ಈ ಆನೆ ಕಳ್ಳತನ ಮಾಡಿದೆ. ಕಳವು ಮಾಡುವುದಕ್ಕಾಗಿ ಬರೋಬ್ಬರಿ 5 ಫೂಟ್ ಎತ್ತರದ ಗೋಡೆಯನ್ನು ತುಂಬ ಎಚ್ಚರಿಕೆಯಿಂದ ದಾಟಿದೆ…!
ಜಾಂಬಿಯಾದ ದಕ್ಷಿಣ ಲುವಾಂಗ್ವಾ ರಾಷ್ಟ್ರೀಯ ಉದ್ಯಾನದ ಫ್ಮೂವೆ ಸಫಾರಿ ಲಾಡ್ಜ್ನಲ್ಲಿ ಆನೆಯೊಂದು 5 ಅಡಿ ಎತ್ತರದ ಗೋಡೆ ದಾಟಿ ಹೋದ ವಿಡಿಯೋ, ಫೋಟೋಗಳು ಸಿಕ್ಕಾಪಟೆ ವೈರಲ್ ಆಗಿದ್ದು ನೆಟ್ಟಿಗರ ಮನ ಗೆದ್ದಿದೆ.
ಫ್ಮೂವೆ ಸಫಾರಿ ಲಾಡ್ಜ್ನಿಂದ ಶನಿವಾರ ಮಧ್ಯಾಹ್ನ ಸಫಾರಿಗೆ ಒಂದಷ್ಟು ಜನರು ತೆರಳಿದ್ದರು. ಅವರೆಲ್ಲ ಆ ಕಡೆ ಹೋಗುತ್ತಿದ್ದಂತೆ ನ್ಯಾಷನಲ್ ಪಾರ್ಕ್ನಲ್ಲಿ ಇದ್ದ ಆನೆ ನಿಧಾನಕ್ಕೆ ಈ ಕಡೆ ಬಂತು. ಅಷ್ಟಕ್ಕೂ ಆನೆ ಸಫಾರಿ ಲಾಡ್ಜ್ಗೆ ಅಷ್ಟು ಹರಸಾಹಸ ಮಾಡಿ ಹೋಗಿದ್ದು ಮಾವಿನಹಣ್ಣುಗಳಿಗಾಗಿ…!
5 ಅಡಿ ಎತ್ತರದ ಗೋಡೆಯನ್ನೂ ಕೆಡುವಬಾರದು, ತಾನೂ ಬೀಳಬಾರದು ಎಂಬ ರೀತಿ ಆನೆ ಕಟ್ಟೆಚ್ಚರಿಂದ ಆ ಕಾಂಪೌಂಡ್ನ್ನು ದಾಟುತ್ತಿರುವ ಫೋಟೋಗಳನ್ನು ಅಲ್ಲಿಯೇ ಇದ್ದ ಲಾಡ್ಜ್ನ ಜನರಲ್ ಮ್ಯಾನೇಜರ್ ಇಯಾನ್ ಸಾಲಿಸ್ಬರಿ ಸೆರೆ ಹಿಡಿದಿದ್ದಾರೆ. ಪಕ್ಕಾ ಮನುಷ್ಯರಂತೆಯೇ ಗೋಡೆಯನ್ನು ಆನೆ ದಾಟಿದೆ.
ಬಳಿಕ ಆನೆ ಲಾಡ್ಜ್ ಬಳಿ ಅಲೆದಾಡುತ್ತ, ಮಾವಿನ ಹಣ್ಣಿಗಾಗಿ ಹುಡುಕಾಡುವುದನ್ನು ಲಾಡ್ಜ್ ಮಾಲೀಕ, ಎಂಡಿ ಆ್ಯಂಡಿ ಹಾಗ್ ಸೆರೆ ಹಿಡಿದಿದ್ದಾರೆ. ಆದರೆ ಕೊನೆಗೂ ಅದಕ್ಕೆ ಹಣ್ಣುಗಳು ಸಿಗಲೇ ಇಲ್ಲ.
ಮಾವಿನಹಣ್ಣಿನ ಸೀಸನ್ನಲ್ಲಿ ಆನೆಗಳು ಇಲ್ಲಿಗೆ ಬರುವುದು ಸಾಮಾನ್ಯ. ಆದರೆ ಈ ಆನೆ ತುಂಬ ತಡಮಾಡಿಬಿಟ್ಟಿದೆ ಎಂದು ಅಲ್ಲಿನ ಜನರಲ್ ಮ್ಯಾನೇಜರ್ ಹೇಳಿದ್ದಾರೆ.(ಏಜೆನ್ಸೀಸ್)