ಬದಲಾದ ಟಿವಿ ಬಯಲಾದ ಠೀವಿ

ಮನರಂಜನೆ ನೀಡುವುದರಲ್ಲಷ್ಟೇ ಅಲ್ಲ, ವಿಶ್ವದ ಸಂಘರ್ಷಗಳು ಹಾಗೂ ಸುರಕ್ಷತೆಯ ಸವಾಲುಗಳ ಕುರಿತು ಗಮನಸೆಳೆಯುವಲ್ಲಿ, ಪ್ರಮುಖ ಸಮಸ್ಯೆಗಳ ಮೇಲೆ ಬೆಳಕು ಚೆಲ್ಲುವಲ್ಲಿ ಟಿ.ವಿ. ಮಾಧ್ಯಮದ ಪ್ರಭಾವ ಗಣನೀಯವಾದದ್ದು. ಇದನ್ನು ಗುರುತಿಸಲೆಂದೇ ವಿಶ್ವಸಂಸ್ಥೆಯು ಟಿ.ವಿ. ಕಂಡುಹಿಡಿದ ದಿನವಾದ ನ.21 ಅನ್ನು‘ವಿಶ್ವ ಟಿ.ವಿ. ದಿನ’ ಎಂದು ಘೋಷಿಸಿದೆ.

|ಟಿ. ಜಿ. ಶ್ರೀನಿಧಿ

ತನ್ನಲ್ಲಿರುವ ಮಾಹಿತಿಯನ್ನು ಒಂದೇ ಬಾರಿಗೆ ಅನೇಕರಿಗೆ ತಲುಪಿಸಬೇಕೆನ್ನುವ ಮಾನವನ ಅಪೇಕ್ಷೆ ಬಹಳ ಹಿಂದಿನದು. ಹಿಂದಿನ ಕಾಲದಲ್ಲಿ ಸಂದೇಶಗಳನ್ನು ರವಾನಿಸಲು ಡಂಗುರ ಸಾರಿಸುತ್ತಿದ್ದರಲ್ಲ, ಅದರ ಹಿನ್ನೆಲೆಯಲ್ಲಿದ್ದದೂ ಇದೇ ಅಪೇಕ್ಷೆ. ಇಂದಿನ ವೆಬ್​ಸೈಟ್-ಸೋಷಿಯಲ್ ಮೀಡಿಯಾಗಳ ಉದ್ದೇಶವೂ ಭಿನ್ನವೇನಲ್ಲ. ಹೀಗೆ ಮಾಹಿತಿ ಪ್ರಸರಣ ಬೆಳೆದುಬಂದ ಹಾದಿಯಲ್ಲಿ ಕೆಲವು ಮಹತ್ವದ ಮೈಲಿಗಲ್ಲುಗಳನ್ನು ನಾವು ನೋಡಬಹುದು. ಪ್ರಸರಣದ ವ್ಯಾಪ್ತಿಯನ್ನು ಗಮನಾರ್ಹವಾಗಿ ವಿಸ್ತರಿಸಿದ, ದೊಡ್ಡ ಸಮುದಾಯಗಳನ್ನು ತಲುಪಲು ಸಾಧ್ಯವಾಗಿಸಿದ ರೇಡಿಯೋ ಜಾಲದ ಬೆಳವಣಿಗೆ ಇಂತಹ ಮೈಲಿಗಲ್ಲುಗಳಲ್ಲೊಂದು. ಇಂಥದ್ದೇ ಇನ್ನೊಂದು ಮೈಲಿಗಲ್ಲು ಟಿ.ವಿ.ಯ ಹುಟ್ಟು. ಬಹುಮಟ್ಟಿಗೆ ಪಠ್ಯ ಹಾಗೂ ಧ್ವನಿಗಷ್ಟೇ ಸೀಮಿತವಾಗಿದ್ದ ಸಂವಹನಕ್ಕೆ ಹೊಸ ಆಯಾಮ ನೀಡಿದ್ದು, ಜಗತ್ತಿನ ಆಗುಹೋಗುಗಳನ್ನೆಲ್ಲ ವೀಕ್ಷಕರ ಮನೆಯೊಳಕ್ಕೇ ತಂದುಕೊಟ್ಟಿದ್ದು ಈ ಮಾಧ್ಯಮದ ಹೆಚ್ಚುಗಾರಿಕೆ.

