ಕಣ್ಣೂರು ಏರ್‌ಪೋರ್ಟಿನಲ್ಲೂ ಚಿನ್ನ ಕಳ್ಳ ಸಾಗಾಟ ಆರಂಭ!

 
ಕಾಸರಗೋಡು: ಇದೇ ತಿಂಗಳು ಉದ್ಘಾಟನೆಗೊಂಡ ಕಣ್ಣೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಿದೇಶದಿಂದ 2 ಕೆ.ಜಿ ಚಿನ್ನ ಕಳ್ಳ ಸಾಗಾಟದ ಮೊದಲ ಪ್ರಕರಣ ಮಂಗಳವಾರ ರಾತ್ರಿ ಪತ್ತೆಯಾಗಿದೆ.
ದುಬೈಯಿಂದ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ವಿಮಾನದಲ್ಲಿ ಬಂದಿಳಿದ ಕಣ್ಣೂರು ಪಿಣರಾಯಿ ನಿವಾಸಿ ಮೊಹಮ್ಮದ್ ಶಾನ್ ಎಂಬಾತನನ್ನು ಏರ್ ಕಸ್ಟಮ್ಸ್ ಅಧಿಕಾರಿಗಳು ತಪಾಸಣೆ ನಡೆಸಿದಾಗ ಆತನ ಬಳಿಯಿದ್ದ ಮೈಕ್ರೊವೇವ್ ಓವನ್‌ನಲ್ಲಿ ಚಿನ್ನ ಅಡಗಿಸಿಟ್ಟಿರುವುದು ಪತ್ತೆಯಾಗಿದೆ. ಆರೋಪಿಯನ್ನು ವಶಕ್ಕೆ ಪಡೆಯಲಾಗಿದೆ.

ಮೊಹಮ್ಮದ್ ಶಾನ್ ದುಬೈಯಿಂದ ತಂದ ಚಿನ್ನ ಪಡೆದುಕೊಳ್ಳಲು ನಿಲ್ದಾಣದ ಹೊರಗೆ ಕೆಲವು ಯುವಕರು ಕಾರಿನಲ್ಲಿ ಕಾಯುತ್ತಿದ್ದು, ಅವರನ್ನೂ ಕಸ್ಟಮ್ಸ್ ಅಧಿಕಾರಿಗಳು ವಶಕ್ಕೆ ತೆಗೆದುಕೊಂಡಿದ್ದಾರೆ. ಚಿನ್ನ ಕಳ್ಳ ಸಾಗಾಟದಲ್ಲಿ ಕಾಸರಗೋಡು ಮೂಲದ ತಂಡವೊಂದು ಕಾರ್ಯಾಚರಿಸುತ್ತಿರುವುದಾಗಿ ಕಸ್ಟಮ್ಸ್ ವಿಭಾಗಕ್ಕೆ ಮಾಹಿತಿ ಲಭಿಸಿದೆ.