ಹೂಕೋಸಿನಲ್ಲಿರುವ ಹುಳ ತೆಗೆಯಲು ಈ ಟಿಪ್ಸ್ ಬಳಸಿ

ಹಲವರು ದೇಹಕ್ಕೆ ಆರೋಗ್ಯಕಾರಿಯಾಗಿರುವ ಹೂಕೋಸನ್ನು ಕೊಂಡುಕೊಳ್ಳೋದೆ ಬಿಟ್ಟುಬಿಟ್ಟಿದ್ದಾರೆ. ಇದಕ್ಕೆ ಕಾರಣ ಅದರಲ್ಲಿರುವ ಹುಳ. ಎಷ್ಟೇ ಸ್ವಚ್ಛ ಮಾಡಿದರೂ ಸಹ ಕಣ್ಣಿಗೆ ಕಾಣದ ಹುಳಗಳು ಇರುತ್ತವೆ. ಹೀಗಾಗಿ ಅದನ್ನು ಹುಡುಕಿ ಸಮಯ ವ್ಯರ್ಥ ಮಾಡೋದೆ ಬೇಡ ಎಂದು ಖರೀದಿಯೇ ಮಾಡೋದಿಲ್ಲ. ಇನ್ಮುಂದೆ ಆ ಚಿಂತೆ ಬಿಡಿ ನಿಮ್ಮಿಷ್ಟದ ಹೂಕೋಸನ್ನು ಸುಲಭವಾಗಿ ಹುಳುಗಳಿಂದ ಮುಕ್ತವಾಗಿಸಲು ಬಳಸಬೇಕಾದ ಕೆಲವು ಟಿಪ್ಸ್ ಇಲ್ಲಿದೆ.

ತರಕಾರಿ ಅಂಗಡಿಯಿಂದ ತಂದ ಹೂಕೋಸನ್ನು ಮೊದಲು ಎಳೆಎಳೆಯಾಗಿ ಬಿಡಿಸಿ, ನಂತರ ಕೊಂಚ ಬಿಸಿಯಾದ ನೀರಿಗೆ ಹಾಕಿ. ಜೊತೆಗೆ ಉಪ್ಪು ಹಾಗೂ ಅರಿಶಿನ ಹಾಕಿ ಚೆನ್ನಾಗಿ ಕಲಿಸಿ. ಇದನ್ನು ಒಂದು ಹದಿನೈದರಿಂದ 20 ನಿಮಿಷ ಹಾಗೆಯೇ ನೆನೆಯಲು ಬಿಡಿ. ಅರಿಶಿನ ಉಪ್ಪು ಹುಳ ಹೊರಬರುವಂತೆ ಮಾಡುತ್ತದೆ ನಂತರ ಅದನ್ನು ಶುದ್ಧ ನೀರಿನಲ್ಲಿ ಹಾಕಿ, ಅಡುಗೆ ಮಾಡಿ.

ಒಂದು ಪಾತ್ರೆಯಲ್ಲಿ ನೀರನ್ನು ತುಂಬಿ ಅದಕ್ಕೆ ಅರ್ಧ ಕಪ್​ ಬಿಳಿ ವಿನೇಗರ್​ ಹಾಗೂ ಒಂದು ಟೀ ಚಮಚ ಅಡುಗೆ ಸೋಡಾ ಹಾಕಿ. ಈಗ ಬಿಡಿಸಿಟ್ಟ ಹೂಕೋಸ್​ ಎಳೆಯನ್ನು ನೀರಿಗೆ ಹಾಕಿ 10ರಿಂದ15 ನಿಮಿಷ ನೆನೆಯಲು ಬಿಡಿ. ನಂತರ ಶುದ್ಧವಾದ ನೀರಿನಲ್ಲಿ ಚೆನ್ನಾಗಿ ತೊಳಯಿರಿ ಇದರಿಂದ ತರಕಾರಿಯಲ್ಲಿ ಕಾಣುವ ಹುಳ ಹಾಗೂ ಕೊಳೆ ಹೊರಟು ಹೋಗಿರುತ್ತದೆ.

ಬಿಸಿ ನೀರನ್ನು ಕುದಿಯಲು ಬಿಟ್ಟು ಇದಕ್ಕೆ ಎಳೆಯಾಗಿ ಬಿಡಿಸಿಟ್ಟ ಹೂಕೋಸನ್ನು ಹಾಕಿ ತೀರಾ ಮೆತ್ತನೆಯಾಗದಂತೆ ನೋಡಿಕೊಂಡು ಕುದಿಸಿ. ಇದರಿಂದ ಹುಳಗಳು ದೂರವಾಗುವ ಸಾಧ್ಯತೆ ಇದೆ. ಎಲೆಕೋಸನ್ನು ಸಹಾ ಇದೇ ಮಾದರಿಯಲ್ಲಿ ತೊಳೆದರೆ ಸಮಸ್ಯೆಯೇನೂ ಆಗೋದಿಲ್ಲ.

ಹೂಕೋಸು ಮಾತ್ರವಲ್ಲ ಎಲೆಕೋಸಿನಲ್ಲಿ ಕೀಟಗಳು ಇರುತ್ತದೆ. ಹೀಗಾಗಿ ಇವನ್ನು ಸುಲಭವಾಗಿ ಹೋಗಲಾಡಿಸಲು, ಒಂದು ದೊಡ್ಡ ಪಾತ್ರೆಯಲ್ಲಿ ಹೂಕೋಸು ಅಥವಾ ಎಲೆ ಕೋಸು ಹಾಕಿ ಅದಕ್ಕೆ ಅಡುಗೆ ಸೋಡ ಹಾಕಿ ನಿಂಬೆ ಹಣ್ಣು ಹಿಂಡಿ, ಚೆನ್ನಾಗಿ ಕಲಿಸಿ ಹತ್ತು ನಿಮಿಷ ನೆನೆಯಲು ಬಿಟ್ಟ ನಂತರ ಒಳ್ಳೆ ನೀರಿನಿಂದ ತೊಳೆಯಿರಿ.