ಭಗಂಡೇಶ್ವರ ತಂಡಕ್ಕೆ ಚಾಂಪಿಯನ್ ಪಟ್ಟ

ಮಡಿಕೇರಿ: ಬೆಂಗಳೂರಿನ ಕೊಡವ ಸಮಾಜ ಯೂತ್ ಕೌನ್ಸಿಲ್ ವತಿಯಿಂದ ಕೊಡಗಿನ ವೀರ ಸೇನಾನಿ ಜನರಲ್ ಎಸ್.ತಿಮ್ಮಯ್ಯ ಸ್ಮಾರಕ 4ನೇ ಅಂತರ ಕ್ರಿಕೆಟ್ ಪಂದ್ಯದಲ್ಲಿ ಭಗಂಡೇಶ್ವರ ಸಂಘ ಚಾಂಪಿಯನ್ ಸ್ಥಾನ ಗಳಿಸಿದರೆ, ಎಚ್.ಎಸ್.ಆರ್. ಕೊಡವ ವೊಕ್ಕ ತಂಡ ರನ್ನರ್ಸ್‌ಗೆ ತೃಪ್ತಿಪಟ್ಟುಕೊಂಡಿತು.

ಬೆಂಗಳೂರಿನಲ್ಲಿ ಆಯೋಜಿಸಿದ್ದ ಪಂದ್ಯಾವಳಿಯಲ್ಲಿ ಬೆಂಗಳೂರಿನ 31 ಕೊಡವ ಸಂಘಗಳ ಪೈಕಿ 26 ತಂಡಗಳು ಪಾಲ್ಗೊಂಡಿದ್ದವು. ಪಂದ್ಯಾವಳಿಯಲ್ಲಿ ಪ್ರತಿ ತಂಡದಲ್ಲಿ ಇಬ್ಬರು ಹೆಣ್ಣು ಮಕ್ಕಳು ಕಡ್ಡಾಯವಾಗಿ ಆಡಬೇಕು ಎನ್ನುವ ನಿಯಮ ಇತ್ತು. ಎಲ್ಲ ಸಂಘಗಳು ಈ ನಿಯಮವನ್ನು ಪಾಲಿಸಿದ ಸಲುವಾಗಿ ಹೆಣ್ಣು ಮಕ್ಕಳಿಗೂ ಆಡುವ ಅವಕಾಶವು ದೊರಕಿದ್ದು ವಿಶೇಷವಾಗಿತ್ತು.

ಅಂತಿಮ ಪಂದ್ಯದಲ್ಲಿ ಕೊಡಗಿನ ಯುವ ಕ್ರೀಡಾಪಟುಗಳಾದ ಕೋಟ್ರಂಗಡ ಅಪ್ಪಣ್ಣ (19ರ ವಯೋಮಿತಿಯಲ್ಲಿ ಭಾರತವನ್ನು ಪ್ರತಿನಿಧಿಸಿದ ಮತ್ತು ಕರ್ನಾಟಕದ ರಣಜಿ ತಂಡದ ಸದಸ್ಯ), ಕೇಲೇಟಿರ ಹರ್ಷಿತ (ಭಾರತ ತಂಡದ 21ರ ವಯೋಮಿತಿಯ ಬಾಸ್ಕೆಟ್ ಬಾಲ್ ಆಟಗಾರ್ತಿ) ಮತ್ತು ಹೊಟ್ಟೆಯಂಡ ಸಚಿನ್ ಪೂವಯ್ಯ (ಭಾರತ ತಂಡ ಕಬಡ್ಡಿ ಆಟಗಾರ) ಮುಖ್ಯ ಅಥಿತಿಗಳಾಗಿ ಭಾಗವಹಿಸಿದ್ದರು.

ಮೂರನೇ ಮತ್ತು ನಾಲ್ಕನೇ ಸ್ಥಾನಕ್ಕೆ ನಡೆದ ಪಂದ್ಯದಲ್ಲಿ ಮೂರನೇ ಸ್ಥಾನವನ್ನು ಪೀಣ್ಯ- ದಾಸರಳ್ಳಿ ಕೊಡವ ಸಮಾಜ ಮತ್ತು ನಾಲ್ಕನೇ ಸ್ಥಾನವನ್ನು ಜಯನಗರ ಕೊಡವ ಸಮಾಜ ಗೆದ್ದುಕೊಂಡಿತು.

ಪುರುಷ ಸರಣಿ ಶ್ರೇಷ್ಠ ಪ್ರಶಸ್ತಿಯನ್ನು ಸಣ್ಣುವಂಡ ಅಯ್ಯಪ್ಪ ಮತ್ತು ಮಹಿಳಾ ಸರಣಿ ಶ್ರೇಷ್ಠ ಪ್ರಶಸ್ತಿಯನ್ನು ಪೆಮ್ಮಂಡ ಭವಿಷ್ಯ ಅಲಂಕರಿಸಿದರು. ಎಮರ್ಜಿಂಗ್ ಪ್ಲೇಯರ್ ಆಫ್ ಕ್ರಿಕೆಟ್ ನಮ್ಮೆಯನ್ನು ಕೋಣೇರಿರ ಮಿಷ ಅವರಿಗೆ ಕೊಡಲಾಯಿತು. ಇವರಿಗೆ ಮುಳಿಯ ಕೇಶವ ಭಟ್ ಚಿನ್ನದ ನಾಣ್ಯವನ್ನು ನೀಡಿದರು.

ಪಂದ್ಯಾವಳಿ ಆಯೋಜನೆ ಮಾಡಿದ್ದ ಯೂತ್ ಕೌನ್ಸಿಲ್‌ನ ಎಲ್ಲ ಸದಸ್ಯರು ಕೊಡವ ಸಾಂಸ್ಕೃತಿಕ ಉಡುಪಿನಲ್ಲಿ ಕಂಗೊಳಿಸುತ್ತಿದ್ದರು. ಚೋಕಂಡ ಸೂರಜ್ ಸೋಮಯ್ಯ ನೇತೃತ್ವದಲ್ಲಿ ಯೂತ್ ಕೌನ್ಸಿಲ್‌ನ ಎಲ್ಲ ಯುವತಿಯರು ಮತು ಯುವಕರು ಕೊಡವಾಮೆಯನ್ನು ಬಿಂಬಿಸುವಲ್ಲಿ ಯಶಸ್ವಿಯಾದರು.

ವಿನ್ನರ್ಸ್ ಮತ್ತು ರನ್ನರ್ಸ್ ತಂಡಕ್ಕೆ ಕೊಡವರ ಆಚಾರ, ವಿಚಾರ ಪ್ರತಿಬಿಂಬಿಸುವ ಪಟ್ಟೋಲೆ ಪಳಮೆ ಮತ್ತು ಒಡಿಕತ್ತಿಯನ್ನು ವಿತರಿಸಲಾಯಿತು.

Leave a Reply

Your email address will not be published. Required fields are marked *