ಚುನಾವಣೆಯಲ್ಲಾದರೂ ಜಿಲ್ಲೆಗೆ ಬನ್ನಿ!

ಚಿಕ್ಕಮಗಳೂರು: ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಜೆ. ಜಾರ್ಜ್ ಅಪರೂಪದ ಅತಿಥಿಯಾಗಿದ್ದು, ಚುನಾವಣೆ ಸಮಯದಲ್ಲೂ ಕಾಣಿಸಿಕೊಳ್ಳದಿರುವುದು ಕಾಂಗ್ರೆಸ್ ಕಾರ್ಯಕರ್ತರಲ್ಲಿ ಬೇಸರ ಮೂಡಿಸಿದೆ.

ಜಿಲ್ಲಾ ಉಸ್ತುವಾರಿ ಸಚಿವರು ಎಲ್ಲಿದ್ದಾರೆ ಹುಡುಕಿ ಕೊಡುವಿರಾ ಎಂದು ಪೊಲೀಸ್ ಠಾಣೆಗೆ ದೂರು ಕೊಡುವುದು ಹೊರತುಪಡಿಸಿ ಎಲ್ಲ ರೀತಿಯಲ್ಲಿ ಅತೃಪ್ತಿ ವ್ಯಕ್ತಪಡಿಸಿದ್ದಾಗಿದೆ.

ಮೈತ್ರಿ ಪಕ್ಷಗಳ ನಡುವೆ ಕ್ಷೇತ್ರ ಹಂಚಿಕೆಯಲ್ಲಿ ಚಿಕ್ಕಮಗಳೂರು ಕ್ಷೇತ್ರವನ್ನು ಕಳೆದುಕೊಂಡು ಬೇಸರದಲ್ಲಿರುವ ಮುಖಂಡರು ಮತ್ತು ಕಾರ್ಯಕರ್ತರನ್ನು ಸಮಾಧಾನಪಡಿಸುವ ದೃಷ್ಟಿಯಿಂದಲಾದರೂ ಜಿಲ್ಲೆಗೆ ಬಂದಿಲ್ಲ.

2018ರಲ್ಲಿ ಶೃಂಗೇರಿ ಹೊರತುಪಡಿಸಿ ಉಳಿದ ನಾಲ್ಕು ಕ್ಷೇತ್ರದಲ್ಲಿ ಬಿಜೆಪಿ ಗೆಲುವು ಸಾಧಿಸಿತು. ಶೃಂಗೇರಿಯಲ್ಲಿ ಟಿ.ಡಿ.ರಾಜೇಗೌಡರು ಮೊದಲ ಬಾರಿ ಗೆಲುವು ಕಂಡಿರುವುದರಿಂದ ಸಚಿವ ಸ್ಥಾನ ಸಿಕಿಲ್ಲ. ಹೀಗಾಗಿ ಅವರಿಗೆ ಮಲೆನಾಡು ಅಭಿವೃದ್ಧಿ ಮಂಡಳಿ ಅಧ್ಯಕ್ಷ ಸ್ಥಾನ ನೀಡಲಾಗಿದೆ.

ಕಾಂಗ್ರೆಸ್​ನಲ್ಲಿ ಪ್ರಭಾವಿ ನಾಯಕರಾದ ಕೆ.ಜೆ.ಜಾರ್ಜ್ ವಿಜ್ಞಾನ ಮತ್ತು ತಂತ್ರಜ್ಞಾನ ಹಾಗೂ ಕೈಗಾರಿಕೆ, ಐಟಿ-ಬಿಟಿ ಸಚಿವರಾಗಿದ್ದು ಅವರನ್ನು ಕಾಫಿನಾಡಿಗೆ ಉಸ್ತುವಾರಿಯನ್ನಾಗಿ ಮೈತ್ರಿ ಸರ್ಕಾರ ನಿಯೋಜಿಸಿದೆ. ವ್ಯವಹಾರ ಹಾಗೂ ರಾಜಕೀಯದಲ್ಲಿ ಅತ್ಯಂತ ಹೆಚ್ಚು ಒತ್ತಡದಲ್ಲಿರುವ ಅವರು ಜಿಲ್ಲೆಗೆ ಬರುವುದು ವಿರಳ. ಸ್ವಾತಂತ್ರ್ಯ ದಿನಾಚರಣೆ, ಗಣರಾಜ್ಯೋತ್ಸವ ಹಾಗೂ ಮುಖ್ಯಮಂತ್ರಿ ಬಂದಾಗ ಮಾತ್ರ ಅವರು ಜಿಲ್ಲೆಯಲ್ಲಿ ಕಾಣಿಸಿಕೊಳ್ಳುತ್ತಾರೆ.

