ಬೆಳಗಾವಿ: ರಾಜ್ಯಾದ್ಯಂತ ಚಂಡಮಾರುತದಿಂದಾಗಿ ಅಲ್ಲಲ್ಲಿ ಚೆದುರಿದಂತೆ ಮಳೆ ಆಗುತ್ತಿರುವ ಹಿನ್ನೆಲೆಯಲ್ಲಿ ಇವಿಎಂ, ವಿವಿ ಪ್ಯಾಟ್ ಸಂರಕ್ಷಣೆ ಹಾಗೂ ಮತದಾನಕ್ಕೆ ಅನುಕೂಲ ಕಲ್ಪಿಸುವ ನಿಟ್ಟಿನಲ್ಲಿ ಚುನಾವಣಾ ಅಧಿಕಾರಿಗಳು ಮತಟ್ಟೆಗಳಿಗೆ ತಾಡಪತ್ರಿ ಹೊದಿಕೆ ಹಾಕಲು ಮುಂದಾಗಿದ್ದಾರೆ.
ವಿಧಾನಸಭೆ ಚುನಾವಣೆಯನ್ನು ಸಮರ್ಥವಾಗಿ ಎದುರಿಸಲು ಚುನಾವಣೆ ಆಯೋಗವು ಸಕಲ ಸಿದ್ಧತೆ ಕೈಗೊಂಡಿದೆ. ಆದರೆ, ಮತದಾನ ನಡೆಯುವ ಸೇರಿ ಹಲವು ದಿನಗಳ ಮಳೆಯಾಗುವ ನಿರೀಕ್ಷೆಯಿದೆ. ಹೀಗಾಗಿ ಅಗತ್ಯ ಮುಂಜಾಗ್ರತಾ ಕ್ರಮವಾಗಿ ಆಯೋಗವು 18 ವಿಧಾನಸಭಾ ಕ್ಷೇತ್ರಗಳ ವ್ಯಾಪ್ತಿಯ 4,439 ಮತಗಟ್ಟೆ ಕೇಂದ್ರಗಳ ಛಾವಣಿಗಳಿಗೆ ತಾಡಪತ್ರಿ ಹೊದಿಸಲು ಸಿದ್ಧತೆ ಮಾಡಿಕೊಂಡಿದೆ.
ಇವಿಎಂ ಹಾಗೂ ವಿವಿ ಪ್ಯಾಟ್ ಯಂತ್ರಗಳು ಸೇರಿ ಹಲವು ಇಲೆಕ್ಟ್ರಾನಿಕ್ ಸಾಧನಗಳನ್ನು ಮಳೆಯಲ್ಲಿ ನೆನೆಯದಂತೆ ಸುರಕ್ಷಿತವಾಗಿ ಮತಗಟ್ಟೆಗಳಲ್ಲಿ ಇಡಲು ಹಾಗೂ ಮತದಾನದ ಬಳಿಕ ಸುರಕ್ಷಿತವಾಗಿ ಸ್ಟ್ರಾಂಗ್ ರೂಂಗೆ ರವಾನೆ ಮಾಡಬೇಕಿದೆ. ಹೀಗಾಗಿ ಮತಗಟ್ಟೆಗಳಿಗೆ ತಾಡಪತ್ರಿ, ಜನರೇಟರ್ ಸೇರಿ ಸಕಲ ಸಿದ್ಧತೆ ಮಾಡಿಕೊಳ್ಳುವಂತೆ ಬೆಳಗಾವಿ ಮಹಾನಗರ ಪಾಲಿಕೆ, ನಗರಸಭೆ, ಪುರಸಭೆ, ಪಟ್ಟಣ ಪಂಚಾಯಿತಿ ಹಾಗೂ 484 ಗ್ರಾಪಂಗಳ ಅಧಿಕಾರಿಗಳಿಗೆ ನಿರ್ದೇಶನ ನೀಡಿದೆ. ಅಲ್ಲದೆ, ಅಗತ್ಯವಿರುವ ಕಡೆ ತಾಡಪತ್ರಿಗಳನ್ನು ಖರೀದಿಸಿ ಇಟ್ಟುಕೊಳ್ಳುವಂತೆ ಆಯೋಗ ಸೂಚಿಸಿದೆ.
ಈಗಾಗಲೇ ಹಳೆಯ ಕಟ್ಟಡ, ಹಂಚು ಸೇರಿ ಇತರ ಛಾವಣಿ ಹೊಂದಿರುವ ಮತಗಟ್ಟೆ ಕೇಂದ್ರಗಳ ಮಳೆಗೆ ಸೋರಿಕೆಯಾಗುವ ಕುರಿತು ಅಧಿಕಾರಿಗಳ ತಂಡ ಪರಿಶೀಲನೆ ನಡೆಸುತ್ತಿದೆ. ಅಲ್ಲದೆ, ಎಲ್ಲೆಲ್ಲಿ ಹಂಚಿನ ಛಾವಣಿ ಹೊಂದಿರುವ ಮತಗಟ್ಟೆ ಕೇಂದ್ರಗಳ ಕಟ್ಟಡಗಳಿಗೆ ತಾಡಪತ್ರಿ ಹೊದಿಕೆ ಮಾಡುವ ಕೆಲಸ ಆರಂಭವಾಗಿದೆ. ಮತ್ತೊಂದೆಡೆ ಮಳೆ, ಗಾಳಿಯಿಂದ ವಿದ್ಯುತ್ ಸರಬರಾಜಿನಲ್ಲಿ ಅವಘಡ ಉಂಟಾದ ಸಂದರ್ಭದಲ್ಲಿ ಮತಗಟ್ಟೆಗಳಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಜನರೇಟರ್ ವ್ಯವಸ್ಥೆ ಮಾಡಲಾಗಿದೆ. ಜತೆಗೆ ಮತಯಂತ್ರಗಳು ಕೆಟ್ಟರೆ ದುರಸ್ತಿಗೆ ತಾಂತ್ರಿಕ ತಂಡವನ್ನು ಆಯೋಗ ನಿಯೋಜನೆ ಮಾಡಿದೆ.
ಸೈಕ್ಲೋನ್ ಹಿನ್ನೆಲೆಯಲ್ಲಿ ಅಗತ್ಯ ಮುಂಜಾಗ್ರತಾ ಕ್ರಮವಾಗಿ ಎಲ್ಲ ಮತಗಟ್ಟೆಗಳಲ್ಲಿ ತಾಡಪತ್ರಿ ವ್ಯವಸ್ಥೆ ಮಾಡಲಾಗುತ್ತಿದೆ. ಹಳೆಯ ಕಟ್ಟಡ, ಹಂಚಿನ ಛಾವಣಿ ಹೊಂದಿರುವ ಮತಗಟ್ಟೆ ಕೇಂದ್ರಗಳಿಗೆ ತಾಡಪತ್ರಿ ಹೊದಿಸಲು ಸೂಚಿಸಲಾಗಿದೆ. ಜಿಲ್ಲಾಡಳಿತ ಬಳಿ ಇರುವ 700 ತಾಡಪತ್ರಿ ಬಳಸಲಾಗುತ್ತಿದೆ.
| ನಿತೇಶ ಪಾಟೀಲ, ಜಿಲ್ಲಾ ಚುನಾವಣಾಧಿಕಾರಿ ಬೆಳಗಾವಿ