ಲೀಡ್ಸ್: ಭಾರತ ತಂಡದ ಪ್ರಮುಖ ವೇಗಿ ಜಸ್ಪ್ರೀತ್ ಬುಮ್ರಾ ಫಿಟ್ನೆಸ್ ಕಾರಣದಿಂದಾಗಿ ಇಂಗ್ಲೆಂಡ್ ಪ್ರವಾಸದ ಎಲ್ಲ 5 ಟೆಸ್ಟ್ ಪಂದ್ಯಗಳಲ್ಲಿ ಆಡುವುದಿಲ್ಲ ಎಂದು ಈಗಾಗಲೆ ಘೋಷಿಸಲಾಗಿದೆ. ಅವರು ಸರಣಿಯಲ್ಲಿ 3 ಪಂದ್ಯಗಳನ್ನಷ್ಟೇ ಆಡುವ ನಿರೀಕ್ಷೆ ಇದ್ದು, ಆ 3 ಪಂದ್ಯಗಳು ಯಾವುವು ಎಂಬುದನ್ನು ಸ್ಪಷ್ಟಪಡಿಸಲಾಗಿಲ್ಲ. ಆದರೆ ಶುಕ್ರವಾರದಿಂದ ಹೆಡಿಂಗ್ಲೆಯಲ್ಲಿ ನಡೆಯಲಿರುವ ಮೊದಲ ಟೆಸ್ಟ್ನಲ್ಲಿ ಆಡಲಿರುವುದನ್ನು ಸ್ವತ@ ಬುಮ್ರಾ ಖಚಿತಪಡಿಸಿದ್ದಾರೆ.
“ನಾನು 3 ಪಂದ್ಯಗಳಲ್ಲಿ ಆಡುವುದನ್ನು ಎದುರು ನೋಡುತ್ತಿದ್ದೇನೆ. ಆದರೆ ಯಾವೆಲ್ಲ ಪಂದ್ಯಗಳಲ್ಲಿ ಆಡಲಿದ್ದೇನೆ ಎಂಬುದು ಇನ್ನೂ ನಿರ್ಧಾರವಾಗಿಲ್ಲ. ಮೊದಲ ಟೆಸ್ಟ್ನಲ್ಲಂತೂ ಖಂಡಿತವಾಗಿಯೂ ಆಡುವೆ. ನಂತರ ಏನಾಗುವುದು ಎಂಬುದನ್ನು ಕಾದು ನೋಡಬೇಕಿದೆ. ಕಾರ್ಯದೊತ್ತಡ ಮತ್ತು ಪರಿಸ್ಥಿತಿಯನ್ನು ಆಧರಿಸಿ ಉಳಿದಂತೆ ಮತ್ತೆರಡು ಟೆಸ್ಟ್ಗಳಲ್ಲಿ ಆಡಲಿದ್ದೇನೆ’ ಎಂದು ಬುಮ್ರಾ ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.
ಸರಣಿಯಲ್ಲಿ ಬುಮ್ರಾ ಆಡುವ ಯಾವುದಾದರು ಟೆಸ್ಟ್ಗೆ ಮಳೆ ಅಡಚಣೆ ತಂದರೆ ಅಥವಾ ಪಂದ್ಯ ಬೇಗನೆ ಮುಗಿದರೆ ಅವರು 3ಕ್ಕಿಂತ ಹೆಚ್ಚು ಟೆಸ್ಟ್ ಆಡಬಹುದು ಎನ್ನಲಾಗಿತ್ತು. ಆದರೆ ಬುಮ್ರಾ ಆ ಸಾಧ್ಯತೆಯನ್ನು ತಳ್ಳಿಹಾಕಿದ್ದು, ಸರಣಿಯಲ್ಲಿ 3ಕ್ಕಿಂತ ಹೆಚ್ಚು ಟೆಸ್ಟ್ಗಳಲ್ಲಿ ಆಡಬಾರದು ಎಂದು ಬಿಸಿಸಿಐ ವೈದ್ಯಕಿಯ ತಂಡ ತನಗೆ ಸ್ಪಷ್ಟ ಸೂಚನೆ ನೀಡಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.
