ಶಾಕುಂತ್ಲೆ ಸಿಕ್ಕಳು ಸುಮ್ ಸುಮ್ನೆ ನಕ್ಕಳು!

ಕಾಡಿನ ರಾಣಿ ಶಕುಂತಲೆ, ತನ್ನೊಳಗೆ ಹೊಸ ಜೀವವನ್ನು ಹೊತ್ತುಕೊಂಡಿದ್ದಾಳೆ ಎಂಬ ಪರಿಕಲ್ಪನೆಯಲ್ಲಿ ಹರ್ಷಿಕಾ ಪೂಣಚ್ಚ ಅವರು ಗಮನ ಸೆಳೆಯುತ್ತಿದ್ದಾರೆ. ಹೂವಿನಿಂದ ಅಲಂಕರಿಸಿದ ರವಿಕೆ, ಕೈಯಲ್ಲಿನ ನವಿಲುಗರಿ ಹಾಗೂ ಪ್ರಕೃತಿಯ ನಡುವೆ ಮೂಡಿಬಂದಿರುವ ಈ ರೂಪ ತಾಯ್ತನದ ಸೌಂದರ್ಯವನ್ನು ಸಾರುತ್ತದೆ.

ಶಕುಂತಲೆ ಪ್ರಕೃತಿಯ ಮಗಳು, ಮೃದು ಸ್ವಭಾವದ ಜೊತೆಗೆ ಅಪಾರ ಶಕ್ತಿಯ ಪ್ರತೀಕ. ಅದೇ ಭಾವವನ್ನು ಹರ್ಷಿಕಾ ತಮ್ಮ ಮಾತೃತ್ವದ ಛಾಯಾಚಿತ್ರದಲ್ಲಿ ಕಟ್ಟಿಕೊಟ್ಟಿದ್ದಾರೆ. ಪ್ರತಿಯೊಂದು ಹೂವು, ಸೀರೆಯ ಮಡಿಕೆ ಮತ್ತು ಕಾಡಿನ ಹಿನ್ನೆಲೆ ಹೊಸ ಜೀವದ ಆಗಮನವನ್ನು ಪ್ರತಿಬಿಂಬಿಸುವಂತಿದೆ.

ಹರ್ಷಿಕಾ ಹಾಗೂ ನಟ ಭುವನ್ ಪೊನ್ನಣ್ಣ ದಂಪತಿ 2026ರಲ್ಲಿ ತಮ್ಮ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಈಗಾಗಲೇ 2024ರಲ್ಲಿ ಹೆಣ್ಣುಮಗುವನ್ನು ಸ್ವಾಗತಿಸಿರುವ ಈ ಜೋಡಿ, ಸೆಪ್ಟೆಂಬರ್‌ನಲ್ಲಿ ಕುಟುಂಬಕ್ಕೆ ಮತ್ತೊಂದು ಪುಟ್ಟ ಸದಸ್ಯನ ಆಗಮನವನ್ನು ಎದುರು ನೋಡುತ್ತಿದೆ.

ಪಿಯುಸಿ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟ ಹರ್ಷಿಕಾ, ತಮಸ್ಸು, ಜಾಕಿ, ಜುಗಾರಿ, ನಾರಿಯ ಸೀರೆ ಕದ್ದ, ಮಂಗನ ಕೈಯಲ್ಲಿ ಮಾಣಿಕ್ಯ, ಅದ್ವೈತ, ಬೇರಾ, ಕಾಸಿನ ಸರ, ಮರಕಾಸ್ತ್ರ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ‘ತಮಸ್ಸು’ ಚಿತ್ರಕ್ಕಾಗಿ ಕರ್ನಾಟಕ ರಾಜ್ಯ ಚಲನಚಿತ್ರ ಪ್ರಶಸ್ತಿಯನ್ನೂ ಪಡೆದಿದ್ದಾರೆ.

2023ರಲ್ಲಿ ಭುವನ್ ಪೊನ್ನಣ್ಣ ಅವರನ್ನು ಕೊಡವ ಸಂಪ್ರದಾಯದಂತೆ ವಿವಾಹವಾದ ಹರ್ಷಿಕಾ, ಕುಟುಂಬ ಮತ್ತು ವೃತ್ತಿಜೀವನವನ್ನು ಸಮತೋಲನಗೊಳಿಸುತ್ತಿದ್ದಾರೆ. ಇದೀಗ ಎರಡನೇ ಬಾರಿಗೆ ತಾಯಿಯಾಗುತ್ತಿರುವ ಸಂಭ್ರಮ ಅವರ ಜೀವನದ ಮತ್ತೊಂದು ಸುಂದರ ಅಧ್ಯಾಯವಾಗಿದೆ.