ಬಜೆಟ್​ ಮಂಡನೆಯಲ್ಲಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಧರಿಸಿದ ಸೀರೆಗಳು

ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಮಂಡಿಸಿದ ಎಂಟು ಬಜೆಟ್‌ಗಳು ಕೇವಲ ಆರ್ಥಿಕ ಅಂಕಿಅಂಶಗಳಿಂದ ಮಾತ್ರವಲ್ಲದೆ, ಅವರು ಉಡುವ ಸೀರೆಗಳ ಮೂಲಕ ಭಾರತೀಯ ಕೈಮಗ್ಗ ಮತ್ತು ಸಂಸ್ಕೃತಿಯನ್ನು ಜಗತ್ತಿಗೆ ಪರಿಚಯಿಸುವ ರೀತಿಯಿಂದಲೂ ಸುದ್ದಿಯಾಗಿವೆ.

ತಮ್ಮ ಮೊದಲ ಬಜೆಟ್‌ನಲ್ಲಿ ನಿರ್ಮಲಾ ಸೀತಾರಾಮನ್ ಅವರು ಆಂಧ್ರಪ್ರದೇಶದ ಸಾಂಪ್ರದಾಯಿಕ ಮಂಗಳಗಿರಿ ಸೀರೆಯನ್ನು ಉಟ್ಟಿದ್ದರು. ತಿಳಿ ಹಳದಿ ಮತ್ತು ಗುಲಾಬಿ ಬಣ್ಣದ ಕಾಂಬಿನೇಶನ್‌ನ ಈ ಸೀರೆ ಸರಳತೆ ಮತ್ತು ಗಾಂಭೀರ್ಯಕ್ಕೆ ಹೆಸರಾಗಿತ್ತು. ಈ ಬಜೆಟ್‌ನಲ್ಲಿ ಅವರು ಮೊದಲ ಬಾರಿಗೆ ಬ್ರಿಟಿಷ್ ಕಾಲದ 'ಬಜೆಟ್ ಬ್ರೀಫ್‌ಕೇಸ್' ಬದಲು ಭಾರತೀಯ ಪರಂಪರೆಯ ಬಹಿ ಖಾತಾ ಪರಿಚಯಿಸಿದರು.

ಎರಡನೇ ಬಜೆಟ್ ವೇಳೆ ಅವರು ತಮಿಳುನಾಡಿನ ಹೆಮ್ಮೆಯ ಕಾಂಜೀವರಂ ಸೀರೆಯನ್ನು ಆರಿಸಿಕೊಂಡಿದ್ದರು. ತಿಳಿ ಹಳದಿ ಬಣ್ಣದ ರೇಷ್ಮೆ ಸೀರೆಯಲ್ಲಿ ಅವರು ಮಿಂಚಿದ್ದರು. ಇದು ದಕ್ಷಿಣ ಭಾರತದ ಸಮೃದ್ಧ ಕೈಮಗ್ಗದ ಪ್ರತೀಕವಾಗಿತ್ತು.

ಕೋವಿಡ್ ನಂತರದ ಮೊದಲ ಬಜೆಟ್‌ನಲ್ಲಿ ಅವರು ತೆಲಂಗಾಣ ಮೂಲದ ಕೆಂಪು ಮತ್ತು ಬಿಳಿ ಬಣ್ಣದ ಪೋಚಂಪಳ್ಳಿ ಇಕತ್ ರೇಷ್ಮೆ ಸೀರೆಯನ್ನು ಉಟ್ಟಿದ್ದರು. ಜ್ಯಾಮಿತೀಯ ವಿನ್ಯಾಸಕ್ಕೆ ಹೆಸರಾದ ಪೋಚಂಪಳ್ಳಿ ಸೀರೆಗಳು ಭಾರತದ ಜಿಐ ಟ್ಯಾಗ್ ಪಡೆದ ಕಲೆಗಳಲ್ಲಿ ಒಂದಾಗಿದೆ.