ದಶಕಗಳಿಂದ ಶಕ್ತಿ ಇಲ್ಲದೆ ಮಂಕಾಗಿರುವ ಕಾಂಗ್ರೆಸ್​ಗೆ ಶಕ್ತಿ ತುಂಬ ಬೇಕಾದ ಉಸ್ತುವಾರಿ ಸಚಿವರು, ಇಲ್ಲಿಗೆ ಬರುವುದಕ್ಕೆ ದಾಕ್ಷಿಣ್ಯ ಮಾಡಿಕೊಳ್ಳುತ್ತಿರುವುದು ಪಕ್ಷಕ್ಕೆ ಮುಳುವಾಗತೊಡಗಿದೆ. ಕಾಂಗ್ರೆಸ್ ಭದ್ರಕೋಟೆ ಶಿಥಿಲ ಮಾಡಿರುವ ಬಿಜೆಪಿ ವಿರುದ್ಧ ಕಾಯಕರ್ತರ ಪಡೆ ತೊಡೆತಟ್ಟಿ ನಿಂತಿದ್ದರೂ ಅವರಿಗೆ ಬೆಂಬಲ ನೀಡುವ ನಾಯಕ ಇಲ್ಲದಂತಾಗಿದೆ.

ಚುನಾವಣೆ ಬಳಿಕ ಫಲಿತಾಂಶ ಏನೇ ಆಗಲಿ, ಪ್ರಮೋದ್ ಮಧ್ವರಾಜ್ ಮುಂದೆ ಜೆಡಿಎಸ್ ಪಡಸಾಲೆಯಲ್ಲಿಯೇ ಇರಬೇಕಾಗುತ್ತದೆ. ಹೀಗಾಗಿ ಪ್ರಸ್ತುತ ನಡೆಯುವ ಚುನಾವಣೆ ಜೆಡಿಎಸ್ ಬೇರುಗಳನ್ನು ಗಟ್ಟಿಗೊಳಿಸುತ್ತಿದೆಯೆಂಬ ಭಾವನೆ ಕಾಂಗ್ರೆಸ್ ಕಾರ್ಯಕರ್ತರಲ್ಲಿ ಬಂದಿದೆ. ಜಿಲ್ಲೆಯಲ್ಲಿ ಇದ್ದ ಇಬ್ಬರು ಶಾಸಕರನ್ನು ಕಳೆದುಕೊಂಡಿರುವ ಜೆಡಿಎಸ್​ಗೆ ಈಗ ಮತ್ತೆ ಪುಟಿದೇಳಲು ಶಕ್ತಿ ತುಂಬುತ್ತಿರುವುದೇ ಕಾಂಗ್ರೆಸ್. ಬಿಜೆಪಿ ಸೋಲಿಸುವ ಭರದಲ್ಲಿ ಮತ್ತೊಂದು ವೈರಿ ಪಕ್ಷವನ್ನೇ ಬೆಂಬಲಿಸುವುದು ಹೇಗೆಂಬ ಚಿಂತೆ ಕಾರ್ಯಕರ್ತರನ್ನು ಕಾಡತೊಡಗಿದೆ.