4,5ರಲ್ಲಿ ಗಿಲ್, ಪಂತ್ ಬ್ಯಾಟಿಂಗ್
ರೋಹಿತ್ ಶರ್ಮ, ವಿರಾಟ್ ಕೊಹ್ಲಿ ನಿವೃತ್ತಿಯಿಂದಾಗಿ ಇಂಗ್ಲೆಂಡ್ನಲ್ಲಿ ಭಾರತ ಟೆಸ್ಟ್ ತಂಡದ ಬ್ಯಾಟಿಂಗ್ ಕ್ರಮಾಂಕದ ಬಗ್ಗೆ ಎದ್ದಿರುವ ಗೊಂದಲಗಳಿಗೆ ಉಪನಾಯಕ ರಿಷಭ್ ಪಂತ್ ಬುಧವಾರ ಅಲ್ಪಮಟ್ಟಿನ ತೆರೆ ಎಳೆದಿದ್ದಾರೆ. ನಾಯಕ ಶುಭಮಾನ್ ಗಿಲ್ 4ನೇ ಮತ್ತು ತಾನು 5ನೇ ಕ್ರಮಾಂಕದಲ್ಲಿ ಆಡಲಿರುವುದನ್ನು ವಿಕೆಟ್ ಕೀಪರ್,ಎಡಗೈ ಬ್ಯಾಟರ್ ಪಂತ್ ಖಚಿತಪಡಿಸಿದ್ದಾರೆ. ಆದರೆ 3ನೇ ಕ್ರಮಾಂಕದಲ್ಲಿ ಯಾರು ಆಡಬೇಕೆಂದು ಇನ್ನೂ ಚರ್ಚೆಗಳು ನಡೆಯುತ್ತಿವೆ ಎಂದು ಪಂತ್ ಹೇಳಿದ್ದಾರೆ. ಯಶಸ್ವಿ ಜೈಸ್ವಾಲ್ ಜತೆಗೆ ಕನ್ನಡಿಗ ಕೆಎಲ್ ರಾಹುಲ್ ಆರಂಭಿಕರಾಗಿ ಆಡುವುದು ಈಗಾಗಲೆ ಬಹುತೇಕ ಖಚಿತವೆನಿಸಿದೆ.
ಲೀಡ್ಸ್ನಲ್ಲಿ ಭಾರತ ತಂಡ
ಕೂಡಿಕೊಂಡ ಗಂಭೀರ್
ಆತಿಥೇಯ ಇಂಗ್ಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ಪೂರ್ವಭಾವಿಯಾಗಿ ಮುಖ್ಯ ಕೋಚ್ ಗೌತಮ್ ಗಂಭೀರ್ ಬುಧವಾರ ಭಾರತ ತಂಡವನ್ನು ಕೂಡಿಕೊಂಡಿದ್ದಾರೆ. ತಾಯಿಯ ಅನಾರೋಗ್ಯದಿಂದಾಗಿ ಅವರು ಕಳೆದ ವಾರ ದಿಢೀರ್ ತವರಿಗೆ ಮರಳಿದ್ದರು. ಲೀಡ್ಸ್ನಲ್ಲಿ ಮತ್ತೆ ಭಾರತ ತಂಡದ ಅಭ್ಯಾಸದ ಮೇಲ್ವಿಚಾರಣೆ ವಹಿಸಿಕೊಂಡ ಅವರು, ಮೊದಲ ಟೆಸ್ಟ್ ಪೂರ್ವಸಿದ್ಧತೆಯ ಬಗ್ಗೆ ಚರ್ಚಿಸಿದರು. ಗಂಭೀರ್ಗೆ ಇದು ಕೋಚ್ ಆಗಿ 4ನೇ ಟೆಸ್ಟ್ ಸರಣಿ ಆಗಿದ್ದು, ಕಳೆದೆರಡು ಟೆಸ್ಟ್ ಸರಣಿಗಳಲ್ಲಿ ನ್ಯೂಜಿಲೆಂಡ್ ಮತ್ತು ಆಸ್ಟ್ರೆಲಿಯಾ ಎದುರು ಕ್ರಮವಾಗಿ 0&3 ಮತ್ತು 1&3ರಿಂದ ಸೋತ ಹಿನ್ನಡೆ ಹೊಂದಿದ್ದಾರೆ.
ಭಾರತ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ಆತಿಥೇಯ ಇಂಗ್ಲೆಂಡ್ ಬುಧವಾರವೇ ಆಡುವ 11ರ ಬಳಗವನ್ನು ಘೋಷಿಸಿದೆ. ಆಲ್ರೌಂಡರ್ ಕ್ರಿಸ್ ವೋಕ್ಸ್ ಕಳೆದ ಡಿಸೆಂಬರ್ ಬಳಿಕ ಮೊದಲ ಬಾರಿ ತಂಡಕ್ಕೆ ಮರಳಿದ್ದರೆ, ವೇಗಿ ಬೆಡನ್ ಕರ್ಸ್ ತವರಿನಲ್ಲಿ ಮೊದಲ ಟೆಸ್ಟ್ ಆಡುವ ಅವಕಾಶ ಪಡೆದಿದ್ದಾರೆ. ಶೋಯಿಬ್ ಬಶೀರ್ ತಂಡದಲ್ಲಿರುವ ಏಕೈಕ ಸ್ಪಿನ್ನರ್ ಆಗಿದ್ದಾರೆ.
ಇಂಗ್ಲೆಂಡ್ 11ರ ಬಳಗ: ಜಾಕ್ ಕ್ರೌಲಿ, ಬೆನ್ ಡಕೆಟ್, ಒಲಿ ಪೋಪ್, ಜೋ ರೂಟ್, ಹ್ಯಾರಿ ಬ್ರೂಕ್, ಬೆನ್ ಸ್ಟೋಕ್ಸ್ (ನಾಯಕ), ಜೇಮಿ ಸ್ಮಿತ್ (ವಿ.ಕೀ), ಕ್ರಿಸ್ ವೋಕ್ಸ್, ಬೆಡನ್ ಕರ್ಸ್, ಜೋಶ್ ಟಂಗ್, ಶೋಯಿಬ್ ಬಶೀರ್.