ನಾಲ್ಕನೇ ಬಜೆಟ್ ಮಂಡಿಸುವಾಗ ಸಚಿವರು ಒಡಿಶಾದ ಸಾಂಪ್ರದಾಯಿಕ ಬೊಮ್ಕೈ ಸೀರೆಯನ್ನು ಧರಿಸಿದ್ದರು. ತುಕ್ಕಪ್ಪ ಬಣ್ಣದ (Rusty Brown) ಈ ಸೀರೆಯ ಮೇಲೆ ಕ್ರೀಮ್ ಬಣ್ಣದ ಬಾರ್ಡರ್ ಇತ್ತು. ಒಡಿಶಾದ ನೇಕಾರರ ಶ್ರಮವನ್ನು ಇದು ಜಗತ್ತಿಗೆ ಸಾರಿತು.

ಕರ್ನಾಟಕದ ಜನರಿಗೆ ಇದು ಹೆಮ್ಮೆಯ ವಿಷಯವಾಗಿತ್ತು. ಐದನೇ ಬಜೆಟ್‌ನಲ್ಲಿ ಸಚಿವರು ಕರ್ನಾಟಕದ ಧಾರವಾಡದ 'ಇಳಕಲ್ ಸೀರೆ'ಯನ್ನು ಉಟ್ಟಿದ್ದರು. ಈ ಸೀರೆಯ ಮೇಲೆ ಕರ್ನಾಟಕದ ಸಾಂಪ್ರದಾಯಿಕ 'ಕಸೂತಿ' ಕೈಕೆಲಸದ ವಿನ್ಯಾಸವಿತ್ತು. ಇದು ನವದೆಹಲಿಯಲ್ಲಿ ಕರ್ನಾಟಕದ ಕಲಾ ವೈಭವವನ್ನು ಅನಾವರಣಗೊಳಿಸಿತು.

ಚುನಾವಣಾ ಪೂರ್ವದ ಮಧ್ಯಂತರ ಬಜೆಟ್‌ನಲ್ಲಿ ಅವರು ಪಶ್ಚಿಮ ಬಂಗಾಳದ ಜನಪ್ರಿಯ ಕಾಂತಾ ಎಂಬ್ರಾಯ್ಡರಿ ಕೆಲಸವಿರುವ ನೀಲಿ ಬಣ್ಣದ ಟಸ್ಸರ್ ರೇಷ್ಮೆ ಸೀರೆಯನ್ನು ಆರಿಸಿಕೊಂಡಿದ್ದರು. ಇದು ಮಹಿಳಾ ನೇಕಾರರ ಸಬಲೀಕರಣದ ಸಂದೇಶವಾಗಿತ್ತು.

ಮೂರನೇ ಅವಧಿಯ ಮೊದಲ ಪೂರ್ಣ ಬಜೆಟ್‌ನಲ್ಲಿ ಅವರು ಮಧ್ಯಪ್ರದೇಶದ ವಿಶಿಷ್ಟ ಮಹೇಶ್ವರಿ ಸೀರೆಯನ್ನು ಧರಿಸಿದ್ದರು. ತಿಳಿ ನೇರಳೆ ಅಥವಾ ಲ್ಯಾವೆಂಡರ್ ಬಣ್ಣದ ಈ ಸೀರೆ ಹಗುರವಾದ ಮತ್ತು ಶ್ರೀಮಂತ ವಿನ್ಯಾಸಕ್ಕೆ ಹೆಸರುವಾಸಿ.

2025ರ ಕೇಂದ್ರ ಬಜೆಟ್ ಮಂಡನೆಯ ಸಂದರ್ಭದಲ್ಲಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಕಡು ಬಿಳಿ ಮತ್ತು ಕೆಂಪು ಬಣ್ಣದ ಸಂಯೋಜನೆಯ ಸೀರೆಯನ್ನು ಧರಿಸಿದ್ದರು. ಇದು ಒಡಿಶಾದ ಸುಪ್ರಸಿದ್ಧ ಸಂಬಲ್ಪುರಿ ರೇಷ್ಮೆ (Sambalpuri Silk) ಸೀರೆಯಾಗಿತ್ತು.