ನವದೆಹಲಿ: ಕೆಲ ಪೊಲೀಸ್ ಸಿಬ್ಬಂದಿಯೊಂದಿಗೆ ಬಂಡಲ್ಗಟ್ಟಲೆ ನೋಟುಗಳಿರುವ ಮೂರು ಫೋಟೋಗಳನ್ನು ಒಟ್ಟಿಗೆ ಸೇರಿಸಿ ಎಡಿಟ್ ಮಾಡಿರುವ ಫೋಟೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಫೋಟೋ ಕುರಿತು ಗುಜರಾತ್ನಲ್ಲಿರುವ ಆರ್ಎಸ್ಎಸ್ ಬೆಂಬಲಿಗರ ಕಾರಿನಲ್ಲಿ ವಶಪಡಿಸಿಕೊಂಡು ನಕಲಿ ನೋಟುಗಳು ಎಂದು ವಾದಿಸಲಾಗಿದೆ. ಆದರೆ, ಇದರ ಹಿಂದಿನ ಅಸಲಿಯತ್ತು ಏನೆಂಬುದು ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದೆ.
“ಆಮ್ ಆದ್ಮಿ ಜಿಂದಾಬಾದ್” ಮತ್ತು “ಮೊಬೈಲ್ ಟೆಕ್ನಾಲಜಿ” ಹೆಸರಿನ ಫೇಸ್ಬುಕ್ ಪೇಜ್ ಸೇರಿದಂತೆ ಹಲವು ಸಾಮಾಜಿಕ ಜಾಲತಾಣ ವೇದಿಕೆಯಲ್ಲಿ ಎಡಿಟ್ ಮಾಡಿರುವ ಫೋಟೋ ವೈರಲ್ ಆಗಿದ್ದು, ಹಿಂದಿ ಭಾಷೆಯಲ್ಲಿ ಅಡಿಬರಹವನ್ನು ನೀಡಲಾಗಿದೆ. ಅದನ್ನು ತರ್ಜುಮೆ ಮಾಡಿದಾಗ ಬಂಡಲ್ಗಟ್ಟಲೇ ನಕಲಿ ನೋಟುಗಳನ್ನು ಗುಜರಾತ್ನಲ್ಲಿ ವಶಪಡಿಸಿಕೊಳ್ಳಲಾಗಿದೆ. ನೋಟುಗಳನ್ನು ಆರ್ಎಸ್ಎಸ್ನ ನಿಷ್ಠಾವಂತ ಕಾರ್ಯಕರ್ತ ಕೇಟನ್ ಡೇವ್ ಎಂಬುವರ ಕಾರಿನಲ್ಲಿ ವಶಪಡಿಸಿಕೊಳ್ಳಲಾಗಿದೆ ಎಂದು ಬರೆದು ಫೋಟೋ ವೈರಲ್ ಮಾಡಿದ್ದಾರೆ.
ಅನೇಕ ಫೇಸ್ಬುಕ್ ಬಳಕೆದಾರರು ಹಿಂದೆ ಮುಂದೆ ನೋಡದೆ ಫೋಸ್ಟ್ ಅನ್ನು ಶೇರ್ ಮಾಡಿಕೊಂಡಿದ್ದಾರೆ. ಅಲ್ಲದೆ, ಬಂಗಾಳಿ ಭಾಷೆಯಲ್ಲಿಯೋ ಒಂದು ಪೋಸ್ಟ್ ಶೇರ್ ಆಗಿದೆ. ಆದರೆ, “ಆಮ್ ಆದ್ಮಿ ಜಿಂದಾಬಾದ್” ಮತ್ತು “ಮೊಬೈಲ್ ಟೆಕ್ನಾಲಜಿ” ಪೇಜ್ನಲ್ಲಿ ಪೋಸ್ಟ್ ವೈರಲ್ ಆದ ಬಳಿಕ ಡಿಲೀಟ್ ಮಾಡಲಾಗಿದೆ. ಆದರೂ ಅದರ ಸ್ಕ್ರೀನ್ ಶಾಟ್ ನೀವಿಲ್ಲಿ ಕಾಣಬಹುದಾಗಿದೆ.
ಇದು ಎಷ್ಟು ಸತ್ಯ ಎಂದು ತಿಳಿಯಲು ಇಂಡಿಯಾ ಟುಡೇ ಆ್ಯಂಟಿ ನ್ಯೂಸ್ ವಾರ್ ರೂಮ್ ಫ್ಯಾಕ್ಟ್ಚೆಕ್ ನಡೆಸಿದೆ. ಇದರಲ್ಲಿ ತಿಳಿದುಬಂದು ಪ್ರಮುಖವಾದ ಅಂಶವೆಂದರೆ ವೈರಲ್ ಪೋಸ್ಟ್ನಲ್ಲಿರುವ ಫೋಟೋ ಗುಜರಾತ್ಗೆ ಸಂಬಂಧಿಸಿದ್ದಲ್ಲ. ಬದಲಾಗಿ ತೆಲಂಗಾಣಕ್ಕೆ ಸಂಬಂಧಿಸಿದ್ದು, ಅಪಪ್ರಚಾರ ನಡೆಸಲು ಫೋಟೋವನ್ನು ಬಳಸಿಕೊಳ್ಳಲಾಗಿದೆ ಎಂಬ ಸತ್ಯಾಂಶ ಹೊರಬಿದ್ದಿದೆ.
