ಇಟಾ: ಎರಡು ದೇಶಗಳ ಇಬ್ಬರ ನಡುವಿನ ಫೇಸ್ಬುಕ್ ಫ್ರೆಂಡ್ಷಿಪ್ ಮದುವೆಯಲ್ಲಿ ಕೊನೆಯಾಗಿದೆ. ಅದೇ ಕಾರಣಕ್ಕೆ ಸ್ವೀಡನ್ ಯುವತಿಯೊಬ್ಬಳು ಭಾರತಕ್ಕೆ ಬಂದು ವಿವಾಹವಾಗಿದ್ದಾಳೆ. ಉತ್ತರಪ್ರದೇಶದಲ್ಲಿ ಇಬ್ಬರ ಮಧ್ಯೆ ಜ. 27ರಂದು ವಿವಾಹವಾಗಿದೆ.
ಉತ್ತರಪ್ರದೇಶದ ಪವನ್ ಕುಮಾರ್ ಮತ್ತು ಸ್ವೀಡನ್ ಯುವತಿ ಕ್ರಿಸ್ಟೆನ್ ಲೀಬರ್ಟ್ ಮದುವೆಯಾದ ಜೋಡಿ. ಇಲ್ಲಿನ ಇಟಾ ಎಂಬಲ್ಲಿನ ಸ್ಥಳೀಯ ಶಾಲೆಯೊಂದರಲ್ಲಿ ಹಿಂದೂ ಸಂಪ್ರದಾಯದ ಪ್ರಕಾರ ಸರಳವಾಗಿ ವಿವಾಹವಾಗಿದ್ದಾರೆ. ಪವನ್ಕುಮಾರ್ ಬಿ.ಟೆಕ್ ಪದವೀಧರನಾಗಿದ್ದು, ಇಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದಾನೆ.
ಇವರಿಬ್ಬರೂ 2012ರಲ್ಲಿ ಫೇಸ್ಬುಕ್ನಲ್ಲಿ ಫ್ರೆಂಡ್ ಆಗಿದ್ದರು. ಈ ಹಿಂದೆಯೂ ಭಾರತಕ್ಕೆ ಬಂದಿದ್ದಾಗಿ ಹೇಳಿಕೊಂಡಿರುವ ಈಕೆ, ನಾನು ಭಾರತವನ್ನು ಪ್ರೀತಿಸುತ್ತೇನೆ. ಈ ಮದುವೆಯ ಕುರಿತು ಸಂತೋಷವಾಗಿದ್ದೇನೆ ಎಂಬುದಾಗಿ ಹೇಳಿದ್ದಾಳೆ.