ಈ ಆರೋಗ್ಯ ಸಮಸ್ಯೆ ಇದ್ದವರು ಎಳನೀರು ಕುಡಿಯುವ ಮುನ್ನ ಯೋಚಿಸಿ!

ಎಳನೀರು ಪ್ರಕೃತಿ ನಮಗೆ ನೀಡಿರುವ ಅತ್ಯಂತ ಅದ್ಭುತವಾದ ಆರೋಗ್ಯ ಪಾನೀಯ ಎಂಬುದರಲ್ಲಿ ಸಂಶಯವಿಲ್ಲ. ದೇಹವನ್ನು ಹೈಡ್ರೇಟ್ ಆಗಿಡಲು ಮತ್ತು ತಂಪು ಮಾಡಲು ಹೆಚ್ಚಿನವರು ಎಳನೀರನ್ನು ಆಶ್ರಯಿಸುತ್ತಾರೆ. ಆದರೆ, ಅಮೃತದಂತಿರುವ ಈ ಎಳನೀರು ಎಲ್ಲರ ದೇಹಕ್ಕೂ ಒಗ್ಗುವುದಿಲ್ಲ.

ಎಳನೀರಿನಲ್ಲಿ ಪೊಟ್ಯಾಸಿಯಮ್ ಅಂಶ ಅತ್ಯಂತ ಹೆಚ್ಚಾಗಿರುತ್ತದೆ. ಸಾಮಾನ್ಯವಾಗಿ ಆರೋಗ್ಯವಂತ ವ್ಯಕ್ತಿಯ ದೇಹದಲ್ಲಿ ಹೆಚ್ಚುವರಿ ಪೊಟ್ಯಾಸಿಯಮ್ ಮೂತ್ರದ ಮೂಲಕ ಹೊರಹೋಗುತ್ತದೆ. ಆದರೆ, ಕಿಡ್ನಿ ವೈಫಲ್ಯ ಅಥವಾ ಮೂತ್ರಪಿಂಡದ ಕಾಯಿಲೆ ಇರುವವರಲ್ಲಿ ಈ ಪ್ರಕ್ರಿಯೆ ಸರಿಯಾಗಿ ನಡೆಯುವುದಿಲ್ಲ.

ಎಳನೀರು ರಕ್ತದೊತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ, ಇದು ಅಧಿಕ ರಕ್ತದೊತ್ತಡ ಇರುವವರಿಗೆ ವರ. ಆದರೆ, ಯಾರು ಈಗಾಗಲೇ ಲೋ ಬಿಪಿ ಸಮಸ್ಯೆಯಿಂದ ಬಳಲುತ್ತಿದ್ದಾರೋ ಅವರು ಎಳನೀರು ಕುಡಿದರೆ ರಕ್ತದೊತ್ತಡ ಮತ್ತಷ್ಟು ಕುಸಿದು ತಲೆಸುತ್ತು, ದೌರ್ಬಲ್ಯ ಅಥವಾ ಮೂರ್ಛೆ ಹೋಗುವ ಸಾಧ್ಯತೆ ಇರುತ್ತದೆ.

ಎಳನೀರಿನಲ್ಲಿ ಕಾರ್ಬೋಹೈಡ್ರೇಟ್ಸ್ ಮತ್ತು ನೈಸರ್ಗಿಕ ಗ್ಲುಕೋಸ್ ಪ್ರಮಾಣ ಗಮನಾರ್ಹವಾಗಿರುತ್ತದೆ. ತೀವ್ರವಾದ ಮಧುಮೇಹ ಇರುವವರು ಅಥವಾ ರಕ್ತದಲ್ಲಿ ಸಕ್ಕರೆಯ ಮಟ್ಟ ಪದೇ ಪದೇ ಏರುಪೇರಾಗುವವರು ಅತಿಯಾಗಿ ಎಳನೀರು ಕುಡಿದರೆ, ಅದು ರಕ್ತದಲ್ಲಿ ಗ್ಲುಕೋಸ್ ಮಟ್ಟವನ್ನು ತಕ್ಷಣವೇ ಹೆಚ್ಚಿಸಬಹುದು.

ಎಳನೀರು ದೇಹಕ್ಕೆ ಅತ್ಯಂತ ತಂಪು. ಯಾರು ಸದಾ ಶೀತ, ಕೆಮ್ಮು, ಕಫದ ತೊಂದರೆ ಅಥವಾ ಸೈನಸ್ ಸಮಸ್ಯೆಯಿಂದ ಬಳಲುತ್ತಿದ್ದಾರೋ, ಅವರು ಎಳನೀರು ಕುಡಿಯುವುದರಿಂದ ದೇಹದ ಉಷ್ಣಾಂಶ ಮತ್ತಷ್ಟು ಕಡಿಮೆಯಾಗಿ ಕಫ ಗಟ್ಟಿಯಾಗಬಹುದು ಮತ್ತು ಚಳಿಯ ತೀವ್ರತೆ ಹೆಚ್ಚಾಗಬಹುದು.

ಎಳನೀರಿನಲ್ಲಿ FODMAPs ಎಂಬ ಅಂಶವಿರುತ್ತದೆ. ಇವು ಜೀರ್ಣಿಸಿಕೊಳ್ಳಲು ಸ್ವಲ್ಪ ಕಷ್ಟಕರ. ಅತಿ ಸೂಕ್ಷ್ಮವಾದ ಹೊಟ್ಟೆಯ ಸಮಸ್ಯೆ ಇರುವವರು ಎಳನೀರನ್ನು ಅತಿಯಾಗಿ ಸೇವಿಸಿದರೆ ಹೊಟ್ಟೆ ಉಬ್ಬರ, ಗ್ಯಾಸ್ಟ್ರಿಕ್ ಅಥವಾ ಭೇದಿ ಕಾಣಿಸಿಕೊಳ್ಳಬಹುದು.