ವೈರಲ್ ಫೋಟೋವನ್ನು ಗೂಗಲ್ ರಿವರ್ಸ್ ಸರ್ಚ್ ಇಂಜಿನ್ಗೆ ಹಾಕಿ ನೋಡಿದಾಗ ಹಲವು ಪತ್ರಿಕೆಗಳಲ್ಲಿ ವೈರಲ್ ಫೋಟೋ ಬಳಕೆಯಾಗಿರುವುದು ಪತ್ತೆಯಾಗಿದೆ. ತೆಲಂಗಾಣ ಟುಡೇ ಮತ್ತು ಟೈಮ್ಸ್ ಆಫ್ ಇಂಡಿಯಾದ ಪತ್ರಿಕೆ ಪ್ರಕಾರ ನವೆಂಬರ್ 2, 2019ರಂದು ತೆಲಂಗಾಣ ಪೊಲೀಸರು, ಐದು ಮಂದಿಯುಳ್ಳ ಗ್ಯಾಂಗ್ ಒಂದನ್ನು ಭೇದಿಸಿ ಅವರಿಂದ ನಕಲಿ ನೋಟುಗಳನ್ನು ವಶಪಡಿಸಿಕೊಂಡಿತ್ತು ಎಂದು ವರದಿಯಾಗಿದೆ. ಖಮ್ಮಾಮ್ನಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ಗ್ಯಾಂಗ್ನಿಂದ 6 ಕೋಟಿ ರೂ.ಗೂ ಅಧಿಕ ನಕಲಿ ನೋಟುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದರು ಎಂದು ವರದಿಯಲ್ಲಿ ಉಲ್ಲೇಖವಾಗಿದೆ.
ಕೇಟನ್ ಡೇವ್ಗೂ ಆರ್ಎಸ್ಎಸ್ಗೂ ಸಂಬಂಧವಿಲ್ಲ
ಕೇಟನ್ ಡೇವ್ ಗುಜರಾತ್ ನಕಲಿ ನೋಟುಗಳು ಎಂಬ ಕೀವರ್ಡ್ಸ್ ಸಹಾಯದಿಂದ ಅಂತರ್ಜಾಲದಲ್ಲಿ ಹುಡುಕಾಡಿದಾಗ ಕೇಟನ್ ಡೇವ್ ಹೆಸರಿನ ರಾಜ್ಕೋಟ್ ಮೂಲದ ಫೈನಾನ್ಶಿಯರ್ ಅನ್ನು 2017ರಲ್ಲಿ ವಂಚನೆ ಪ್ರಕರಣದಲ್ಲಿ ಗುಜರಾತ್ನ ರಾಜ್ಕೋಟ್ ಬಳಿ ಬಂಧಿಸಲಾಗಿತ್ತು. ಆತನ ಕಾರಿನಲ್ಲಿ 2000 ಮುಖಬೆಲೆಯ 3.92 ಕೋಟಿ ರೂ. ಮೌಲ್ಯದ ನಕಲಿ ನೋಟುಗಳನ್ನು ವಶಪಡಿಸಿಕೊಳ್ಳಲಾಗಿತ್ತು. ಆತನೇ ನೋಟುಗಳನ್ನು ಮುದ್ರಿಸಿದ್ದಾನೆ ಎಂದು ಶಂಕೆ ವ್ಯಕ್ತವಾಗಿತ್ತು. ಇದನ್ನು ಹಲವು ಮಾಧ್ಯಮಗಳೂ ಕೂಡ ವರದಿ ಮಾಡಿದ್ದವು. ಆದರೆ, ಸದ್ಯ ಜೈಲಿನಲ್ಲಿರುವ ಕೇಟನ್ ಡೇವ್ಗೂ ಆರ್ಎಸ್ಎಸ್ಗೂ ಸಂಬಂಧವಿದೆ ಎಂಬುದಕ್ಕೆ ಯಾವುದೇ ಸಾಕ್ಷ್ಯಾಧಾರ ಇಲ್ಲ.
ಕೊನೆಗೆ ಫ್ಯಾಕ್ಟ್ಚೆಕ್ ತಿಳಿಸುವುದೇನೆಂದರೆ ಎರಡು ಪ್ರತ್ಯೇಕ ಪ್ರಕರಣವನ್ನು ಅಪಪ್ರಚಾರ ನಡೆಸಲು ಬಳಸಿಕೊಳ್ಳಲಾಗಿದೆ. ತೆಲಂಗಾಣದ ಫೋಟೋ ಬಳಸಿಕೊಂಡು ಗುಜರಾತ್ನ ಆರ್ಎಸ್ಎಸ್ಗೆ ಸಂಬಂಧಿಸಿದ್ದು ಎಂದಿಸಿರುವುದು ಅಕ್ಷರಶಃ ಸುಳ್ಳು ಎಂಬುದನ್ನು ಫ್ಯಾಕ್ಟ್ಚೆಕ್ ಬಹಿರಂಗಪಡಿಸಿದೆ. (ಏಜೆನ್ಸೀಸ್)