ಆವರಗೆರೆಗೆ ಹೆಚ್ಚಿನ ಸಾರಿಗೆ ವ್ಯವಸ್ಥೆ ಕಲ್ಪಿಸಲು ಆಗ್ರಹ

ದಾವಣಗೆರೆ : ಸಮೀಪದ ಆವರಗೆರೆ ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಹೆಚ್ಚಿನ ಸಾರಿಗೆ ವ್ಯವಸ್ಥೆ ಕಲ್ಪಿಸುವಂತೆ ದಾವಣಗೆರೆ ಮಹಾನಗರ ಪಾಲಿಕೆ ನಾಗರಿಕ ಹಿತರಕ್ಷಣಾ ಸಮಿತಿ ಆಗ್ರಹಿಸಿದೆ.  ಸಮಿತಿಯ ಪದಾಧಿಕಾರಿಗಳು ಮಂಗಳವಾರ ಕೆಎಸ್‌ಆರ್‌ಟಿಸಿ ವಿಭಾಗೀಯ ನಿಯಂತ್ರಕರಿಗೆ ಈ ಕುರಿತು ಮನವಿ ಸಲ್ಲಿಸಿದರು.  ಆವರಗೆರೆ ಹಾಗೂ ಸುತ್ತಮುತ್ತಲಿನ ಗ್ರಾಮಗಳ ವಿದ್ಯಾರ್ಥಿಗಳು ದಾವಣಗೆರೆಯ ವಿವಿಧ ಕಾಲೇಜುಗಳಿಗೆ ಪ್ರತಿ ದಿನ ಹೋಗಿ ಬರಲು ನಗರ ಸಾರಿಗೆ ಬಸ್‌ಗಳ ಸಮಸ್ಯೆ ಎದುರಿಸುತ್ತಿದ್ದಾರೆ. ದಾವಣಗೆರೆ ವಿಶ್ವವಿದ್ಯಾಲಯದಿಂದ ಪ್ರತಿ ದಿನ ಪ್ರಯಾಣಿಕರಿಂದ ತುಂಬಿದ ಬಸ್‌ಗಳು ಬರುತ್ತವೆ. ಆದ್ದರಿಂದ ಆವರಗೆರೆ ನಿಲ್ದಾಣದಿಂದಲೇ ನಗರ ಸಾರಿಗೆ ಬಸ್‌ಗಳ ವ್ಯವಸ್ಥೆ ಮಾಡಬೇಕು ಎಂದು ಒತ್ತಾಯಿಸಿದರು.  ಬೆಳಗ್ಗೆ ಎರಡು ಬಸ್‌ಗಳನ್ನು ಕಾಲೇಜು ಸಮಯ ಬೆಳಗ್ಗೆ 7.30 ರಿಂದ 8 ಗಂಟೆಗೆ ಬಿಡಬೇಕು. ಬೆಂಗಳೂರಿನಿಂದ ಬೆಳಗಾವಿಗೆ ಹೋಗಿ ಬರುವ ಕೆಎಸ್‌ಆರ್‌ಟಿಸಿ ಬಸ್‌ಗಳನ್ನು ಆವರಗೆರೆ ಬಳಿ ನಿಲ್ಲಿಸಬೇಕು.  ಇಲ್ಲದಿದ್ದರೆ ಆಟೋದವರಿಗೆ 100 ರಿಂದ 200 ರೂ. ನೀಡಿ ಆವರಗೆರೆಗೆ ಬರಬೇಕಾಗುತ್ತದೆ.  ಆದ್ದರಿಂದ ಕೆಎಸ್‌ಆರ್‌ಟಿಸಿ ವಿಭಾಗೀಯ ನಿಯಂತ್ರಕರು ಸಂಬಂಧಿಸಿದ ಅಧಿಕಾರಿಗಳಿಗೆ ನಿರ್ದೇಶನ ನೀಡಬೇಕು. ಇಲ್ಲದಿದ್ದರೆ ಉಗ್ರ ಹೋರಾಟ ಮಾಡಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.  ಸಮಿತಿಯ ಮುಖಂಡರಾದ ಆವರಗೆರೆ ವಾಸು, ರಾಜು, ಎಸ್. ಚಂದ್ರಪ್ಪ, ಎ. ತಿಪ್ಪೇಶ, ಗುರುಮೂರ್ತಿ, ಸುನೀಲ್, ಪರಶುರಾಮ, ಶಂಕ್ರಪ್ಪ, ಸೀತಮ್ಮ ಇದ್ದರು.