ಅಸಮಾಧಾನ ತಣಿಸುವ ಕೆಲಸವಿಲ್ಲ: ಮೈತ್ರಿ ಧರ್ಮದಲ್ಲಿ ಸಿಲುಕಿ ಕಾರ್ಯಕರ್ತರು ಸಂಕಟ ಅನುಭವಿಸುತ್ತಿರುವಾಗಲಾದರೂ ಸಚಿವರು ಜಿಲ್ಲೆಗೆ ಆಗಮಿಸಿ ಅಗತ್ಯ ಭರವಸೆ ನೀಡುವುದನ್ನು ಕಾಂಗ್ರೆಸ್​ನವರು ನಿರೀಕ್ಷಿಸಿದ್ದಾರೆ. ಮೇಲ್ಮಟ್ಟದ ಹಾಗೂ ಜಿಲ್ಲಾ ಮಟ್ಟದ ಕೆಲ ನಾಯಕರು ಮೈತ್ರಿಯಲ್ಲಿ ಒಂದಾಗಿ ಕೆಲಸ ಮಾಡತೊಡಗಿದ್ದಾರೆ. ಆದರೆ, ಕಾರ್ಯಕರ್ತರ ಹಂತದಲ್ಲಿ ಒಂದಾಗಲು ಅವರ ಒಳ ಮನಸ್ಸು ಒಪ್ಪದಾಗಿದೆ.

ಇಂಥ ಇಬ್ಬದಿಯ ಸಂದರ್ಭದಲ್ಲಿ ಕಾರ್ಯಕರ್ತರಿಗೆ ಸಮಾಧಾನದ ಜತೆ ಭವಿಷ್ಯದ ಬಗ್ಗೆ ಭರವಸೆ ನೀಡಬೇಕಾದ ಜಿಲ್ಲಾ ಉಸ್ತುವಾರಿ ಸಚಿವರು ಕಾಣುತ್ತಿಲ್ಲ. ಚುನಾವಣೆಯಲ್ಲಿ ಮುಖಂಡರಿಗಿಂತ ಕಾರ್ಯಕರ್ತರೇ ಮನೆ ಮನೆಗೆ ಹೋಗಿ ಮತಯಾಚನೆ ಮಾಡಲು ಸಾಧ್ಯ. ಕಾರ್ಯಕರ್ತರು ಮನೆ ಬಳಿ ಬಂದು ಮತಯಾಚನೆ ಮಾಡುವುದು ಮತದಾರರಲ್ಲಿ ಪರಿಣಾಮ ಬೀರುತ್ತದೆ. ಆದರೆ, ಇನ್ನೂ ಜೆಡಿಎಸ್ ಹೊರುತುಪಡಿಸಿ ಕಾಂಗ್ರೆಸ್ ಕಾರ್ಯಕರ್ತರು ಮತದಾರನ ಮನೆ ಬಾಗಿಲಿಗೆ ಹೋಗಲು ಹಿಂದೇಟು ಹಾಕುತ್ತಿದ್ದಾರೆ. ಇವರೆಲ್ಲರಿಗೂ ಸ್ಪೂರ್ತಿ ತುಂಬಿ ಚುನಾವಣೆ ಸಮರದಲ್ಲಿ ಮಾರ್ಗದರ್ಶನ ಮಾಡಬೇಕಾದ ನಾಯಕನಿಲ್ಲ.

ಕಾರ್ಯಕರ್ತರು ಅನ್ಯ ಪಕ್ಷಗಳತ್ತ: ಪಕ್ಷದ ತಳಮಟ್ಟದಲ್ಲಿ ಪಿಲ್ಲರ್​ಗಳಂತಿರುವ ಕಾರ್ಯಕರ್ತರು ಬಿಜೆಪಿ ಹಾಗೂ ಜೆಡಿಎಸ್ ಪಕ್ಷಗಳಲ್ಲಿ ಹಂಚಿ ಹೋಗುತ್ತಿರುವುದು ಕಾಂಗ್ರೆಸ್​ಗೆ ಸಮಸ್ಯೆಯಾಗತ್ತಿದೆ. ಕಡೂರಿನಲ್ಲಿ ಜಿಪಂ ಸದಸ್ಯರೊಬ್ಬರು ಬಹಿರಂಗವಾಗಿಯೇ ಬಿಜೆಪಿ ಪಕ್ಷದೊಂದಿಗೆ ಗುರುತಿಸಿಕೊಂಡು ಚುನಾವಣೆ ಪ್ರಚಾರ ಮಾಡುತ್ತಿದ್ದಾರೆ.

