ಗ್ರೀನ್ವಿಲ್ಲೆ: 86 ವರ್ಷದ ವೃದ್ಧ. ಮುಖಕ್ಕೆ ಮುಸುಕು ಹಾಕಿಕೊಂಡು, ಸಶಸ್ತ್ರ ಸಹಿತನಾಗಿ ಬ್ಯಾಂಕ್ವೊಂದಕ್ಕೆ ನುಗ್ಗಿದ. ಅಲ್ಲಿರುವ ಸಿಬ್ಬಂದಿಯನ್ನೆಲ್ಲ ಗನ್ಪಾಯಿಂಟ್ನಲ್ಲಿ ಇಟ್ಟು ದರೋಡೆ ಮಾಡಲು ಶುರುವಿಟ್ಟುಕೊಂಡ. ಆದರೆ ಕನ್ನ ಹಾಕೋ ಪ್ರಯತ್ನ ಫಲಿಸದೆ ಈಗ ಪೋಲೀಸರ ವಶದಲ್ಲಿ ಇದ್ದಾನೆ…!
ದಕ್ಷಿಣ ಕೆರೋಲಿನಾದ ಗ್ರೀನ್ವಿಲ್ಲೆಯಲ್ಲಿ ಘಟನೆ ನಡೆದಿದೆ. ಬೆಳಗ್ಗೆ 9.30ರ ಹೊತ್ತಿಗೆ ಬ್ಯಾಂಕ್ಗೆ ನುಗ್ಗಿದ ಗಿಲ್ಬರ್ಟ್ ಪೌಲ್ ವೇರ್ ಹೆಸರಿನ ಈ ಮುಸುಕುಧಾರಿ ವೃದ್ಧ ಉದ್ಯೋಗಿಗಳೆಡೆಗೆ ಬಂದೂಕು ತೋರಿಸಿದ್ದಾನೆ. ನೀವೆಲ್ಲ ನಿಮ್ಮ ಸ್ವಂತ ಹಣದ ಜತೆ ಬ್ಯಾಂಕ್ನಲ್ಲಿರುವ ಹಣವನ್ನೂ ನೀಡಬೇಕು. ಇಲ್ಲದಿದ್ದರೆ ಶೂಟ್ ಮಾಡಿಬಿಡ್ತೀನಿ ಎಂದು ಹೆದರಿಸಿದ್ದಾನೆ. ಆತ ಮುದುಕ ಆದ್ರೆ ಏನು, ಅವನ ಕೈಲಿರೋ ಗನ್ಗೆ ಶಕ್ತಿ ಇದ್ಯಲ್ಲ..! ಹೆದರಿದ ಬ್ಯಾಂಕ್ ಸಿಬ್ಬಂದಿ ಇರೋಬರೋ ಹಣನೇಲ್ಲ ಅವನಿಗೆ ಕೊಟ್ಟರು.
ಆದರೆ ಆತ ಬ್ಯಾಂಕ್ನಿಂದ ಹೊರಹೋಗೋಷ್ಟರಲ್ಲಿ ಪೊಲೀಸರು ಆಗಮಿಸಿ ಬಂಧಿಸಿದ್ದಾರೆ. ಕಾರಣ ಇಷ್ಟೇ ವೇರ್ ತನ್ನ ಕಾರಿನ ಬಳಿ ಹಿಂದಿರುಗಲು ತುಂಬ ತಡ ಮಾಡಿದರು. ವಯಸ್ಸಾಗಿದೆಯಲ್ಲ, ಹಣದ ಗಂಟು ಹೊತ್ತು ವೇಗವಾಗಿ ಓಡಿ ಹೋಗಿ ಕಾರಿನಲ್ಲಿ ಕುಳಿತುಕೊಳ್ಳಲು ಸಾಧ್ಯವಾಗಲೇ ಇಲ್ಲ. ಅಷ್ಟರಲ್ಲಾಗಲೇ ಬ್ಯಾಂಕ್ ಸಿಬ್ಬಂದಿ ಪೊಲೀಸರಿಗೆ ವಿಷಯ ತಿಳಿಸಿದ್ದರು. ಪೊಲೀಸ್ ಸ್ಟೇಶನ್ ಕೂಡ ಬ್ಯಾಂಕ್ನಿಂದ ಹತ್ತಿರವೇ ಇತ್ತು. ಕೂಡಲೇ ಆಗಮಿಸಿ ವೇರ್ನನ್ನು ಬಂಧಿಸಿದ್ದಾರೆ.
ಆತ ಕದ್ದೊಯ್ದಿದ್ದ ಹಣ ಹಾಗೂ ಅವನ ಬಳಿ ಇದ್ದ ಶಸ್ತ್ರಗಳನ್ನೆಲ್ಲ ವಶಪಡಿಸಿಕೊಂಡಿದ್ದಾರೆ. ಸದ್ಯ ವೃದ್ಧ ಪೊಲೀಸ್ ಕಸ್ಟಡಿಯಲ್ಲೇ ಇದ್ದಾನೆ. (ಏಜೆನ್ಸೀಸ್)