ದಾವಣಗೆರೆ: ಕೃಷಿ ಕ್ಷೇತ್ರದಲ್ಲಿ ಕಾರ್ಪೋರೇಟ್ ಸಂಸ್ಥೆಗಳ ಆಕ್ರಮಣ ವಿರೋಧಿಸಿ ಅಖಿಲ ಭಾರತ ಸಂಯುಕ್ತ ಕಿಸಾನ್ ಮೋರ್ಚಾದ ಜಿಲ್ಲಾ ಘಟಕದ ನೇತೃತ್ವದಲ್ಲಿ ವಿವಿಧ ಸಂಘಟನೆಗಳ ಕಾರ್ಯಕರ್ತರು ಜಯದೇವ ವೃತ್ತದಲ್ಲಿ ಪ್ರತಿಭಟನೆ ನಡೆಸಿದರು.
ಕಾರ್ಪೋರೇಟ್ ಕಂಪನಿಗಳು ದೇಶ ಬಿಟ್ಟು ತೊಲಗಬೇಕು. ರೈತರ ಬೆಳೆಗಳಿಗೆ ಎಂಎಸ್ಪಿ ಖಾತ್ರಿಪಡಿಸಬೇಕು ಎಂದು ಆಗ್ರಹಿಸಿದ ಪ್ರತಿಭಟನಾಕಾರರು ಸರ್ಕಾರಗಳ ವಿರುದ್ಧ ಧಿಕ್ಕಾರ ಕೂಗಿದರು. ರೈತರು ಒಂದಾಗಬೇಕು ಎಂದು ಒತ್ತಾಯಿಸಿದರು.
ಪ್ರತಿಭಟನಾ ಸಭೆ ಉದ್ದೇಶಿಸಿ ಮಾತನಾಡಿದ ಸಂಯುಕ್ತ ಕಿಸಾನ್ ಮೋರ್ಚಾದ ಜಿಲ್ಲಾ ಸಂಚಾಲಕ ಎಚ್.ಜಿ. ಉಮೇಶ್, ದೇಶದಲ್ಲಿ ಕಾಲೂರಿದ ಕಾರ್ಪೋರೇಟ್ ಸಂಸ್ಥೆಗಳು ಇಲ್ಲಿನ ಜಮೀನು, ಸಂಪತ್ತನ್ನು ಲೂಟಿ ಮಾಡಿ ದೇಶವನ್ನು ಬರಡು ಮಾಡಿವೆ. ರೈತರ ಬೆಳೆಗಳಿಗೆ ಉತ್ತಮ ಮಾರುಕಟ್ಟೆ ಬೆಲೆ ಇಲ್ಲ. ಎಂಎಸ್ಪಿ ಕೇಳಿ ಹೋರಾಟಕ್ಕಿಳಿದ ರೈತರ ಮೇಲೆ ದಾಳಿ, ಗೋಲಿಬಾರ್ ಮಾಡಿಸುವ ಕೃತ್ಯ ನಡೆಯುತ್ತಿವೆ. ರೈತ ವಿರೋಧಿ ನೀತಿಗಳನ್ನು ತರಲಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು.
ಭ್ರಷ್ಟಾಚಾರದ ಮೇಲಾಟದಿಂದಾಗಿಯೇ ಬಿಜೆಪಿ- ಜೆಡಿಎಸ್ ಹಾಗೂ ಕಾಂಗ್ರೆಸ್ ಪಕ್ಷಗಳು ಪಾದಯಾತ್ರೆ, ಜನಾಂದೋಲನ ಯಾತ್ರೆ ನಡೆಸುತ್ತಿವೆ. ಭ್ರಷ್ಟಾಚಾರ ಆರೋಪದಡಿ ಬಿಎಸ್ವೈ ಬಂಧನಕ್ಕೆ ಒಳಗಾಗಿದ್ದರು. ಸಿದ್ದರಾಮಯ್ಯ ಯಾರೇ ತಪ್ಪೆಸಗಿದ್ದರೂ ಜೈಲಿಗೆ ಹಾಕಲಿ ಎಂದರು.
