Chitradurga BS Yeddyurappa

ಬರ ನಿರ್ಲಕ್ಷಕ್ಕೆ ಚಿತ್ರದುರ್ಗದಲ್ಲಿ ಬಿಎಸ್‌ವೈ ಗರಂ

ಚಿತ್ರದುರ್ಗ: ಚಿತ್ರದುರ್ಗದ ಬರಪರಿಸ್ಥಿತಿ ಕಂಡು ಮರುಗಿದ ವಿಧಾನಸಭೆ ಪ್ರತಿಪಕ್ಷ ನಾಯಕ ಬಿ.ಎಸ್. ಯಡಿಯೂರಪ್ಪ, ಜಿಲ್ಲೆಯಲ್ಲಿ ಬರ ನಿರ್ವಹಣೆ ನಿರ್ಲಕ್ಷಿಸಲಾಗಿದೆ ಎಂದು ಸರ್ಕಾರದ ವಿರುದ್ಧ ಕಿಡಿಕಾರಿದರು.

ಹಿರಿಯೂರು, ಚಳ್ಳಕೆರೆ ತಾಲೂಕುಗಳಲ್ಲಿ ಭಾನುವಾರ ಬರ ಪರಿಹಾರ ಕಾಮಗಾರಿ ಪರಿಶೀಲಿಸಿ, ಜಿಲ್ಲೆಯಲ್ಲಿ ಶೇ.ನೂರರಷ್ಟು ಬೆಳೆ ಹಾನಿಯಾಗಿದ್ದು ರೈತರ ಬದುಕು ಮೂರಾಬಟ್ಟೆಯಾಗಿದೆ ಎಂದರು.

ಡಿಸಿ ಕಚೇರಿಯಲ್ಲಿ ಸಭೆ ನಡೆಸಿದ ವೇಳೆಯೂ, ಈ ವಿಷಯ ಪ್ರಸ್ತಾಪಿಸಿ ತಾವು ಪ್ರವಾಸ ಕೈಗೊಂಡ ಎಂಟು ಜಿಲ್ಲೆಗಳಿಗೆ ಹೋಲಿಸಿದರೆ ಚಿತ್ರದುರ್ಗದ ಪರಿಸ್ಥಿತಿ ಅತ್ಯಂತ ಕೆಟ್ಟದ್ದಾಗಿದೆ ಎಂದರು.

ಉಸ್ತುವಾರಿ ಸಚಿವರು ಏನು ಮಾಡುತ್ತಿದ್ದಾರೆ? 22 ದಿನ ಕಳೆದರೂ ಆತ್ಮಹತ್ಯೆ ಮಾಡಿಕೊಂಡ ರೈತನ ಮನೆಗೆ ಏಕೆ ಭೇಟಿ ನೀಡಿ ಸಾಂತ್ವನ ಹೇಳಿಲ್ಲ. ರೈತರ ಬಗ್ಗೆ ಏಕಿಷ್ಟು ನಿಷ್ಕಾಳಜಿ ಎಂದು ಸಚಿವರು, ಅಧಿಕಾರಿಗಳ ವಿರುದ್ಧ ಹರಿಹಾಯ್ದರು.

ತೆಂಗು, ಅಡಕೆ, ದಾಳಿಂಬೆ ಸೇರಿ ಕೃಷಿ, ತೋಟಗಾರಿಕೆ ಬೆಳೆಗಳು ಶೇ.100 ನಾಶವಾಗಿವೆ. ಭಿಕ್ಷೆ ಎಂಬಂತೆ ತೆಂಗಿನ ಗಿಡಕ್ಕೆ 400 ರೂ. ಪರಿಹಾರ ನಿಗದಿ ಮಾಡಲಾಗಿದೆ. ಇದನ್ನು ಕನಿಷ್ಠ 2 ಸಾವಿರ ರೂ.ಗೆ ಏರಿಸುವಂತೆ ಆಗ್ರಹಿಸಿದರು. ನರೇಗಾದಲ್ಲಿ ಅವ್ಯವಹಾರವಾದರೆ ತಲೆ ಕೊಡುವವರು ಅಧಿಕಾರಿಗಳೇ ಎಂದು ಎಚ್ಚರಿಸಿದರು.

ಬೇಸಿಗೆ ಬರುತ್ತಿದ್ದು ಜಾನುವಾರುಗಳಿಗೆ ಮೇವು, ನೀರಿಗೆ ವ್ಯವಸ್ಥೆ ಮಾಡಿ. ಕೆರೆಗಳ ಹೂಳೆತ್ತಿ ಎಂದರು. ಜಿಲ್ಲೆಗೆ ಮಂಜೂರಾದ ಮೆಡಿಕಲ್ ಕಾಲೇಜು ಆರಂಭಕ್ಕೆ ಹಾಗೂ ತುಮಕೂರು-ದಾವಣಗೆರೆ ನೇರ ರೈಲು ಮಾರ್ಗಕ್ಕೆ ರಾಜ್ಯ ಸರ್ಕಾರ ನಿರಾಸಕ್ತಿ ಹೊಂದಿದೆ ಎಂದು ದೂರಿದರು.

ಸಾಲ ಮನ್ನಾ ವಿಳಂಬಕ್ಕೆ ಯಡಿಯೂರಪ್ಪ ಅತೃಪ್ತಿ: ವಾಣಿಜ್ಯ ಬ್ಯಾಂಕ್‌ಗಳ 1123.89 ಕೋಟಿ ರೂ. ಹಾಗೂ ಸಹಕಾರಿ ಬ್ಯಾಂಕ್‌ಗಳ 170.36 ಕೋಟಿ ರೂ. ಸಾಲ ಮನ್ನಾ ಪ್ರಕ್ರಿಯೆ ವಿಳಂಬಕ್ಕೆ ಅತೃಪ್ತಿ ವ್ಯಕ್ತಪಡಿಸಿದರು. ಇನ್‌ಫುಟ್ ಸಬ್ಸಿಡಿ, ಬೆಳೆ ನಷ್ಟ ಪರಿಹಾರಕ್ಕೆ 302 ಕೋಟಿ ರೂ. ಗೆ ಬೇಡಿಕೆ ಸಲ್ಲಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ವಿನೋತ್ ಪ್ರಿಯಾ ತಿಳಿಸಿದರು. ಕಳೆದ ಸಾಲಿನಲ್ಲಿ 198 ಕೋಟಿ ರೂ. ಬೆಳೆ ವಿಮೆ ಕಂತು ಕಟ್ಟಿದ್ದ ರೈತರಿಗೆ 22 ಕೋಟಿ ರೂ. ಪರಿಹಾರ ಬಂದಿದೆ. ಈಬಾರಿ 38 ಸಾವಿರ ರೈತರು ಮಾತ್ರ ವಿಮೆ ಪಾವತಿಸಿದ್ದಾರೆ ಎಂದು ಶಾಸಕ ಚಂದ್ರಪ್ಪ ಹೇಳಿದರು. ಕಳೆದ ಬಾರಿ ನೀರು ಪೂರೈಸಿದ ಟ್ಯಾಂಕರ್ ಮಾಲೀಕರಿಗೆ ಬಾಕಿ ಹಣ ಪಾವತಿಸಿಲ್ಲವೆಂದು ಶಾಸಕಿ ಪೂರ್ಣಿಮಾ ಅಸಮಾಧಾನ ವ್ಯಕ್ತಪಡಿಸಿದರು.