ಆರೆಂಜ್ ಲುಕ್‌ನಲ್ಲಿ ಮಿಂಚಿದ ಶ್ರೀದೇವಿ!

ಶ್ರೀದೇವಿ ವಿಜಯ್‌ಕುಮಾರ್ ಅವರು ಖ್ಯಾತ ನಟ ವಿಜಯ್‌ಕುಮಾರ್ ಮತ್ತು ನಟಿ ಮಂಜುಳಾ ವಿಜಯ್‌ಕುಮಾರ್ ಅವರ ಪುತ್ರಿ. ಬಾಲ್ಯದಲ್ಲಿಯೇ ಚಿತ್ರರಂಗ ಪ್ರವೇಶಿಸಿದ ಅವರು 1992ರಲ್ಲಿ ಬಿಡುಗಡೆಯಾದ ‘ರಿಕ್ಷಾ ಮಾಮ’ ಚಿತ್ರದ ಮೂಲಕ ಬಾಲನಟಿಯಾಗಿ ಅಭಿನಯ ಆರಂಭಿಸಿದರು.

2002 ರಲ್ಲಿ ಬಿಡುಗಡೆಯಾದ ‘ಈಶ್ವರ್’ ಚಿತ್ರದ ಮೂಲಕ ತೆಲುಗು ಚಿತ್ರರಂಗದಲ್ಲಿ ನಾಯಕಿಯಾಗಿ ಪಾದಾರ್ಪಣೆ ಮಾಡಿದರು. ಈ ಚಿತ್ರದಲ್ಲಿ ಪ್ರಭಾಸ್ ಅವರಿಗೆ ಜೋಡಿಯಾಗಿ ನಟಿಸಿದ್ದರು. ಇದೇ ವರ್ಷ ‘ಕಾದಲ್ ವೈರಸ್’ ಚಿತ್ರದ ಮೂಲಕ ತಮಿಳು ಚಿತ್ರರಂಗದಲ್ಲೂ ನಾಯಕಿಯಾಗಿ ಗುರುತಿಸಿಕೊಂಡರು.

ಪ್ರಿಯಮಾನ ತೋಜಿ, ಮಾಧವನ್, ತಿತ್ತಿಕ್ಕುದೇ, ದೇವತೈಯೈ ಕಂಡೇನ್, ನಿನ್ನೆ ಇಷ್ಟಪಟ್ಟಾನು, ಆದಿ ಲಕ್ಷ್ಮಿ, ಪೆಳ್ಳಿಕಾನಿ ಪ್ರಸಾದ್, ವೀರ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಕನ್ನಡದಲ್ಲಿ ಪ್ರೀತಿಗಾಗಿ ಸೇರಿದಂತೆ ವಿವಿಧ ಚಿತ್ರಗಳಲ್ಲಿ ಕಾಣಿಸಿಕೊಂಡು ಕನ್ನಡ ಪ್ರೇಕ್ಷಕರಿಗೂ ಪರಿಚಿತರಾದರು.

ಶ್ರೀದೇವಿ ಅವರ ಸಹಜ ಅಭಿನಯ ಹಲವು ಸಂದರ್ಭಗಳಲ್ಲಿ ಮೆಚ್ಚುಗೆ ಪಡೆದಿದೆ. ‘ಪ್ರಿಯಮಾನ ತೋಜಿ’, ‘ನಿನ್ನೆ ಇಷ್ಟಪಟ್ಟಾನು’ ಹಾಗೂ ‘ತಿತ್ತಿಕ್ಕುದೇ’ ಚಿತ್ರಗಳ ಅಭಿನಯಕ್ಕಾಗಿ ಪ್ರತಿಷ್ಠಿತ ಚಲನಚಿತ್ರ ಪ್ರಶಸ್ತಿಗಳಲ್ಲಿ ನಾಮನಿರ್ದೇಶನಗೊಂಡಿದ್ದರು.

ಶ್ರೀದೇವಿ ವಿಜಯ್‌ಕುಮಾರ್ ಅವರು 2009 ರಲ್ಲಿ ರಾಹುಲ್ ಅವರನ್ನು ವಿವಾಹವಾದರು. ದಾಂಪತ್ಯ ಜೀವನದ ಜೊತೆಗೆ ಕುಟುಂಬಕ್ಕೂ ಹೆಚ್ಚಿನ ಆದ್ಯತೆ ನೀಡುತ್ತಿರುವ ಅವರು, ಪತಿಯ ಪ್ರೋತ್ಸಾಹದಿಂದ ತಮ್ಮ ವೃತ್ತಿಜೀವನವನ್ನು ಮುಂದುವರಿಸಿಕೊಂಡು ಬಂದಿದ್ದಾರೆ. ಅವರಿಗೆ ಒಬ್ಬ ಪುತ್ರಿಯಿದ್ದಾರೆ.

ಚಿತ್ರರಂಗದಿಂದ ಕೆಲಕಾಲ ದೂರವಿದ್ದ ಬಳಿಕ ಶ್ರೀದೇವಿ ವಿಜಯ್‌ಕುಮಾರ್ ಮತ್ತೆ ಅಭಿನಯದತ್ತ ಮರಳಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ತೆಲುಗು ಚಿತ್ರಗಳಲ್ಲಿ ಕಾಣಿಸಿಕೊಂಡಿರುವ ಅವರು, ಕಿರುತೆರೆಯಲ್ಲೂ ಸಕ್ರಿಯರಾಗಿದ್ದಾರೆ.