ಒಳಿತನ್ನು ಮಾಡುವುದೇ ನಿಜವಾದ ಕಲ್ಯಾಣ

ದಾವಣಗೆರೆ : ಕಲ್ಯಾಣ ಎಂದರೆ ಒಳಿತು ಎಂದರ್ಥ. ಬದುಕಿನಲ್ಲಿ ಒಳಿತನ್ನು ಮಾಡುವುದೇ ನಿಜವಾದ ಕಲ್ಯಾಣವಾಗಿದೆ ಎಂದು ವಿರಕ್ತ ಮಠದ ಡಾ.ಬಸವಪ್ರಭು ಸ್ವಾಮೀಜಿ ಹೇಳಿದರು.  ನಗರದ ವಿರಕ್ತಮಠದಲ್ಲಿ ಭಾನುವಾರ ಹಮ್ಮಿಕೊಂಡಿದ್ದ ‘ಕಲ್ಯಾಣದಿಂದ ಉಳವಿಯಡೆಗೆ’ ಶ್ರಾವಣ ಮಾಸದ 114ನೇ ವರ್ಷದ ಪ್ರವಚನ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ, ಮಾತನಾಡಿದರು.  ಆಧುನಿಕ ಕಾಲದ ಜನರು ಯಾಂತ್ರಿಕವಾಗಿ ಜೀವಿಸುತ್ತಿದ್ದು, ಸದಾಕಾಲ ಹಣ ಗಳಿಸುವುದರಲ್ಲೇ ಮುಳುಗಿದ್ದಾರೆ. ಹಣದ ಹಿಂದೆ ಹೋಗಿ ಒಳಿತನ್ನು ಮರೆತಿದ್ದಾರೆ. ಹಣ , ಆಸ್ತಿಯ ಬೆನ್ನುಹತ್ತಿ ಬದುಕಿನ ನೆಮ್ಮದಿ ಕಳೆದುಕೊಂಡಿದ್ದಾರೆ ಎಂದು ವಿಷಾದಿಸಿದರು.  ಹಿಂದಿನ ಕಾಲದಲ್ಲಿ ಓದು ಬರಹ ಬರಲಾರದ ಜನರು ಒಳಿತು ಮಾಡುವುದೇ ಬದುಕಿನ ನಿಜವಾದ ಸಾಧನೆ ಎಂದು ತಿಳಿದಿದ್ದರು. ಎಂದಿಗೂ ಹಣವೇ ಮುಖ್ಯ ಎಂದು ಬಡಿದಾಡಲಿಲ್ಲ. ಹಾಗಾಗಿ, ಅವರ ಬದುಕಿನಲ್ಲಿ ಶಾಂತಿ, ನೆಮ್ಮದಿ ಇತ್ತು ಎಂದರು.  ಬದುಕಿನಲ್ಲಿ ನೆಮ್ಮದಿ ಪಡೆಯುವ ಮಾರ್ಗವೆಂದರೆ ಶ್ರಾವಣ. ಬಸವಾದಿ ಶರಣರ ಆದರ್ಶದ ಬದುಕನ್ನು ಕೇಳಿದಾಗ ಜೀವನದಲ್ಲಿ ಒಳಿತನ್ನು ಕಾಣಲು ಸಾಧ್ಯವಾಗುತ್ತದೆ. ನಮ್ಮ ಅಂತರಂಗ ಶುದ್ದಿಯಾಗಲು, ಮನ ಪರಿವರ್ತಿಸುವ ಕಾರ್ಯ ಮಾಡಲು ಪ್ರವಚನಗಳು ಬೇಕು ಎಂದು ಹೇಳಿದರು.  