| ಹರ್ಷವರ್ಧನ್ ಬ್ಯಾಡನೂರು ಚಿತ್ರ: ಇಂರ್ಟವಲ್ ನಿರ್ದೇಶನ: ಭರತವರ್ಷ ತಾರಾಗಣ: ಶಶಿರಾಜ್, ಸುಕೇಶ್, ಪ್ರಜ್ವಲ್, ಸಹನಾ, ಚೈತ್ರ, ರಂಗನಾಥ್, ದಾನಮ್ ಮತ್ತಿತರರು ಒಂದೇ ಹೆಸರಿನ ಇಬ್ಬರು, ಮೂವರು ಹುಡುಗರು, ಹುಡುಗಿಯರು ಒಂದೇ ಊರು, ತರಗತಿಯಲ್ಲಿ ಸೇರುವುದು ಅಪರೂಪದಲ್ಲೇ ಅಪರೂಪ. ಆದರೆ, ಮೂವರೂ ಒಂದೇ ತಂಡ ಕಟ್ಟಿಕೊಂಡು ಮನೆಗೆ, ಕ್ಲಾಸಿಗೆ, ಊರಿಗೆ ಹಾವಳಿ ಇಡುವುದು ಅತಿ ಅಪರೂಪ. ಮಲೆನಾಡಿದ ಗುಡ್ಡೇಕೊಪ್ಪದಲ್ಲಿ ಅಂತಹ ಒಂದು ಟೀಮ್ ಇರುತ್ತದೆ. ಒಬ್ಬ ಗಣೇಶ್ ಎಸ್ (ಶಶಿ), ಇನ್ನೊಬ್ಬ ಗಣೇಶ್ ಯು (ಪ್ರಜ್ವಲ್) ಮತ್ತೊಬ್ಬ ಗಣೇಶ್ ಟಿ (ಸುಕೇಶ್). ಶಾಲಾದಿನಗಳಿಂದಲೇ ಮೂವರೂ ತ್ರಿಮೂರ್ತಿಗಳಂತೆ ಒಟ್ಟಾಗಿರುತ್ತಾರೆ. ಬೆಳೆದು ಕಾಲೇಜಿಗೆ ಹೋದಂತೆ, ಅವರ ಗಲಾಟೆಗಳೂ ಜೋರಾಗುತ್ತವೆ.

ಹಾಗೂ ಹೀಗೂ ಇಂಜಿನಿಯರಿಂಗ್ ಮುಗಿಸಿದರೂ, ಕೆಲಸಕ್ಕೆ ಹೋಗದೇ ಭೂಮಿಗೆ, ಅಪ್ಪನಿಗೆ ಭಾರವಾಗಿರುತ್ತಾರೆ. ಲೋಕಲ್ ಲೀಡರ್ಗಳ ಹಿಂದೆ ಓಡಾಡಿಕೊಂಡು, ಅವರಿವರ ತಲೆಸವರಿ ಅಂದಿನ ಖರ್ಚು ಸರಿದೂಗಿಸಿಕೊಂಡು ಹೋಗುವ ಖತರ್ನಾಕ್ ಕಿಲಾಡಿಗಳಾಗಿರುತ್ತಾರೆ. ಆದರೆ, ಸೋಮಾರಿತನವೇ ಅವರಿಗೆ ಮುಳುವಾಗಿ ಊರು ಬಿಡುವ ದುಸ್ಥಿತಿ ನಿರ್ಮಾಣವಾಗುತ್ತದೆ. ಬೆಂಗಳೂರು ಸೇರುವ ಅವರು, ಇಲ್ಲೂ ಹಲವು ದಿನಗಳ ಕಾಲ ಕೆಲಸಕ್ಕಾಗಿ ಸೈಕಲ್ ಹೊಡೆಯುತ್ತಾರೆ. ಮುಂದೆ? ಬೆಂಗಳೂರಲ್ಲಿ ಕೆಲಸ ಸಿಕ್ಕಿ, ದುಡಿದು, ಹಣ ಗಳಿಸಿ ಶ್ರೀಮಂತರಾಗಿ ಊರಿಗೆ ಹೋಗುತ್ತಾರಾ? ಬೇರೆ ಸಿನಿಮಾ ಆಗಿದ್ದರೆ, ಹಾಗಾಗುತ್ತಿತ್ತೇನೋ? ಆದರೆ, ಇದು "ಇಂರ್ಟವಲ್'. ನಾವು ಊಹಿಸುವಂತೇನೂ ನಡೆಯುವುದಿಲ್ಲ. ಹಾಗಾದರೆ ಮುಂದಿನ ಕಥೆ? "ಇಂರ್ಟವಲ್' ನೋಡಿ...

ಪ್ರಾರಂಭದಿಂದ ಕ್ಲೆಮ್ಯಾಕ್ಸ್ವರೆಗೂ ಬಹುತೇಕ ನಗಿಸುತ್ತಾ ಸಾಗುವ ಚಿತ್ರ ಕಟ್ಟಿಕೊಟ್ಟಿದ್ದಾರೆ ನಿರ್ದೇಶಕ ಭರತವರ್ಷ. ಬೋರ್ ಆಗದಂತೆ ನೋಡಿಸಿಕೊಂಡು ಹೋಗುವ 142 ನಿಮಿಷಗಳ ಕಥೆಯಿದು. ಎಲ್ಲಿಂದ ಪ್ರಾರಂಭವಾಗಿತ್ತೋ, ಅಲ್ಲೇ ಹೋಗಿ ನಿಂತರೂ, ಅದರ ನಡುವೆ ಮೂವರು ಸೋಮಾರಿ ಹುಡುಗರ ರೋಲರ್ ಕೋಸ್ಟರ್ ಜರ್ನಿಯ ಅನಾವರಣ ಮಾಡಿದ್ದಾರೆ. ಕೆಲವೆಡೆ ಡಬಲ್ ಮೀನಿಂಗ್ ಡೈಲಾಗ್ ಇದ್ದರೂ, ಪಕ್ಕಾ ಮಲೆನಾಡ ಪಡ್ಡೆಗಳ ಸಂಭಾಷಣೆಯಾದ ಕಾರಣ ಸುಕೇಶ್ ಬರವಣಿಗೆ ಇರುಸುಮುರುಸು ಎನಿಸುವುದಿಲ್ಲ. ಶಶಿ, ಪ್ರಜ್ವಲ್ ಮತ್ತು ಸುಕೇಶ್ ಚಿತ್ರವನ್ನು ಸರಾಗವಾಗಿ ಹೆಗಲ ಮೇಲೆ ಹೊತ್ತೊಯ್ದಿದ್ದಾರೆ. ಕಾಮಿಡಿ ಟೈಮಿಂಗ್, ಡೈಲಾಗ್ ಡೆಲಿವರಿ, ನಟನೆ ಎಲ್ಲೂ ಅವರು ಹೊಸಬರು ಅಂತ ಅನ್ನಿಸುವುದಿಲ್ಲ. ಸಂಗೀತ, ಛಾಯಾಗ್ರಹಣ ಚಿತ್ರಕ್ಕೆ ಪೂರಕವಾಗಿವೆ. ಒಂದೊಳ್ಳೆ ಕಂಟೆಂಟ್ ಇರುವ ಕಾಮಿಡಿ ಸಿನಿಮಾ ನೋಡಬೇಕು ಅಂತ ಇಚ್ಛಿಸುವವರಿಗೆ "ಇಂರ್ಟವಲ್' ಈ ವಾರದ ಉತ್ತಮ ಆಯ್ಕೆ.