ಮನೆಮನ ಮುಟ್ಟಿದ ಟಿ.ವಿ: ಟಿ.ವಿ.ಯ ಉಗಮ ಹಾಗೂ ವಿಕಾಸ, 19-20ನೇ ಶತಮಾನಗಳ ಇತಿಹಾಸದ ಪ್ರಮುಖ ಘಟನೆಗಳಲ್ಲೊಂದು. ವಿಶ್ವದೆಲ್ಲೆಡೆ ಸಕ್ರಿಯರಾಗಿದ್ದ ಅನೇಕ ವಿಜ್ಞಾನಿಗಳ ಪರಿಶ್ರಮ ಇದರ ಹಿಂದಿತ್ತು. ಚಲಿಸುವ ಚಿತ್ರಗಳ ಪ್ರಸರಣವನ್ನು ಸಾಧ್ಯವಾಗಿಸುವುದು ಈ ಎಲ್ಲರ ಉದ್ದೇಶವಾಗಿತ್ತು. ಇಂತಹ ಅನೇಕ ಪ್ರಯತ್ನಗಳ ಫಲವಾಗಿ 1920ರ ದಶಕದಲ್ಲಿ ಟಿ.ವಿ. ತಂತ್ರಜ್ಞಾನ ಪ್ರಾಯೋಗಿಕ ಯಶಸ್ಸು ಪಡೆಯಿತು. ಮೊತ್ತಮೊದಲ ಟಿ.ವಿ. ಪ್ರಸಾರ ಕೇಂದ್ರ ಅಮೆರಿಕಾದಲ್ಲಿ 1928ರಲ್ಲಿ ಪ್ರಾರಂಭವಾಯಿತು. ಮುಂದೆ ಇಂತಹ ಕೇಂದ್ರಗಳು ವಿಶ್ವದ ಇತರ ದೇಶಗಳಲ್ಲೂ ಪ್ರಾರಂಭವಾದವು. ಭಾರತದಲ್ಲಿ ಟಿ.ವಿ. ಪ್ರಸಾರ ಪ್ರಾಯೋಗಿಕವಾಗಿ ಪ್ರಾರಂಭವಾದದ್ದು 1959ರಲ್ಲಿ. ಮೊದಲು ದೆಹಲಿಯಲ್ಲಿ, ನಂತರ ಮುಂಬೈ-ಅಮೃತಸರದಲ್ಲಿ ಪ್ರಾರಂಭವಾದ ಟಿ.ವಿ. ಪ್ರಸಾರ 1975ರ ವೇಳೆಗೆ ಏಳು ನಗರಗಳನ್ನು ತಲುಪಿತ್ತು. ಎಂಬತ್ತರ ದಶಕದಲ್ಲಿ ರಾಷ್ಟ್ರೀಯ ಪ್ರಸಾರ ಪ್ರಾರಂಭವಾಯಿತು, ಬಣ್ಣದ ಟಿವಿಯೂ ಬಂತು. ಭಾರತೀಯ ಟಿವಿ ಉದ್ಯಮದಲ್ಲಿ ಕ್ರಾಂತಿಕಾರಕ ಬದಲಾವಣೆಗಳಿಗೆ ಸಾಕ್ಷಿಯಾದದ್ದು ತೊಂಬತ್ತರ ದಶಕ. ಖಾಸಗಿ ಹಾಗೂ ವಿದೇಶಿ ಸಂಸ್ಥೆಗಳೂ ಟಿವಿ ಪ್ರಸಾರ ಪ್ರಾರಂಭಿಸಿದ್ದು ಆ ಅವಧಿಯಲ್ಲಿ. ಅಲ್ಲಿಂದ ಮುಂದಕ್ಕೆ ನಮ್ಮನ್ನು ಗಾಢವಾಗಿ ಪ್ರಭಾವಿಸುತ್ತ ಬಂದಿರುವ ಟಿವಿ ನಮ್ಮ ದೈನಂದಿನ ಬದುಕಿನ ಅವಿಭಾಜ್ಯ ಅಂಗವೇ ಆಗಿಬಿಟ್ಟಿದೆ!

