ಕಪ್ಪು-ಬಿಳುಪಿನ ಸುಂದರಿ 'ಅದಿತಿ ರಾವ್​ ಹೈದರಿ'

ದಕ್ಷಿಣ ಭಾರತ ಚಿತ್ರರಂಗದಲ್ಲಿ ತನ್ನದೇ ಆದ ವಿಶಿಷ್ಟ ಅಭಿನಯದ ಮೂಲಕ ಖ್ಯಾತಿ ಗಳಿಸಿದ ನಟಿ ಎಂದರೆ, ಅದಿತಿ ರಾವ್​ ಹೈದರಿ ಆಗಿದ್ದಾರೆ. ಇವರು ಇತ್ತೀಚೆಗೆ ಬ್ಲ್ಯಾಕ್​ ಎಂಡ್​ ವೈಟ್​ ಥೀಮ್​ನಲ್ಲಿ ಫೋಟೊಶೂಟ್​ ನಡೆಸಿದ್ದು, ಆ ಫೋಟೊಗಳನ್ನು ತಮ್ಮ ಇನ್​​ಸ್ಟಾಗ್ರಾಮ್​ನಲ್ಲಿ ಹಂಚಿಕೊಂಡಿದ್ದಾರೆ.

ಅದಿತಿ ರಾವ್ ಹೈದರಿ ಅಕ್ಟೋಬರ್​ 28, 1978 ರಲ್ಲಿ ಹೈದರಾಬಾದ್​ನಲ್ಲಿ ಜನಿಸಿದರು. ಇವರು ರಾಯಲ್ ಹೈದರಾಬಾದ್ ಮತ್ತು ಅಸ್ಸಾಂ ರಾಜಮನೆತನಕ್ಕೆ ಸೇರಿದವರು. ಅಕ್ಬರ್ ಹೈದರಿ ಹಾಗೂ ಮುಹಮ್ಮದ್ ಸಾಲೆಹ್ ಅಕ್ಬರ್ ಹೈದರಿ ಅವರ ಮೊಮ್ಮಗಳಾಗಿದ್ದಾರೆ.

ಅದಿತಿ ಭಾರತೀಯ ಶಾಸ್ತ್ರೀಯ ಭರತನಾಟ್ಯ ನೃತ್ಯಗಾರ್ತಿಯಾಗಿ ತರಬೇತಿ ಪಡೆದಿದ್ದಾರೆ. ಪ್ರಖ್ಯಾತ ನೃತ್ಯ ಗುರು ಲೀಲಾ ಸ್ಯಾಮ್ಸನ್ ಅವರ ಮಾರ್ಗದರ್ಶನದಲ್ಲಿ ಭರತನಾಟ್ಯ ಕಲಿತು, ವೇದಿಕೆಗಳ ಮೇಲೆ ಅದ್ಭುತ ಪ್ರದರ್ಶನಗಳನ್ನು ನೀಡುವ ಮೂಲಕ ಕಲಾ ಲೋಕದಲ್ಲಿ ಗುರುತಿಸಿಕೊಂಡಿದ್ದಾರೆ.

2006 ರಲ್ಲಿ ಬಿಡುಗಡೆಯಾದ ಮಲಯಾಳಂ ಚಲನಚಿತ್ರ 'ಪ್ರಜಾಪತಿ' ಮೂಲಕ ಇವರು ನಟನಾ ಲೋಕಕ್ಕೆ ಅಧಿಕೃತವಾಗಿ ಕಾಲಿಟ್ಟರು. ಈ ಚಿತ್ರದ ಮೂಲಕ ಸಿನಿಪ್ರೇಮಿಗಳ ಗಮನ ಸೆಳೆದ ಇವರು, ತದನಂತರ ವಿವಿಧ ಭಾಷೆಗಳ ಜನಪ್ರಿಯ ಚಿತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡರು.

ಮಣಿರತ್ನಂ ನಿರ್ದೇಶನದ ತಮಿಳು ಚಿತ್ರ 'ಕಾಟ್ರು ವೆಳಿಯಿದೈ' ಮತ್ತು 'ಚೆಕ್ಕ ಶಿವಂತ ವಾನಮ್' ಹಾಗೂ ಬಾಲಿವುಡ್‌ನ 'ಪದ್ಮಾವತ್', 'ವಜೀರ್' ನಂತಹ ಪ್ರಮುಖ ಚಲನಚಿತ್ರಗಳಲ್ಲಿ ಅದ್ಭುತ ಪಾತ್ರಗಳನ್ನು ನಿರ್ವಹಿಸುವ ಮೂಲಕ ದೇಶಾದ್ಯಂತ ಅಪಾರ ಜನಪ್ರಿಯತೆಯನ್ನು ಸಂಪಾದಿಸಿದ್ದಾರೆ.

ದಕ್ಷಿಣ ಭಾರತದ ಖ್ಯಾತ ನಟ ಸಿದ್ಧಾರ್ಥ್ ಅವರೊಂದಿಗೆ ಕೆಲವು ವರ್ಷಗಳ ಕಾಲ ಪ್ರೇಮದಲ್ಲಿದ್ದ ಇವರು, 2024 ರ ಸೆಪ್ಟೆಂಬರ್‌ನಲ್ಲಿ ತೆಲಂಗಾಣದ ವನಪರ್ತಿಯ ಐತಿಹಾಸಿಕ ಶ್ರೀರಂಗಪುರ ದೇವಾಲಯದಲ್ಲಿ ಸಾಂಪ್ರದಾಯಿಕ ಹಾಗೂ ಸರಳ ರೀತಿಯಲ್ಲಿ ವಿವಾಹವಾದರು.

ಸಿನಿಮಾಗಳಲ್ಲಿ ತಮ್ಮ ನಟನೆ ಮತ್ತು ಸೌಂದರ್ಯದಿಂದ ಪ್ರಸಿದ್ಧಿ ಪಡೆದಿರುವ ಅದಿತಿ ರಾವ್ ಹೈದರಿ, ಸಾಮಾಜಿಕ ಜಾಲತಾಣಗಳಲ್ಲಿಯೂ ಸದಾ ಸಕ್ರಿಯರಾಗಿದ್ದು, ತಮ್ಮ ಫ್ಯಾಷನ್ ಹಾಗೂ ಸ್ಟೈಲ್ ಮೂಲಕ ಯುವಜನರ ನೆಚ್ಚಿನ ನಾಯಕಿಯಾಗಿ ಮೆರೆಯುತ್ತಿದ್ದಾರೆ.