ಎರಡೂ ಸರ್ಕಾರಗಳು ದುಡಿವ ವರ್ಗದ ಜನರ ಅವಶ್ಯಕತೆಗಳನ್ನು ಗಮನಿಸುತ್ತಿಲ್ಲ. ರೈತರಿಗೆ ಬಿತ್ತನೆ ಬೀಜ, ರಸಗೊಬ್ಬರ ವಿತರಣೆಗೆ ಕಂಪನಿಗಳನ್ನು ವಿಲೀನ ಮಾಡಲಾಗುತ್ತಿದೆ. ಮಣ್ಣಿಗೆ ಅನುಕೂಲಕರ ಬೆಳೆ ಹಾಕಲು ಮಾರ್ಗದರ್ಶನ ನೀಡಿ, ರೈತರ ಸಮಸ್ಯೆ ಪರಿಹರಿಸಬೇಕಾದ ಕೃಷಿ ಇಲಾಖೆ ಅಧಿಕಾರಿಗಳು ಕಾರ್ಪೋರೇಟ್ ಕಂಪನಿಗಳ ಏಜೆಂಟರಂತೆ ಕೆಲಸ ಮಾಡುತ್ತಿದ್ದಾರೆ ಎಂದು ಟೀಕಿಸಿದರು.
ಜೆಸಿಟಿಯು ಜಿಲ್ಲಾ ಸಂಚಾಲಕ ಇ. ಶ್ರೀನಿವಾಸ್ ಮಾತನಾಡಿ ಖಾಸಗೀಕರಣ ಎಲ್ಲ ಕ್ಷೇತ್ರದಂತೆಯೇ ಕೃಷಿಯನ್ನೂ ಆವರಿಸುತ್ತಿದೆ. ಹೆದ್ದಾರಿ ನಿರ್ಮಾಣದ ನೆಪದಲ್ಲಿ ರೈತರ ಫಲವತ್ತಾದ ಭೂಮಿ ಕಬಳಿಸುವ ಹುನ್ನಾರ ನಡೆದಿದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಕಾರ್ಪೋರೇಟ್ ಕಂಪನಿಗಳ ಗುಲಾಮರಂತೆ ನಡೆದುಕೊಳ್ಳುತ್ತಿವೆ. ಕಮಿಷನ್ ದಂಧೆ ನಡೆಯುತ್ತಿದೆ ಎಂದು ದೂರಿದರು.
ಮುಖಂಡ ಮಧು ತೊಗಲೇರಿ ಮಾತನಾಡಿ ಸರ್ಕಾರಗಳು ಡಾ.ಎಂ.ಎಸ್.ಸ್ವಾಮಿನಾಥನ್ ವರದಿ ಆಧಾರದಡಿ ರೈತರು ಬೆಳೆದ ಬೆಳೆಗಳನ್ನು ನೇರವಾಗಿ ಖರೀದಿಸಲು ಮುಂದಾಗಬೇಕು. ಬೆಳೆಗಳಿಗೆ ಎಂಎಸ್ಪಿ ಖಾತ್ರಿಪಡಿಸಬೇಕು. ಅಭಿವೃದ್ಧಿ ಹೆಸರಲ್ಲಿ ಕೃಷಿ ಭೂಮಿ ವಶಪಡಿಸಿಕೊಳ್ಳುವ ಪ್ರವೃತ್ತಿ ನಿಲ್ಲಬೇಕು ಎಂದು ಹೇಳಿದರು.
ಪ್ರತಿಭಟನೆಯಲ್ಲಿ ಜೆಸಿಟಿಯು, ಎಐಕೆಕೆಎಂಎಸ್, ದಲಿತ ಸಂಷರ್ಘ ಸಮಿತಿಯ ಮುಖಂಡರಾದ ಟಿ.ಎಸ್. ನಾಗರಾಜ್, ಸತೀಶ್ ಅರವಿಂದ್, ಸಿ. ಬಸವರಾಜ್, ಮರುಳಸಿದ್ದಪ್ಪ, ಮಲ್ಲೇನಹಳ್ಳಿ ನಾಗರಾಜ್, ಪವಿತ್ರಾ, ನಾಗಜ್ಯೋತಿ, ಶ್ರೀನಿವಾಸಮೂರ್ತಿ, ಆದಿಲ್ಖಾನ್ ಇತರರಿದ್ದರು