ಕಪ್ಪು ಬಿಳುಪಿನಿಂದ ಕರ್ವ್್ಡ ಎಲ್​ಇಡಿವರೆಗೆ: ಟಿ.ವಿ. ಪ್ರಸಾರ ಪ್ರಾರಂಭವಾದದ್ದು ಕಪ್ಪು-ಬಿಳುಪಿನಿಂದ. ಕೆಲವು ವರ್ಷಗಳ ನಂತರ, ಕಾರ್ಯಕ್ರಮಗಳು ಬಹುವರ್ಣದಲ್ಲೂ ಮೂಡಿಬಂದಾಗ, ಅವನ್ನು ನಮ್ಮ ಮನೆಗೆ ತಲುಪಿಸಲು ಬಣ್ಣದ ಟಿ.ವಿ.ಗಳೂ ಬಂದವು. ಈ ಬದಲಾವಣೆ ಆದಾಗ ಟಿ.ವಿ.ಯ ಬಾಹ್ಯ ಸ್ವರೂಪದಲ್ಲಿ ಹೆಚ್ಚಿನ ವ್ಯತ್ಯಾಸವೇನೂ ಆಗಿರಲಿಲ್ಲ. ಬಹಳ ವರ್ಷಗಳ ನಂತರ ಇದರ ವಿನ್ಯಾಸದಲ್ಲಿ ಹೊಸತನಕ್ಕೆ ಕಾರಣವಾದದ್ದು ಹೊರಗೆ ಉಬ್ಬಿದಂತಿರುತ್ತಿದ್ದ ಪರದೆಗಳ ಜಾಗಕ್ಕೆ ಬಂದ ಚಪ್ಪಟೆ ಪರದೆ (ಫ್ಲಾಟ್ ಸ್ಕ್ರೀನ್). ಮುಂದೆ ಪ್ರದರ್ಶನ ತಂತ್ರಜ್ಞಾನವೂ ಬದಲಾದಂತೆ ಗಾತ್ರವೂ ಗಣನೀಯವಾಗಿ ಕಡಿಮೆಯಾಯಿತು. ಕ್ಯಾಥೋಡ್ ರೇ ಟ್ಯೂಬ್ (ಸಿಆರ್​ಟಿ) ಜಾಗದಲ್ಲಿ ಪ್ಲಾಸ್ಮಾ-ಎಲ್​ಸಿಡಿ-ಎಲ್​ಇಡಿ ತಂತ್ರಜ್ಞಾನಗಳು ಬಂದಾಗ ಟಿವಿಯಲ್ಲಿ ಕಾಣುವ ಚಿತ್ರಗಳ ಗುಣಮಟ್ಟ ಸುಧಾರಿಸಿತು. ಇದರಿಂದಾಗಿ ಹೆಚ್ಚು ಸ್ಪಷ್ಟವಾದ, ತಾಂತ್ರಿಕವಾಗಿ ಉನ್ನತ ಗುಣಮಟ್ಟದ ಚಿತ್ರಗಳ ಪ್ರಸರಣಕ್ಕೂ ಒತ್ತು ಸಿಕ್ಕಿತು. ಎಚ್​ಡಿ, 4ಕೆ ತಂತ್ರಜ್ಞಾನಗಳೆಲ್ಲ ಬೆಳೆದದ್ದು ಹೀಗೆ.

ಬದಲಾದ ಟಿವಿ

ಬಯಲಾದ ಠೀವಿ

ಈಗಂತೂ ನೈಜ ದೃಶ್ಯಗಳಿಗೆ ಅತ್ಯಂತ ಸಮೀಪವಾದ ಗುಣಮಟ್ಟದಲ್ಲಿ ಚಿತ್ರಗಳನ್ನು ಮೂಡಿಸಲು ಟಿವಿ ನಿರ್ವಪಕರು ಪ್ರಯತ್ನಿಸುತ್ತಿದ್ದಾರೆ. ಚಪ್ಪಟೆ ಪರದೆಯ ಬದಲು ಒಳಗೆ ಬಾಗಿದಂತಹ ಪರದೆಗಳನ್ನು ಪರಿಚಯಿಸುವ ಪ್ರಯೋಗ ಇದೇ ಪ್ರಯತ್ನದ ಫಲಿತಾಂಶ.

ಮೊದಲು, ಆಂಟೆನಾ ಸಹಾಯದಿಂದ ನೋಡುತ್ತಿದ್ದಾಗ, ಬಳಕೆಯಾಗುತ್ತಿದ್ದದ್ದು ‘ಟೆರೆಸ್ಟ್ರಿಯಲ್ ಟೆಲಿವಿಷನ್’ ತಂತ್ರಜ್ಞಾನ. ಆನಂತರ ಕೇಬಲ್ ಟಿ.ವಿ. ಹಾಗೂ ಡಿಟಿಎಚ್​ಗಳ ಮೂಲಕ ಉಪಗ್ರಹಗಳ ಬಳಕೆ ಪ್ರಾರಂಭವಾಯಿತು. ಇದರ ಜತೆಗೇ ಅಭಿವೃದ್ಧಿಯಾದ ತಂತ್ರಜ್ಞಾನದಿಂದಾಗಿ ಬೇಕಾದ ವಾಹಿನಿಗಳಿಗೆ ಮಾತ್ರ ಚಂದಾದಾರರಾಗುವುದು, ಕಾರ್ಯಕ್ರಮಗಳ ವೇಳಾಪಟ್ಟಿ ವೀಕ್ಷಿಸುವುದು, ಬೇಕಾದ್ದನ್ನು ರೆಕಾರ್ಡ್ ಮಾಡಿಟ್ಟುಕೊಳ್ಳುವುದು ಮುಂತಾದ ಕೆಲ ಸೌಲಭ್ಯಗಳು ವೀಕ್ಷಕರಿಗೆ ದೊರೆತವು.

