತ್ತಿರುವ ಪಾಕಿಸ್ತಾನದ ನಿಜ ಸ್ವರೂಪ ಮುಷರಪ್ ಅವರ ಮಾತಿನಿಂದ ಬಯಲಾಗಿದೆ. (ಏಜೆನ್ಸೀಸ್)
Gen Musharraf blurts that militants were nurtured and touted as 'heroes' to fight in Kashmir. If it resulted in destruction of two generations of Pashtuns it didn't matter. Is it wrong to demand Truth Commission to find who devised self serving policies that destroyed Pashtuns? https://t.co/5Q2LOvl3yb
— Farhatullah Babar (@FarhatullahB) November 13, 2019
