ಈ 5 ಅಭ್ಯಾಸಗಳಿಂದ ನಿಮ್ಮ ತಲೆ ಕೂದಲು ಉದರುತ್ತಿದೆ ಎಚ್ಚರ!

ನಿಮ್ಮ ದೈನಂದಿನ ಕೆಲವು ಸಾಮಾನ್ಯ ತಪ್ಪುಗಳೇ ಕೂದಲು ಉದುರಲು ಮುಖ್ಯ ಕಾರಣವಾಗಿರಬಹುದು. ಅತಿಯಾದ ಬಿಸಿ ನೀರಿನ ಸ್ನಾನ, ಒದ್ದೆ ಕೂದಲು ಬಾಚುವುದು, ಹೀಟ್ ಸ್ಟೈಲಿಂಗ್ ಉಪಕರಣಗಳ ಅತಿಯಾದ ಬಳಕೆ, ಬಿಗಿಯಾದ ಹೇರ್ ಸ್ಟೈಲ್ ಮತ್ತು ಕಳಪೆ ಆಹಾರ ಪದ್ಧತಿಯಿಂದ ಕೂದಲು ದುರ್ಬಲಗೊಂಡು ಉದುರಲಾರಂಭಿಸುತ್ತದೆ.

ಅತಿಯಾದ ಬಿಸಿ ನೀರನ್ನು ತಲೆಗೆ ಹಾಕಿಕೊಳ್ಳುವುದರಿಂದ ಕೂದಲಿನ ಬುಡದಲ್ಲಿರುವ ನೈಸರ್ಗಿಕ ತೈಲಾಂಶ ನಾಶವಾಗುತ್ತದೆ. ಇದರಿಂದ ತಲೆಬುರುಡೆ ಒಣಗಿ, ಕೂದಲಿನ ಬೇರುಗಳು ದುರ್ಬಲಗೊಳ್ಳುತ್ತವೆ.

ಕೂದಲು ಒದ್ದೆಯಾಗಿದ್ದಾಗ ಅದರ ಬೇರುಗಳು ಅತ್ಯಂತ ಮೃದು ಮತ್ತು ಸೂಕ್ಷ್ಮವಾಗಿರುತ್ತವೆ. ಈ ಸಮಯದಲ್ಲಿ ಗಟ್ಟಿಯಾಗಿ ಬಾಚಣಿಗೆಯಿಂದ ಬಾಚುವುದರಿಂದ ಅಥವಾ ಟವೆಲ್‌ನಿಂದ ಜೋರಾಗಿ ಒರೆಸುವುದರಿಂದ ಕೂದಲು ಮಧ್ಯದಲ್ಲೇ ಕತ್ತರಿಸಿ ಹೋಗುತ್ತದೆ.

ಹೇರ್ ಡ್ರೈಯರ್, ಸ್ಟ್ರೈಟನರ್ ಅಥವಾ ಕರ್ಲಿಂಗ್ ಐರನ್‌ಗಳನ್ನು ಪ್ರತಿದಿನ ಅಥವಾ ಅತಿಯಾಗಿ ಬಳಸುವುದರಿಂದ ಕೂದಲಿನ ಪ್ರೋಟೀನ್ ರಚನೆ ಹಾಳಾಗುತ್ತದೆ. ಇವುಗಳಿಂದ ಹೊರಡುವ ಅತಿಯಾದ ಶಾಖವು ಕೂದಲನ್ನು ತೇವಾಂಶರಹಿತವಾಗಿಸಿ, ಸುಲಭವಾಗಿ ಮುರಿದುಹೋಗುವಂತೆ ಮಾಡುತ್ತದೆ.

ಕೂದಲನ್ನು ಗಟ್ಟಿಯಾಗಿ ಹಿಂದಕ್ಕೆ ಜಡಿದು ಜುಟ್ಟು ಕಟ್ಟುವುದು ಅಥವಾ ಜಡೆ ಹೆಣೆಯುವುದರಿಂದ ಕೂದಲಿನ ಬೇರುಗಳ ಮೇಲೆ ನಿರಂತರ ಒತ್ತಡ ಬೀಳುತ್ತದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ 'ಟ್ರಾಕ್ಷನ್ ಅಲೋಪೆಸಿಯಾ' ಎಂದು ಕರೆಯಲಾಗುತ್ತದೆ. ಇದು ದೀರ್ಘಕಾಲ ಮುಂದುವರಿದರೆ ಮುಂಭಾಗದ ಕೂದಲು ಶಾಶ್ವತವಾಗಿ ಇಲ್ಲದಂತಾಗಬಹುದು.

ದೇಹಕ್ಕೆ ಅಗತ್ಯವಿರುವ ಪ್ರೋಟೀನ್, ಐರನ್ ಜಿಂಕ್ ಮತ್ತು ವಿಟಮಿನ್‌ಗಳ ಕೊರತೆಯಾದಾಗ ಕೂದಲಿಗೆ ಸರಿಯಾದ ಪೋಷಣೆ ಸಿಗುವುದಿಲ್ಲ. ಇದರೊಂದಿಗೆ ಅತಿಯಾದ ಮಾನಸಿಕ ಒತ್ತಡ ಕೂಡ ಹಾರ್ಮೋನ್‌ಗಳ ಏರುಪೇರಿಗೆ ಕಾರಣವಾಗಿ ಕೂದಲು ಭಾರಿ ಪ್ರಮಾಣದಲ್ಲಿ ಉದುರುವಂತೆ ಮಾಡುತ್ತದೆ.