ಟಿ.ವಿ.ಗೆ ಅಂತರ್ಜಾಲ ಸಂಪರ್ಕ ದೊರೆತು ‘ಸ್ಮಾರ್ಟ್ ಟಿವಿ’ಗಳ ಸೃಷ್ಟಿಯಾದದ್ದು ಮಹತ್ವದ ಬದಲಾವಣೆ. ಕಂಪ್ಯೂಟರ್-ಮೊಬೈಲ್​ಗಳಲ್ಲಿದ್ದ ಸೌಲಭ್ಯ ಟಿ.ವಿ.ಯಲ್ಲೂ ದೊರೆತದ್ದೇನೋ ಸರಿ. ಕಾರ್ಯಕ್ರಮಗಳ ವೀಕ್ಷಣೆಗೆ ಟಿ.ವಿ.ಯೇ ಬೇಕು ಎನ್ನುವ ಪರಿಸ್ಥಿತಿಯೂ ಅಂತರ್ಜಾಲದಿಂದಾಗಿ ಇದೀಗ ಬದಲಾಗುತ್ತಿದೆ. ಟಿ.ವಿ. ಕಾರ್ಯಕ್ರಮಗಳ ನೇರಪ್ರಸಾರವನ್ನು ನಾವೀಗ ಮೊಬೈಲಿನಲ್ಲೇ ನೋಡಬಹುದಲ್ಲ!

ಟಿ.ವಿ.ಯನ್ನು ಒಂದು ಸಾಧನವಾಗಿ ಬಳಸುತ್ತೇವೆಯೋ ಇಲ್ಲವೋ, ಆದರೆ ಈ ಮಾಧ್ಯಮ ಹಿಂದೆಂದಿಗಿಂತ ಹೆಚ್ಚು ಪ್ರಭಾವಶಾಲಿಯಾಗಿದೆ ಹಾಗೂ ಹೆಚ್ಚು ವೀಕ್ಷಕರನ್ನು ತಲುಪುತ್ತಿದೆ. ಅದರ ಸಾಧ್ಯತೆಗಳನ್ನು ಸಮರ್ಪಕವಾಗಿ ಬಳಸುವ, ಉತ್ತಮ ಕಾರ್ಯಕ್ರಮಗಳನ್ನು ಪ್ರೋತ್ಸಾಹಿಸಿ ಇದರ ಭವಿಷ್ಯವನ್ನು ಪರಿಣಾಮಕಾರಿಯಾಗಿ ರೂಪಿಸುವ ಜವಾಬ್ದಾರಿಯೂ ನಮ್ಮ ಮೇಲಿದೆ.