ವರದಿಗಾರರ ಕೂಟದ ಜಿಲ್ಲಾಧ್ಯಕ್ಷ ನಾಗರಾಜ್ ಬಡದಾಳ್ ವಚನ ಗ್ರಂಥಗಳಿಗೆ ಪುಷ್ಪಾರ್ಚನೆ ಮಾಡುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ಇತ್ತೀಚಿನ ದಿನಗಳಲ್ಲಿ ಎಲ್ಲರೂ ಟಿವಿ ಹಾಗೂ ಮೊಬೈಲ್‌ಗಳಲ್ಲಿ ಮುಳುಗಿದ್ದು, ಸಂಸ್ಕೃತಿ ಮರೆಯುತ್ತಿದ್ದಾರೆ. ಧಾರಾವಾಹಿಗಳಲ್ಲಿ ಯಾವುದೇ ಸಕಾರಾತ್ಮಕ ವಿಚಾರಗಳಿರುವುದಿಲ್ಲ. ಇವುಗಳಿಂದ ಹೊರಬರಬೇಕು ಎಂದು ತಿಳಿಸಿದರು.  ಪ್ರತಿಯೊಬ್ಬರೂ  ಶರಣರ ವಚನಗಳನ್ನು ಓದಬೇಕು, ಪುರಾಣ ಪ್ರವಚನ ಆಲಿಸಿ ಬದುಕನ್ನು ಕಟ್ಟಿಕೊಳ್ಳಬೇಕು. ಮಕ್ಕಳಿಗೆ ಸಂಸ್ಕಾರದ ಜತೆಗೆ ನೈತಿಕ ಶಿಕ್ಷಣ ನೀಡಬೇಕು. ಶರಣರು, ದಾರ್ಶನಿಕರು ಹಾಗೂ ಮಹಾಪುರುಷರ ಪುಸ್ತಕಗಳನ್ನು ಓದಲು ಪ್ರೇರೇಪಿಸಬೇಕು. ಹಾಗಾದಾಗ ಮಾತ್ರ ಜೀವನಮೌಲ್ಯ ಕಂಡುಕೊಳ್ಳಲು ಸಾಧ್ಯವಾಗಲಿದೆ ಎಂದರು.  ಮೈಸೂರು ಶ್ರೀ ಬಸವ ಧ್ಯಾನ ಮಂದಿರದ ಶ್ರೀ ಬಸವಲಿಂಗಮೂರ್ತಿ ಸ್ವಾಮೀಜಿ ಮಾತನಾಡಿ, ಶ್ರಾವಣ ಬಂಧನದಿಂದ ಬಿಡುಗಡೆ, ದುಃಖದಿಂದ ಆನಂದದ ಕಡೆ ಹಾಗೂ ಅನಂತತೆಯ ಕಡೆಗೆ ಕೊಂಡೊಯ್ಯುತ್ತದೆ. ತತ್ವಜ್ಞಾನದ   ಶ್ರವಣದಿಂದ ನಮ್ಮ ಕಿವಿಗಳು ಸಾರ್ಥಕವಾಗುವುದಲ್ಲದೆ, ಜೀವನ ಪಾವನವಾಗುತ್ತದೆ ಎಂದು ಹೇಳಿದರು.  ಮಹಾನಗರ ಪಾಲಿಕೆ ಮಾಜಿ ಸದಸ್ಯ ಎಸ್.ಬಸಪ್ಪ, ಶಿವಯೋಗಾಶ್ರಮ ಟ್ರಸ್ಟ್ ಕಾರ್ಯದರ್ಶಿ ಅಂದನೂರು ಮುಪ್ಪಣ್ಣ, ವಿರಕ್ತಮಠ ಧರ್ಮದರ್ಶಿ ಸಮಿತಿ ಕಾರ್ಯದರ್ಶಿ ಕಣಕುಪ್ಪಿ ಮುರುಗೇಶಪ್ಪ, ಅನಸೂಯಮ್ಮ ಇದ್ದರು. ಬಸವ ಕಲಾಲೋಕದವರು ವಚನ ಗಾಯನ ಹಾಡಿದರು. ಲಂಬಿ ಮುರುಗೇಶ್ ಸ್ವಾಗತಿಸಿದರು.