ಹೀಗೆ ಹಲವು ತಾಲೂಕುಗಳಲ್ಲಿ ಕೈ ಕಾರ್ಯಕರ್ತರ ಪಡೆ ಸದ್ದಿಲ್ಲದೆ ಪಲಾಯನ ಮಾಡುತ್ತಿದೆ. ಪಕ್ಷದಲ್ಲಿ ಸೈನಿಕರಂತೆ ಕೆಲಸ ಮಾಡುವ ಕಾರ್ಯಕರ್ತರ ಸಂಖ್ಯೆ ಈಗಾಗಲೆ ಕಡಿಮೆ ಇದೆ. ಇವರು ಸಹ ವಲಸೆ ಹೋಗಲಾರಂಭಿಸಿದರೆ ಕಾಂಗ್ರೆಸ್ ಭವಿಷ್ಯದಲ್ಲಿ ತೊಂದರೆ ಅನುಭವಿಸಬೇಕಾಗುತ್ತದೆಂಬ ಅಭಿಪ್ರಾಯವೂ ಪಕ್ಷದ ವಲಯದಲ್ಲಿ ಕೇಳಿ ಬರುತ್ತಿದೆ.

ಹೆಸರಿಗೆ ಮಾತ್ರ ಜಿಲ್ಲಾ ಉಸ್ತುವಾರಿ ಸಚಿವರಾಗಿರುವ ಜಾರ್ಜ್ ಬಗ್ಗೆ ಪಕ್ಷದೊಳಗೆ ಅಸಮಾಧಾನದ ಹೊಗೆ ಏಳಲಾರಂಭಿಸಿದೆ. ಆಡಳಿತದ ಜತೆ ಪಕ್ಷ ಕಟ್ಟಬೇಕೆಂಬ ಆಪೇಕ್ಷೆ ಕಾರ್ಯಕರ್ತರಲ್ಲಿದೆ. ಆದರೆ, ಕಳೆದ ಎಂಟು ತಿಂಗಳಿಂದ ಸಚಿವರು ಕಾರ್ಯಕರ್ತರನ್ನು ಪಕ್ಷ ಬೆಳವಣಿಗೆಗೆ ಸಜ್ಜುಗೊಳಿಸುವ ಕೆಲಸ ಮಾಡದಿರುವುದು ನಿರಾಸೆ ತಂದಿದೆ.

ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಜೆ.ಜಾರ್ಜ್ ಅವರಿಗೆ ಮೈತ್ರಿ ಸರ್ಕಾರ ಬೆಂಗಳೂರು ಚುನಾವಣೆ ಜವಾಬ್ದಾರಿ ನೀಡಿದ್ದು, ಇಲ್ಲಿಗೆ ಬರಲಾಗುತ್ತಿಲ್ಲ. ಉಡುಪಿ-ಚಿಕ್ಕಮಗಳೂರಿಗೆ ಸಚಿವೆ ಜಯಮಾಲಾರನ್ನು ನಿಯೋಜಿಸಲಾಗಿದೆ. ಇಲ್ಲಿಯ ತನಕ ಉಡುಪಿ ಜಿಲ್ಲೆಯಲ್ಲಿ ಪ್ರವಾಸ ಮಾಡಿದ ಜಯಮಾಲಾ ಅವರು ಶುಕ್ರವಾರದಿಂದ ಮಲೆನಾಡಲ್ಲಿ ಪ್ರಚಾರದಲ್ಲಿ ಭಾಗಿಯಾಗುವರು. ಕೆಳ ಹಂತದ ಕಾರ್ಯಕರ್ತರನ್ನು ಸಂಘಟಿಸುವ ಕಾರ್ಯ ನಡೆಯುತ್ತಲೆ ಇದೆ.

| ಡಾ. ಡಿ.ಎಲ್.ವಿಜಯಕುಮಾರ್, ಕಾಂಗ್ರೆಸ್ ಜಿಲ್ಲಾಧ್ಯಕ್ಷ