ಮುಂದಿನ ಹಾದಿ

ಮಾಹಿತಿ ತಂತ್ರಜ್ಞಾನ, ಅದರಲ್ಲೂ ಮುಖ್ಯವಾಗಿ ಅಂತರ್ಜಾಲದ ಬೆಳವಣಿಗೆಯಿಂದಾಗಿ ಟಿ.ವಿ.ಯ ಸ್ವರೂಪ ಗಮನಾರ್ಹವಾಗಿ ಬದಲಾಗುತ್ತಿದೆ. ನಮ್ಮ ಕಾರ್ಯಕ್ರಮಗಳನ್ನು ನಾವೇ ರೂಪಿಸಿ ಪ್ರಕಟಿಸುವ ಅವಕಾಶವನ್ನು ಸಾಮಾಜಿಕ ಜಾಲತಾಣಗಳು ಇಂದು ಎಲ್ಲರಿಗೂ ನೀಡಿವೆ. ಒಂದು ಉತ್ತಮ ಕ್ಯಾಮರಾ, ವೀಡಿಯೋ ಎಡಿಟಿಂಗ್ ಕೌಶಲ ಹಾಗೂ ಅಂತರ್ಜಾಲ ಸಂಪರ್ಕ ಇದ್ದರೆ ಸಾಕು, ನಾವು ನಮ್ಮದೇ ಕಾರ್ಯಕ್ರಮಗಳನ್ನು ಯೂಟ್ಯೂಬ್ – ಫೇಸ್​ಬುಕ್ ಮುಂತಾದೆಡೆಗಳಲ್ಲಿ ಪ್ರಸಾರ ಮಾಡಬಹುದು. ಅಷ್ಟೇ ಅಲ್ಲ, ‘ಓವರ್ ದ ಟಾಪ್’ (ಓಟಿಟಿ) ‘ಸ್ಟ್ರೀಮಿಂಗ್’ ತಂತ್ರಜ್ಞಾನ ಬಳಸಿ ಅಂತರ್ಜಾಲದಲ್ಲಿ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡುವ ಮೂಲಕ ಕಡಿಮೆ ಖರ್ಚಿನಲ್ಲೇ ಹೆಚ್ಚು ವೀಕ್ಷಕರನ್ನು ತಲುಪುವುದು ಕೂಡ ಸಾಧ್ಯವಾಗಿದೆ. ನೆಟ್​ಫ್ಲಿಕ್ಸ್, ಅಮೆಜಾನ್ ಪ್ರೖೆಮ್ ಮೊದಲಾದ ಇಂತಹ ವ್ಯವಸ್ಥೆಗಳು ಹೊಸ ಅವಕಾಶಗಳನ್ನು ಸೃಷ್ಟಿಸಿರುವುದಷ್ಟೇ ಅಲ್ಲ, ಸಾಂಪ್ರದಾಯಿಕ ಟಿವಿಗೆ ಪ್ರತಿಸ್ಪರ್ಧಿಯಾಗಿಯೂ ಬೆಳೆಯುತ್ತಿವೆ.

ತಂದೆಯ ಶೋಧನೆ

ಬಗ್ಗೆ ಮಗನ ವೇದನೆ

1920ರ ದಶಕದಲ್ಲಿ 14 ವರ್ಷದ ಫಿಲೋ ಟಿ. ಫರ್ನ್ಸ್​ವರ್ತ್ ಟಿ.ವಿ. ಕಂಡುಹಿಡಿದರು. ಜಗತ್ತಿನ ಎಲ್ಲಾ ಮೂಲೆಯ ಜನರು ಒಬ್ಬರನ್ನೊಬ್ಬರು ಅರಿತು ಸಮಸ್ಯೆ ಬಗೆಹರಿಸಿಕೊಳ್ಳುವುದು ಅವರ ಸಂಶೋಧನೆಯ ಮುಖ್ಯ ಉದ್ದೇಶವಾಗಿತ್ತು. ಜೊತೆಗೆ ಟಿ.ವಿ. ಮೂಲಕ ಜಗತ್ತಿನ ಸಾಂಸ್ಕೃತಿಕ ಹಾಗೂ ಶೈಕ್ಷಣಿಕ ಪದ್ಧತಿಗಳನ್ನು ಅರಿಯಬಹುದು ಎಂಬ ಉದ್ದೇಶವೂ ಅವರಿಗಿತ್ತು. 1971ರಲ್ಲಿ ಅವರು ನಿಧನರಾದರು. ಬದಲಾದ ಕಾಲಘಟ್ಟದಲ್ಲಿ ಟಿ.ವಿ.ಯಲ್ಲಿ ಬರುತ್ತಿರುವ ಕಾರ್ಯಕ್ರಮಗಳನ್ನು ವೀಕ್ಷಿಸುತ್ತಿರುವ ಅವರ ಮಗ ಕೆಂಟ್ ತೀವ್ರ ಸಂಕಟಪಡುತ್ತಿದ್ದಾರೆ. ‘ಈಗಿನ ಕಾರ್ಯಕ್ರಮಗಳನ್ನು ನೋಡಿದರೆ ತುಂಬಾ ವಿಷಾದವಾಗುತ್ತದೆ. ನನ್ನ ತಂದೆಯ ಉದ್ದೇಶ ಇದಾಗಿರಲಿಲ್ಲ. ಭವಿಷ್ಯದಲ್ಲಿ ಈ ರೀತಿಯ ಕಾರ್ಯಕ್ರಮಗಳು ಟಿ.ವಿ.ಯಲ್ಲಿ ಬರುತ್ತವೆ ಎಂದು ತಿಳಿದಿದ್ದರೆ, ತಂದೆ ಅದನ್ನು ಶೋಧನೆ ಮಾಡುತ್ತಲೇ ಇರಲಿಲ್ಲ’ ಎಂದು ಕೆಂಟ್ ದುಃಖ ತೋಡಿಕೊಂಡಿದ್ದಾರೆ.21