ನವದೆಹಲಿ: ಮುಂಬರುವ ದೆಹಲಿ ಚುನಾವಣೆಯಲ್ಲಿ ಟೆಕ್ನಾಲಜಿ ಬಹು ಮುಖ್ಯ ಪಾತ್ರ ವಹಿಸಲಿದೆ. ಮತದಾರರ ಗುರುತಿನ ಚೀಟಿಗೆ ಕ್ಯೂಆರ್ ಕೋಡ್ ಅಳವಡಿಸಲಾಗುತ್ತಿದೆ.
ದೇಶದಲ್ಲೇ ಮೊದಲ ಬಾರಿಗೆ ಪ್ರತಿ ಮತದಾನ ಕೇಂದ್ರದಲ್ಲಿ ಬೂತ್ ಅಪ್ಲಿಕೇಶನ್ ಅನ್ನು ಬಳಸಲಾಗುತ್ತದೆ ಎಂದು ಮುಖ್ಯ ಚುನಾವಣಾಧಿಕಾರಿಗಳು ತಿಳಿಸಿದ್ದಾರೆ.
ಈ ಕ್ಯೂರ್ ಕೋಡ್ ಅಳವಡಿಕೆಯಿಂದ ಮತದಾನದ ಪ್ರಕ್ರಿಯೆಗೆ ವೇಗ ಸಿಗಲಿದೆ. ಮತದಾರರ ಚೀಟಿಯಲ್ಲಿನ ಕೋಡ್ನಿಂದ ಅವರ ಗುರುತು ಪತ್ತೆ ಹಚ್ಚಲು ಸುಲಭವಾಗಲಿದೆ.
ಈ ಆ್ಯಪ್ನಿಂದ ಮತ ಕೇಂದ್ರದ ಮುಂದೆ ಎಷ್ಟು ಜನ ಸಾಲಿನಲ್ಲಿ ನಿಂತಿದ್ದಾರೆ ಎನ್ನುವ ಮಾಹಿತಿ ಸಿಗಲಿದೆ. ಇದರಿಂದ ಯಾವ ಸಮಯಕ್ಕೆ ಮತದಾನಕ್ಕೆ ಬರಬಹುದು ಎಂದು ಅಂದಾಜಿಸಬಹುದು. ಹಾಗಾಗಿ ಇನ್ನು ಮುಂದೆ ಸಾಲಿನಲ್ಲಿ ನಿಲ್ಲುವ ಅಗತ್ಯವಿರುವುದಿಲ್ಲ.
ಬೂತ್ಗೆ ಮೊಬೈಲ್ ತರಲು ಅನುಮತಿ ನೀಡಿ ಅದರಿಂದ ಕ್ಯೂಆರ್ ಕೋಡ್ನ್ನು ಡೌನ್ಲೋಡ್ ಮಾಡಿಕೊಳ್ಳಲು ಅನುಕೂಲ ಮಾಡಿಕೊಡಲಾಗುತ್ತದೆ. ಮತದಾರರು ಚೀಟಿಯನ್ನು ತರದಿದ್ದರೂ ಆ್ಯಪ್ ಮೂಲಕ ಅವರ ಮತದಾನದ ಹಕ್ಕನ್ನು ಕಾಯ್ದಿರಿಸಲಾಗುವಂತೆ ಮಾಡುವ ಪ್ರಸ್ತಾಪವಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಮತದಾನಕ್ಕೆ ಅನುಕೂಲವಾಗಲು ಬ್ರೈಲ್ ಎಪಿಕ್, ಬ್ರೈಲ್ನಲ್ಲೆ ಮತದಾರರ ಚೀಟಿ, ವ್ಹೀಲ್ ಚೇರ್, ಸ್ವಯಂ ಸೇವಕರು, ಮತಗಟ್ಟೆಗೆ ಕರೆ ತರಲು ಮತ್ತು ಕಳುಹಿಸಲು ಅಂಗವಿಕಲರಿಗೆ ವ್ಯವಸ್ಥೆ ಮಾಡಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. (ಏಜೆನ್ಸೀಸ್)